ភ្នំពេញ ៖ លោក គីម សាន តារាសម្តែង បានទទួលរងនូវការរិះគន់ខ្លាំង ពីមន្ត្រីរដ្ឋាភិបាល ពាក់ព័ន្ធនិងការស្លៀកសំលៀកបំពាក់ ដែលមានសញ្ញារបស់ក្រសួងទំនាក់ទំនង ជាមួយ ប្រធានរដ្ឋសភានិងអធិការកិច្ច ។ លោកគឹម សាម ដែលគេស្គាល់ថា ជាប្អូនប្រុសរបស់អ្នកនាងដេនីខ្វាន់ និងជាតារាសម្ដែង បានស្លៀកសំលៀកបំពាក់បែបនេះ ចូលរួមក្នុងកម្មវិធីមួយ ហើយរូបភាពទាំងនោះ ត្រូវបានចែកចាយ នៅលើបណ្ដាញសង្គម។
ជាមួយនឹងរូបភាពសម្លៀកបំពាក់បែបនេះ បានបង្កប៉ះពាល់ ដល់រាជរដ្ឋាភិបាល ជាពិសេស អ្នកដែលមានសិទ្ធិសម្លៀកបំពាក់ ដែលមានស្លាកសញ្ញាស័ក្តិសម្គាល់ បែបនេះ ទាល់តែ ជាមន្ត្រីរាជរដ្ឋាភិបាល មានការតែងតាំងដោយព្រះរាជក្រឹត្យ ប៉ុន្តែបែរជាត្រូវបានលោកគឹម សាន យកមកកែច្នៃសញ្ញាស័ក្តិ យកមកតុបតែង ជាមួយអាវពណ៌ក្រហម ធ្វើជារបៀបលេងកម្សាន្តសប្បាយទៅវិញ ព្រោះថាសញ្ញាស័ក្តិទាំងនោះ គេពាក់ជាមួយនឹងខោអាវពណ៌ស សម្រាប់កម្មវិធីធំៗរបស់មន្ត្រីរាជរដ្ឋាភិបាល តែប៉ុណ្ណោះ មិនមែនចេះតែនឹកឃើញ យកសម្លៀកបំពាក់បែបនេះ យកមកស្លៀកពាក់នោះទេ។
ជាមួយករណីនេះ លោក នុត សវនា អគ្គនាយករង នៃអគ្គនាយកដ្ឋានពន្ធនាគារ ក្រសួងមហាផ្ទៃ បានសរសេរប្រតិកម្ម នៅលើហ្វេសប៊ុកផ្លូវការថា បើពាក់ថតកុន ឬថតសារអប់រំ យើងគួរប្រើឯកសណ្ឋានឲ្យបានត្រឹមត្រូវ តាមច្បាប់កំណត់ តែបើយករបស់ផ្លូវការមកច្នៃ តាមការរវើរវាយ ពេលពុលសារជាតិអ័រម៉ូន ឬបូថក់ វាអាចបង្កគ្រោះថ្នាក់ដល់ខ្លួន។
លោក នុត សវនា បានសរសេររៀបរាប់យ៉ាងដូច្នេះថា៖ “ការប្រើប្រាស់ សញ្ញាសក្តិ និងឯកសណ្ឋាន របស់ស្ថាប័នសាធារណៈ សុទ្ធតែត្រូវបានកំណត់ដោយព្រះរាជក្រឹត្យ (លើកលែងតែសន្តិសុខខណ្ឌ ដែលជាកម្រិត មូលដ្ឋាន)។ ជាក់ស្តែង បើខ្ញុំមិនច្រលំទេ សញ្ញាសក្តិ និងស្លាកសញ្ញា ដែលនាយប្រុញកំពុងឡង់សេនេះជាប្រភេទត្រូវបានដាក់ឲ្យប្រើជាមួយអាវស ខោស ដោយមន្ត្រីជាន់ខ្ពស់ ថ្នាក់វរមន្ត្រី ឬឧត្តមមន្ត្រី របស់ស្ថាប័នទំនាក់ទំនងរដ្ឋសភា ព្រិទ្ធសភា និងអធិការកិច្ច សម្រាប់ចូលរួមក្នុងព្រះរាជពិធីរបស់ព្រះករុណាជាអង្គម្ចាស់ជីវិតតម្កល់លើត្បូង ព្រះមហាក្សត្រនៃព្រះរាជាណាចក្រកម្ពុជា។ បើពាក់ថតកុន ឬថតសារអប់រំ យើងគួរប្រើឯកសណ្ឋានឲ្យបានត្រឹមត្រូវតាមច្បាប់កំណត់ តែបើយករបស់ផ្លូវការមកច្នៃតាមការរវើរវាយពេលពុលសារជាតិអ័រម៉ូន ឬបូថក់ វាអាចបង្កគ្រោះថ្នាក់ដល់ខ្លួន។ អញ្ចឹងហើយបានជាគេតែងតែទូន្មានថា “ពេលស្រវឹង សូមកុំបើកបរ”៕ ដោយ ៖ កូឡាប
