សៀមរាប៖ នគរបាលអន្តោប្រវេសន៍គ្រប់គ្រងជនបរទេសនៅក្នុងខេត្តសៀមរាប បានបញ្ជាក់ថា ក្រុមការងារបានជំរឿន និង ចុះពិនិត្យជនបរទេសបែបអន្តោប្រវេសន៍ មានឯកសាររដ្ឋបាលកម្ពុជាមិនប្រក្រតី និង ស្នាក់នៅយូរ ចំនួន១.៣៩២គ្រួសារ មាន៥សញ្ជាតិ មាន មនុស្ស ៣.៩៣៣នាក់ហើយកន្លងមកនេះការងារគ្រប់គ្រងលើជនបរទេសដែលបាននិង កំពុងស្នាក់នៅលើទឹកដីខេត្តសៀមរាប សមត្ថកិច្ចជំនាញរួមជាមួយនិងអជ្ញាធរមូលដ្ឋានបាននិងកំពុងអនុវត្តហើយ បានចាប់បញ្ជូនជនបរទេសទាំងនោះឲ្យត្រឡប់ទៅប្រទេសកំណើតរបស់ពួកគេវិញ។
នាព្រឹកថ្ងៃទី ២៧ ខែ ធ្នូ ឆ្នាំ២០១៧នេះ មានធ្វើកិច្ចប្រជុំផ្សព្វផ្សាយអនុក្រឹត្សលេខ ១២៩អនក្រ.បក ចុះថ្ងៃទី១៥ ខែសីហា ឆ្នាំ២០១៧ ស្តីពីការលុបចោល និង ដកហូតឯកសាររដ្ឋបាល កម្ពុជា មិនប្រក្រតីដែលជនបរទេសកំពុងកាន់កាប់ប្រើប្រាស់ក្នុងខេត្តសៀមរាប ក្រោមអធិបតីភាពលោកនាយឧត្តម សេនីយ៍ សន្តិបណ្ឌិត អ៊ុក គឹមលេខ រដ្ឋលេខាធិការក្រសួងមហាផ្ទៃ លោក ឃឹម ប៊ុនសុង អភិបាលនៃ គណៈអភិបាលខេត្តសៀមរាប ។
តាមរបាយការណ៍របស់លោកឧត្តមសេនីយ៍ត្រី ជា គេមសាន ស្នងការរងទទួលបន្ទុកផែន អន្តោប្រវេសន៍ លើការគ្រប់គ្រងជនបរទេសនៅក្នុងខេត្តសៀមរាប បានឲ្យដឹងថា ដើម្បីធានាឲ្យបាននៅសុវត្តិភាព សណ្តាប់ធ្នាប់នៅក្នុងសង្គមនោះ អាជ្ញាធរក្រុង ស្រុក មេឃុំ ចៅសង្កាត់ និងមន្ត្រីជំនាញត្រូវធ្វើការត្រួតពិនិត្យឲ្យអស់លើជនបរទេស ឬជនប្លែកមុខ ដែលចូលមកស្នាក់នៅក្នុងភូមិសាស្ត្ររបស់ខ្លួន ដោយពិនិត្យទៅលើសំណុំឯកសារចូលមកស្នាក់នៅឬមកប្រកបរបរអាជីវកម្មផ្សេងៗជាដើម ។ តាមចំនួនតួលេខបញ្ជាក់របស់ការិយាល័យអន្តោប្រវេសន៍ លើការគ្រប់គ្រងជន បរទេសដែលស្នាក់នៅក្នុងខេត្តសៀមរាប ទាំងស្របច្បាប់ មិនស្របច្បាប់ សរុប ១.៦៨៧គ្រួសារ មានមនុស្ស ៤.៧៩៦នាក់ ស្រី ២.៣១៤នាក់ មាន៥សញ្ជាតិ ក្នុងនោះជនជាតិវៀតណាម ឡាវ ថៃ ភូមា និង នេប៉ាល់ ដែលចូលមកប្រកបធ្វើអាជីវកម្មនៅខេត្តសៀមរាប ។ ក្រុមការងារបានជំរឿន និង ចុះពិនិត្យជនបរទេសបែបអន្តោប្រវេសន៍ មានឯកសាររដ្ឋបាលកម្ពុជាមិនប្រក្រតី និង ស្នាក់នៅយូរ ចំនួន១.៣៩២គ្រួសារ មាន៥សញ្ជាតិ មាន មនុស្ស ៣.៩៣៣នាក់ ស្រី១.៨៧៧នាក់ ក្នុងនោះអាយុ ១៨ឆ្នាំឡើង ២ពាន់៥១៩នាក់ ស្រី១.២២៧នាក់ ក្រោមអាយុ១៨ឆ្នាំចុះ ១.៤១៤នាក់ ស្រី ៦៥០នាក់ ។ កន្លងមកនេះការងារគ្រប់គ្រងលើជនបរទេសដែលបាននិង កំពុងស្នាក់នៅលើទឹកដីខេត្តសៀមរាប សមត្ថកិច្ចជំនាញរួមជាមួយនិងអជ្ញាធរមូលដ្ឋានបាននិងកំពុងអនុវត្តហើយ បានចាប់បញ្ជូនជនបរទេសទាំងនោះឲ្យត្រឡប់ទៅប្រទេសកំណើតរបស់ពួកគេវិញជាបន្តបន្ទាប់ ជាច្រើននាក់ផងដែរ ។
បន្ទាប់ពីលោកឧត្តមសេនីយ៍ត្រី ទិត្យ ណារ៉ុង ស្នងការនគរបាលខេត្ត អាននូវអនុក្រិត្យលេខ១២៩អនក្រ.បក ចុះថ្ងៃទី១៥ ខែសីហា ឆ្នាំ២០១៧ ស្តីពីការលុបចោល និង ដកហូតឯកសាររដ្ឋបាល កម្ពុជា មិនប្រក្រតីដែលជនបរទេសកំពុងកាន់កាប់ប្រើប្រាស់រួចមក មានប្រសាសន៍នោះដែរលោកនាយឧត្តមសេនីយ៍ សន្តិបណ្ឌិត អ៊ុក គឹម លេខ បានគូសបញ្ជាក់ថា បញ្ហាអន្តោប្រវេសន៍ គឺជាបញ្ហាសកល ដោយនៅលើសកលលោកយើងនេះ គ្រប់បណ្តា ប្រទេសទាំងអស់ ក៏មានជនបរទេសអន្តោប្រវេសន៍មកស្នាក់រស់នៅ ប្រកបធ្វើអាជីវកម្មចិញ្ចឹមជីវិត ដូចនៅក្នុងកម្ពុជា យើងផងដែរ ។ បញ្ហាការធ្វើទេសប្រវេសន៍នេះ គឺជាការស្វែងរកកម្រៃទីផ្សារការងារ ព្រមទាំងទទួលបាននូវបច្ចេក វិទ្យា ចំណេះដឹងយកមកធ្វើការប្រកបមុខរបរចិញ្ចឹមជីវិតនៅក្នុងក្រុមគ្រួសារផងដែរ ។ ដូច្នេះដើម្បីលុបបំបាត់ជនអន្តោប្រវេសន៍ដែលចូលមកស្នាក់នៅលើទឹកដីកម្ពុជា ទាំងខុសច្បាប់នេះ គឺ ដើម្បីថែរក្សានៅសន្តិសុខ សណ្តាប់ធ្នាប់លើការគ្រប់គ្រងជនអន្តោប្រវេសន៍ទាំងនេះនៅក្នុងសង្គមនៃប្រទេសរបស់យើង ។
លោកនាយឧត្តមសេនីយ៍សន្តិបណ្ឌិត អ៊ុក គឹមលេខ ក៏បានបញ្ជាក់ទៀតថា រាជរដ្ឋាភិបាលបានចេញនៅអនុក្រឹត្សមួយលេខ ១២៩អនក្រ.បក ចុះថ្ងៃទី ១៥ ខែសីហា ឆ្នាំ ២០១៧នេះ ដើម្បីលុបចោល និងដកហូតឯកសាររដ្ឋបាលកម្ពុជា មិនប្រក្រតីណាដែលជនបរទេសទាំងនោះ បានកំពុងកាន់កាប់ប្រើប្រាស់ និង ជម្រុញឲ្យពួកគាត់ទាំងនោះចូលមកបំពេញឯកសារ សុំស្នាក់នៅសារជាថ្មីឡើងវិញ ឲ្យស្របទៅតាមនិងនីតិវិធីច្បាប់ ។ ឯកឧត្តមក៏បានធ្វើការផ្តាំផ្ញើ ដល់សមត្ថកិច្ច អាជ្ញាធរគ្រប់ថ្នាក់ ត្រូវរួមសហការគ្នា ក្នុងការអនុវត្តអនុក្រិត្យនេះ ឲ្យទទួលបានជោគជ័យផងដែរ ៕ ដោយ៖បញ្ញាស័ក្តិ
