ភ្នំពេញ ៖ លោករដ្ឋមន្ត្រី ក្រសួងព័ត៌មាន បានស្នើដល់បងប្អូនអ្នកសារព័ត៌មានត្រូវបំពេញភារកិច្ចគ្រប់ក្រមសីលធម៌វិជ្ជាជីវៈរក្សានូវភាពថ្លៃថ្នូរ និងជៀសវាងការប្រព្រឹត្តអំពើខុសច្បាប់ដែលធ្វើឲ្យប៉ះពាល់ដល់តម្លៃសារព័ត៌មាន ដូចជាការយកតួនាទីអ្នកសារព័ត៌មាន ដើរកាងឈើ ដាក់កុងត្រូលជជុះ ដើម្បីគាបទារលុយពីអ្នករកស៊ីខុសច្បាប់ នឹងបញ្ហាទំនាស់ដីធ្លី ប្រាស់ចាកពីក្រមសីលធម៌វិជ្ជាជីវៈ ដែលធ្វើឲ្យប៉ះពាល់ដល់កិត្តិយសអ្នកសារព័ត៌មាន។
ក្រសួងព័ត៌មានបានសហការជាមួយអង្គការយូណេស្កូប្រចាំព្រះរាជាណាចក្រកម្ពុជា ក្រោមការជួយឧបត្ថម្ភពីស្ថានទូតស៊ុយអែតប្រចាំព្រះរាជាណាចក្រកម្ពុជា បានរៀបចំពិធីជួបជុំជាមួយបងប្អូនអ្នកសារព័ត៌មានជាតិអន្តរជាតិដើម្បីអបអរទិវាសេរីភាពសារព័ត៌មានសកលលោកឆ្នាំ 2019ដែលប្រុសធ្វើឡើងជារៀងរាល់ឆ្នាំនៅថ្ងៃទី 3 ខែឧសភាក្នុងគោលបំណងលើកស្ទួយសេរីភាពនៃការបញ្ចេញមតិសេរីភាពខាងសារព័ត៌មានការការពារឯករាជភាពពីប្រព័ន្ធផ្សព្វផ្សាយដែលគ្មានការជ្រៀតជ្រែកនិងឧទ្ទិសដល់អ្នកសារព័ត៌មានដែលបាត់បង់ជីវិតក្នុងការបំពេញភារកិច្ចនាពេលកន្លងមក។ ពិធីនេះត្រូវបានធ្វើឡើងកាលពីព្រឹកថ្ងៃទី 3 ខែឧសភានៅសណ្ឋាគារឡឺរ៉ូយ៉ាល់។
លោករដ្ឋមន្ត្រីខៀវកាញារីទ្ធបានថ្លែងថា ទិវាសិទ្ធិសេរីភាព សារព័ត៌មានសកលលោកឆ្នាំ 2019 បានជ្រើសរើសយកប្រធានបទដ៏សំខាន់ទាក់ទងទៅនឹងប្រព័ន្ធផ្សព្វផ្សាយសម្រាប់លទ្ធិប្រជាធិបតេយ្យវិជ្ជាជីវៈសារព័ត៌មាននិងការផ្សាយព័ត៌មានមិនពិតក្នុងពេលបោះឆ្នោត។ ប្រធានបទនេះមានលក្ខណៈ សមស្របនិង ឆ្លើយតបទៅនឹងបញ្ហាជាសកលដែលពិភពលោកទាំងមូលកំពុងប្រឈមទៅនឹងការផ្សាយព័ត៌មានក្លែងបន្លំការលាបពណ៌ការញុះញង់ អុជអាល ជេរប្រមាថដោយការសម្អប់គ្នាការរើសអើងជាដើមដែលបង្កឲ្យមានការបែកបាក់សាមគ្គីភាពផ្ទៃក្នុងដែលធ្វើឲ្យពិភពលោកមានចលាចល ធ្វើឲ្យការបោះឆ្នោតនៅតាមប្រទេសមួយចំនួនមានមានភាពច្របូកច្របល់បាត់បង់ទំនុកចិត្តមិនទទួលស្គាល់លទ្ធផលនៃការបោះឆ្នោតបង្កឲ្យមានអំពើហិង្សានិងជម្លោះប្រដាប់អាវុធ។
