ខេត្តព្រះសីហនុ ៖ កាលពីព្រឹកថ្ងៃទី៨ ខែឧសភា ឆ្នាំ២០១៩នេះ មន្ត្រីសាខាកាំកុងត្រូលខេត្តព្រះសីហនុ បានបន្តចុះត្រួតពិនិត្យមុខម្ហូបស្រស់ ឬគ្រឿងសមុទ្រស្រស់ៗ អាហារវេចខ្ចប់ស្រាប់ និងត្រួតពិនិត្យកាលបរិច្ឆេទទំនិញជាច្រើនប្រភេទទៀត ដែលអាជីវករដាក់លក់នៅផ្សារពាណិជ្ជកម្ម ផ្សាក្តាម ដាក់លក់តាមផ្ទះ និងផ្សារទំនើប ឬម៉ាត របស់ថៅកែជនជាតិចិន នាទីប្រជុំជនក្នុងក្រុងព្រះសីហនុ។
លោក ជា ប៉ិច អនុប្រធានសាខាកាំកុងត្រូលខេត្តព្រះសីហនុ មានប្រសាសន៍ថា គោលបំណងនៃការចុះត្រួតពិនិត្យ ទំនិញ របស់មន្ត្រីកាំកុងត្រូល ដើម្បីស្រាវជ្រាវ ទប់ស្កាត់ការចរាចរណ៍ទំនិញខូចគុណភាព ក្លែងបន្លំស្លាកសញ្ញា ផុតកំណត់កាលបរិច្ឆេទប្រើប្រាស់ និងមានសារធាតុគីមីហាមឃាត់ ដែលធ្វើឲ្យប៉ះពាល់ដល់សុខភាពប្រជាពលរដ្ឋអ្នកប្រើប្រាស់។
លោក ជា ប៉ិច បន្តថា នៅក្នុងសកម្មភាពចុះត្រួតពិនិត្យចំណីអាហារ និងទំនិញផ្សេងៗ កាលពីព្រឹកថ្ងៃទី៨ ខែឧសភានេះ មន្ត្រីជំនាញបានដកយកគំរូម្ហូបអាហារមួយចំនួន មកធ្វើតេស្តបឋមរួមមាន៖ បង្គារ មឹក ត្រីប្រឡាក់ ត្រីស្រស់ ត្រីចំហុយ និសណ្តែកបណ្តុះជាដើម ដើម្បីរកសារធាតុគីមីហាមឃាត់ ដែលអាចធ្វើឲ្យប៉ះពាល់ដល់សុខភាពប្រជាពលរដ្ឋ។
ព្រមជាមួយគ្នានោះ មន្ត្រីជំនាញ បានធ្វើការត្រួតពិនិត្យរកភាពមិនអនុលោមនៅលើសំបកវេចខ្ចប់ផលិតផលម្ហូបអាហារជាច្រើនប្រភេទទំនិញផងដែរ។
លោក ជា ប៉ិច បញ្ជាក់ថា ជាលទ្ធផល មន្ត្រីជំនាញពុំបានរកឃើញមានវត្តមានសារធាតុគីមីហាមឃាត់ នៅលើផលិតផលម្ហូបអាហារខាងលេីនោះទេ ប៉ុន្តែបានរកឃើញការដាក់តាំងលក់ទំនិញខូចគុណភាព ហួសកាលបរិច្ឆទប្រើប្រាស់ គឺមុខទំនិញប្រេងខ្យងចំនួន ១២ដប ស្មេីរនឹង ៣,១២គីឡូក្រាម នៅផ្សារម៉ាតហ័នជីគូ ដែលមានថៅកែជាជនជាតិចិន។
លោកបន្តថា ចំពោះមុខទំនិញហួសកាលបរិច្ឆេទប្រើប្រាស់ គឺប្រេងខ្យងខាងលើនេះ បន្ទាប់មកមន្ត្រីជំនាញ បានធ្វើកំណត់ហេតុរួច ក៏បានដកហូត ទំនិញទាំងនោះយកទៅរក្សាទុកនៅសាខាខេត្តព្រះសីហនុដើម្បីធ្វើការកម្ទេចចោល និងបានធ្វើការណែនាំដល់អាជីវករដទៃ ឲ្យយល់ដឹង និងអនុវត្តទៅតាមច្បាប់ ស្តីពីការគ្រប់គ្រងគុណភាព សុវត្ថិភាព លើផលិតផល ទំនិញ និងសេវា ដើម្បីជៀសវាងបង្កផលប៉ះពាល់ដល់សុខភាពប្រជាពលរដ្ឋ នឹងអាចប្រឈមចំពោះមុខច្បាប់ថែមទៀតផង។
ត្រង់ចំណុចនេះ លោក ជា ប៉ិច អនុប្រធានសាខាកាំកុងត្រូលខេត្តព្រះសីហនុ បានអំពាវនាវដល់អាជីវករ ឲ្យចូលរួមសហការជាមួយមន្ត្រីកាំកុងត្រូល ដើម្បីសុវត្ថិភាពចំណីអាហារគ្មានសារធាតុគីមី ឲ្យបានទាំងអស់គ្នា ប្រយោជន៍រួមចំណែកជួយថែរក្សាសុខភាពប្រជាពលរដ្ឋ នៅតាមក្រុមគ្រួសារនីមួយៗឲ្យមានសុខភាពល្អ៕ ដែន សីមា
