ប្រធានាធិបតីអាមេរិច ដូណាល់ ត្រាំ នៅថ្ងៃអង្គារម្សិលមិញនេះបានហៅសង្គ្រាមពាណិជ្ជកម្មជាមួយចិនថា “ជាការវាយតប់គ្នាបន្តិចបន្តួចប៉ុណ្ណោះ” ហើយលោកបានចោទទីក្រុងប៉េកាំងជាថ្មីទៀតថា ជាអ្នកធ្វើឲ្យខូចកិច្ចព្រមព្រៀម នៅពេលវាខិតជិតដល់ការព្រមព្រៀងគ្នា ។
ទោះបីជាលោកត្រាំ បាននិយាយថាលោកមានទំនាក់ទំនងមិនធម្មតាជាមួយនឹងមេដឹកនាំចិនក៏ដោយ ក៏លោកបានបញ្ជាក់ថា លោកនឹងមិនធ្វើការចុះហត្ថលេខាលើកិច្ចព្រមព្រៀងឡើយ ប្រសិនវាមិនមែនកិច្ចព្រមព្រៀងដែលល្អ។
លោកបានថ្លែងប្រាប់អ្នកសារពត៌មានដូច្នេះថា “ពួកយើងកំពុងមានការឈ្លោះគ្នាបន្តិចបន្តិចជាមួយចិន ពីព្រោះពួកគេបានប្រព្រឹត្តិមកលើយើងយ៉ាងអយុត្តិធម៌អស់រយៈពេលជាច្រើនទសវត្សន៍មកហើយ”។
សូមបញ្ជាក់ថា កាលពីថ្ងៃសុក្រសប្តាហ៍មុន អាមេរិចបានបង្កើនពន្ធនាំចូលលើសទ្វេដងលើទំនិញនាំចូលពីចិនដែលមានតម្លៃជាទឹកប្រាក់ ២០០ពាន់លានដុល្លា។ អាមេរិចបានដំឡើងពន្ធពី ១០ភាគរយ ទៅ ២៥ភាគរយ។
ប៉ុន្តែនៅថ្ងៃច័ន្ទដើមសប្តាហ៍នេះដែរ ចិនបានធ្វើការសងសឹកវិញ ដោយបានប្រកាសថានឹងធ្វើការដំឡើងពន្ធដែរលើផលិតផលនាំចូលពីអាមេរិចដែលមានទំហំទឹកប្រាក់ ៦០ពាន់លានដុល្លា។ ការដំឡើងពន្ធនោះនឹងត្រូវចាប់អនុវត្តពីថ្ងៃទី ១ ខែមិថុនាទៅ៕
អត្ថបទប្រែសម្រួលដោយ៖ សុភ័ក្រ
ប្រភព ៖ Channelnewsasia