លោករដ្ឋមន្ត្រីបានលើកឡើងថា ដោយឡែកព្រះរាជាណាចក្រកម្ពុជាបានជ្រើសរើសយកប្រធានបទស្ដីពីតួនាទីប្រកបដោយសក្តានុពលរបស់សារព័ត៌មានគ្រាំទ្រសន្តិភាពនិងប្រជាធិបតេយ្យ។ ដោយមានលក្ខណៈសមស្របទៅនឹងស្ថានភាពជាក់ស្ដែងរបស់កម្ពុជានាបច្ចុប្បន្នដែលទើបចប់ព្រឹត្តិការណ៍ជាប្រវត្តិសាស្ត្រនៃការបោះឆ្នោតសកលជ្រើសតាំងតំណាងរាស្ត្រនីតិកាលទី 6 ដែលបានប្រព្រឹត្តទៅកាលពីខែកក្កដាឆ្នាំ 2018 ប្រកបដោយជោគជ័យនិងជាទីមោទនៈដោយសារគ្រប់ស្ថាប័នសារព័ត៌មានមួយចំនួនធំនៅព្រះរាជាណាចក្រកម្ពុជាបានប្រកាន់ខ្ជាប់នូវក្រមសីលធម៌ប្រកបដោយវិជ្ជាជីវៈក្នុងការផ្សព្វផ្សាយព័ត៌មានមិនពិតពីដំណើរការបោះឆ្នោតជូនប្រជាពលរដ្ឋធ្វើការសម្រេចចិត្តដោយខ្លួនឯងដែលធ្វើឲ្យការបោះឆ្នោតបានប្រព្រឹត្តដោយសេរីត្រឹមត្រូវយុត្តិធម៌បញ្ចាំងពីឆន្ទៈពិតប្រាកដរបស់ប្រជាពលរដ្ឋក្នុងការជ្រើសរើសតំណាងស្របច្បាប់របស់ខ្លួន។ ជាមួយនឹងជោគជ័យដ៏ធំធេងនាពេលកន្លងមកនេះយើងនៅមានការងារជាច្រើនទៀតដែលត្រូវបន្តធ្វើនាពេលបច្ចុប្បន្នស្របពេលដែលសិទ្ធិសេរីភាពនៃការបញ្ចេញមតិនិងសិទ្ធិសេរីភាពសារព័ត៌មានត្រូវបានបើកទូលាយនិងធានាដោយច្បាប់រដ្ឋការរីកចម្រើនយ៉ាងឆាប់រហ័សនៃប្រព័ន្ធផ្សព្វផ្សាយឌីជីថលនាយុគសម័យបច្ចុប្បន្នដែលមធ្យោបាយផ្សព្វផ្សាយព័ត៌មានថតក្នុងម្រាមដៃរបស់មនុស្សគ្រប់រូបដែលគេអាចគេបង្ហោះព័ត៌មានគ្រប់ប្រភេទបានគ្រប់ពេលវេលានឹងទៅគ្រប់ទីកន្លែងនៅលើពិភពលោក។ ខ្ញុំសូមឲ្យអ្នកសារព័ត៌មានជាតិអន្តរជាតិបន្តខិតខំប្រឹងប្រែងថែមទៀតក្នុងការប្រយុទ្ធប្រឆាំងទប់ស្កាត់ព័ត៌មានក្លែងបន្លំដោយការបញ្ចេញព័ត៌មានពិតដើម្បីបន្សាបព័ត៌មានក្លែងបន្លំដែលធ្វើអោយបាត់បង់សំឡេងសារព័ត៌មានអាជីពនឹងបាត់បង់ការគាំទ្រពីសាធារណជនព្រមទាំងធ្វើអោយសង្គមមានភាពវឹកវរ។
