ប្រធានាធិបតីអាមេរិច បាននិយាយថា គាត់នឹងធ្វើការដំឡើងពន្ធនាំចូលលើទំនិញចិន ដែលមានតម្លៃជាទឹកប្រាក់ចំនួន ២០០ពាន់លានដុល្លា ដោយសារតែកិច្ចចរចារលើពាណិជ្ជកម្មរវាងអាមេរិច និងចិន ដំណើរការទៅមុខយ៉ាងយឺត។
លោកត្រាំ បានបង្ហោះនៅលើ Twitter លោកដូច្នេះថា “ពន្ធនាំចូលចំនួន ១០ភាគរយ អាចនឹងឡើងដល់ ២៥ភាគរយនៅថ្ងៃសុក្រ ហើយទំនិញមិនគិតពន្ធដែលមានតម្លៃជាទឹកប្រាក់ចំនួន ៣២៥ពាន់លានដុល្លា ក៏អាចប្រឈមនឹងការយកពន្ធចំនួន ២៥ភាគរយដែរនាពេលបន្តិចទៀត”។
លោកថ្លែងថា “កិច្ចព្រមព្រៀងពាណិជ្ជកម្មជាមួយនឹងចិនបានបន្ត ប៉ុន្តែយឺតខ្លាំងណាស់ ខណៈដែលពួកគេប៉ុនប៉ងធ្វើការចរចារសាជាថ្មី”។
កាលពីដើមឆ្នាំនេះ លោកត្រាំ បានសម្រេចចិត្តធ្វើការពន្យាពេលតំឡើងពន្ធលើទំនិញនាំចូលពីចិន ដោយបញ្ជាក់ថា កិច្ចចរចាររីកចម្រើនទៅមុខ។
វិធានការរបស់លោក ត្រាំ បានដាក់សម្ពាធយ៉ាងខ្លាំងលើចិន ខណៈដែលអនុនាយករដ្ឋមន្ត្រីចិន Liu He បានរៀបចំធ្វើដំណើរទៅកាន់ទីក្រុងវ៉ាស៊ីនតោនសប្តាហ៍នេះ ដើម្បីបន្តការចរចារ។
សូមបញ្ជាក់ថា រហូតមកដល់ពេលនេះ សហរដ្ឋអាមេរិចបានកំណត់យកពន្ធលើទំនិញនាំចូលពីចិន ដែលមានតម្លៃជាទឹកប្រាក់ប្រមាណ ២៥០ពាន់លានដុល្លាអាមេរិច ដោយអាមេរិចចោទចិនថា បានធ្វើពាណិជ្ជកម្មមិនស្មើភាពគ្នា។
ជុំវិញការយកពន្ធនេះដែរ ចិនក៏បានធ្វើការវាយបកវិញ ដោយបានយកពន្ធលើផលិតផលអាមេរិច ដែលមានតម្លៃជាទឹកប្រាក់ ១១០ពាន់លានដុល្លា ដោយចោទអាមេរិចថា ជាអ្នកផ្តើមសង្គ្រាមពាណិជ្ជកម្មដ៏ធំបំផុតក្នុងប្រវត្តិសាស្ត្រសេដ្ឋកិច្ច៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC