ប៉េកាំង ៖ បើតាមការផ្សាយរបស់ក្រសួងអប់រំយុវជននិងកីឡាហ្វេសប៊ុកផ្លូវការនៅថ្ងៃទី 18 ឧសភា ឆ្នាំ 2019 នេះបានដឹងថា កុមារាកម្ពុជាម្នាក់ដែលមានភាពល្បីល្បាញយ៉ាងខ្លាំង នៅលើបណ្ដាញសង្គម កាលពីខែវិច្ឆិកា ឆ្នាំ២០១៨ កន្លងទៅ ដោយសារសមត្ថភាពនិយាយភាសាបរទេសជាច្រើនភាសានោះ ទីបំផុតទទួលបានឱកាសចូលរៀន នៅសាលាឯកជនមួយកន្លែង ក្នុងខេត្ត Zhejiang ភាគខាងកើតនៃសាធារណរដ្ឋប្រជាមានិតចិន ព្រមទាំងមានបំណងប្រាថ្នា ចង់បន្តការសិក្សានៅសាកលវិទ្យាល័យដ៏ល្បីមួយ នៅរដ្ឋធានីប៉េកាំងថែមទៀតផង។
កុមារា ធុច សាលិក ដែលមានវ័យ១៤ឆ្នាំ ត្រូវបានទទួលស្វាគមន៍យ៉ាងកក់ក្ដៅ ដោយការសម្ដែងរាំ ច្រៀង របស់សិស្សានុសិស្សមកពីសាលា Zhejiang Hailiang Foreign Language School ខណៈដែលកុមារារូបនេះ ធ្វើដំណើរទៅដល់អាកាសយានដ្ឋានអន្តរជាតិ Pudong ក្នុងទីក្រុង Shanghai កាលពីថ្ងៃចន្ទកន្លងទៅនេះ។
ក្រុមហ៊ុន Hailiang Group ជាក្រុមហ៊ុនផលិតនូវផលិតផលធ្វើពីទង់ដែង ក្នុងទីក្រុង Zhuji និងជាម្ចាស់សាលារៀនខាងលើ បានលើកឡើងថា ខ្លួននឹងឧបត្ថម្ភដល់ការសិក្សារបស់កុមារា សាលិក និងចេញថ្លៃពាក់កណ្ដាល នៃការចំណាយក្នុងការរស់នៅរបស់កុមាររូបនេះក្នុងពេលសិក្សា នៅសាកលវិទ្យាល័យ និងក្រោយបញ្ចប់ការសិក្សាផងដែរ ប្រសិនបើសាលិក មានបំណងចង់បន្តការសិក្សា។
នេះជាលើកទី២ហើយ ក្នុងដំណើរទស្សកិច្ចរបស់ សាលិ នៅប្រទេសចិន និងបន្តការសិក្សានៅទីនោះដោយផ្ទាល់ ក្រោយ សាលិ ត្រូវបានមជ្ឈដ្ឋាននានាទទួលស្គាល់ ពីសមត្ថភាព ទេពកោសល និងភាពវៃឆ្លាតរបស់ប្អូន។
សាលិ បានធ្វើឲ្យ ពិភពលោកស្គាល់ ទាំងប្អូនមិនបានដឹងខ្លួន និងក៏មិនដែលស្រម៉ៃសូម្បីតែបន្តិច ថាខ្លួនមានថ្ងៃនេះ ហើយធ្វើឲ្យ
ពិភពលោកមានការចាប់អារម្មណ៍ និងទទួលស្គាល់សមត្ថភាពរបស់ប្អូន ក្រោយប្អូនបានបកស្រាយចំរៀងជាភាសាចិន បានយ៉ាងពីរោះ និងការនិយាយភាសារបរទេសបានយ៉ាងស្ទាត់ជាង១០ភាសារទៀត។
វីដេអូ របស់ សាលិ ក្រោយភ្ញៀវទេសចរស្ត្រី បង្ហោះមិនបានប៉ុន្មានម៉ោងផងទទួលការចាប់អារម្មណ៍យ៉ាងខ្លាំង ធ្វើឲ្យបណ្តាញសារព័ត៌មានក្នុងស្រុក និងបរទេស ចុះស្កាត់ដើម្បីជួបសម្ភាសន៍ប្អូន៕ ដោយ ៖ បញ្ញាស័ក្តិ