ឆ្លៀតក្នុងឱកាសនេះផងដែរខ្ញុំសូមបងប្អូនអ្នកសារព័ត៌មានជាតិអន្តរជាតិជាតិនិងភ្ញៀវអន្តរជាតិបានជ្រាបពីដំណើរពីការរៀបចំសេចក្តីព្រាងច្បាប់ស្ដីពីសិទ្ធិទទួលព័ត៌មានដោយមានសារៈសំខាន់ចំពោះសេរីភាពសារព័ត៌មានចំពោះការបញ្ចេញមតិសេរីភាពក្នុងការទទួលបានព័ត៌មានដែលរាជរដ្ឋាភិបាលបានប្រគល់ឱ្យក្រសួងព័ត៌មានធ្វើការជាមួយដៃគូពាក់ព័ន្ធរៀបចំសេចក្តីព្រាងច្បាប់នេះ។ កាលពីខែមករាឆ្នាំ 2019 យើងបានរៀបចំសេចក្តីព្រាងច្បាប់ដែលមានចំនួន 9 ជំពូកនិង 38 មាត្រាក្នុងលក្ខណៈក្រុមការងារបច្ចេកទេសនិងដៃគូពាក់ព័ន្ធនានា។ បច្ចុប្បន្នយើងកំពុងពិភាក្សាក្នុងក្របខណ្ឌចង្អៀតជាមួយក្រសួងស្ថាប័នពាក់ព័ន្ធដល់ជំពូកទី 4 មាត្រា 2០ស្ដីពីព័ត៌មានសម្ងាត់ហើយសង្ឃឹមថានឹងបញ្ចប់ការឆ្លងកិច្ចប្រជុំថ្នាក់ក្រសួងនេះនៅក្នុងពេលឆាប់ៗខាងមុខនេះ ដើម្បីដាក់ជូនរាជរដ្ឋាភិបាលនិងស្ថាប័ននីតិប្រតិបត្តិអនុម័តនាពេលដ៏ខ្លីខាងមុខនេះ។
លោករដ្ឋមន្ត្រីខៀវកាញារីទ្ធបានបញ្ជាក់ថាមានការរិះគន់ច្រើនគឺតើនិពន្ធនាយករឿងចាងហ្វាងកាសែតនោះត្រូវមានសញ្ញាប័ត្រដែរឬអត់ ។ត្រូវកំណត់កម្រិតចំណេះវិជ្ជាឬអត់។ សព្វថ្ងៃនេះយើងមានចាងហ្វាងកាសែតមួយចំនួនសរសេរអក្សរខ្មែរមិនត្រូវផងប៉ុន្តែនាពេលកន្លងមកពី 15 ឆ្នាំមុនយើងចង់សាក់ល្បងដោយដាក់កម្រិតសញ្ញាបត្រ និយាយរួមជាឧទាហរណ៍ប្រសិនបើជាចាងហ្វាងកាសែតយ៉ាងអន់ណាស់គាត់ជាប់បាក់ឌុបឬក៏គាត់ធ្លាប់ធ្លាប់ធ្វើកាសែត 5 ឆ្នាំសរសេរអត្ថបទបានប៉ុន្មានទើបអាចធ្វើជាចាងហ្វាង។ ប៉ុន្តែកាលពី 15ឆ្នាំមុននោះគេបាននិយាយថានេះជាការប៉ះពារដល់សិទ្ធិសេរីភាពសារព័ត៌មាន។
លោករដ្ឋមន្ត្រីក៏បានស្នើដល់បងប្អូនអ្នកសារព័ត៌មានត្រូវបំពេញភារកិច្ចគ្រប់ក្រមសីលធម៌វិជ្ជាជីវៈរក្សានូវភាពថ្លៃថ្នូរនឹងខិតខំអភិវឌ្ឍសមត្ថភាពរបស់ខ្លួនដើម្បីបង្កើនការរីកចម្រើននៃបច្ចេកវិទ្យាឌីជីថលនាពេលបច្ចុប្បន្ននិងជៀសវាងការប្រព្រឹត្តអំពើខុសច្បាប់ដែលធ្វើឲ្យប៉ះពាល់ដល់តម្លៃសារព័ត៌មានដូចជាការយកតួនាទីអ្នកសារព័ត៌មានដើរកាងឈើដាក់កុងត្រូលជជុះដើម្បីគាបទារលុយពីអ្នករកស៊ីខុសច្បាប់នឹងបញ្ហាទំនាស់ដីធ្លីប្រាស់ចាកពីក្រមសីលធម៌វិជ្ជាជីវៈដែលធ្វើឲ្យប៉ះពាល់ដល់កិត្តិយសអ្នកសារព័ត៌មានអាជីពនឹងបាត់បង់តម្លៃស្ថាប័នព័ត៌មានរបស់យើងទាំងមូល ៕ ដោយ ៖ កូឡាប
