បន្ទាយមានជ័យ ៖ ម៉ោង១និង១០នាទី រសៀលថ្ងៃទី២៧ ខែធ្នូឆ្នាំ២០១៧ នៅចំណុចភួមិស្ទឹងបត់ សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ។
លោកវរសេនីយ៍ ខែម សុភ័ណ នាយការិយាល័យនគរបាលព្រហ្មទណ្ឌកំរិតស្រាលបានឲ្យដឹងថ្ងៃទី២៧ធ្នូថា៖ ដោយទទួលបាននូវបទបញ្ជារបស់លោកឧត្តមសេនីយ៍ អាត់ ខែម ស្នងការនគរបាលខេត្តបន្ទាយមានជ័យ និងការដឹកនាំបញ្ជាផ្ទាល់របស់លោក ភឿ ម៉ានសឹង្ហ នាយស្តីទីទទួលផែននគរបាលព្រហ្មទណ្ឌនិងលោកផ្ទាល់ កំលាំងនគរបាលព្រហ្មទណ្ឌកំរិតស្រាល សហការជាមួយកម្លាំងនគរបាលកំរិតធ្ងន់ខេត្ត បានធ្វើការចុះបង្ក្រាបទីតាំងលេងល្បែងស៊ីសងអាប៉ោងនៅចំណុចភូមិស្ទឹងបត់ សង្កាត់ផ្សារកណ្តាល ក្រុងប៉ោយប៉ែត។
ក្នុងពេលចុះបង្ក្រាប កម្លាំងសម្ថកិច្ចដកហូតវត្ថុតាងរួមមាន៖ ចានបាញ់ប៉ោង០២ មេអាប៉ោង០២ កំរាលចាក់ ០១ ផ្ទឹលគ្រប០១ លុយ៤៦៥០០០រៀល និងបានឃាត់ខ្លួនមនុស្សជាអ្នកញៀនល្បែងចំនួន ០៨នាក់ ស្រី០១នាក់ រួមមាន៖ ១-ឈ្មោះ អោម អេង ប្រុស ៦២ឆ្នាំ ២ -ឈ្មោះ មិត្ត ជា ប្រុស ៥១ឆ្នាំ ៣-ឈ្មោះ សួស ច្រើប ស្រី ៥០ឆ្នាំ ៤-ឈ្មោះ សំ ជា ប្រុស ៥៩ឆ្នាំ ៥-ឈ្មោះ ញ៉ែត មឿន ប្រុស ៥៩ឆ្នាំ ៦- ឈ្មោះ ឆុន ប៊ុនថា ប្រុស ៣៦ឆ្នាំ ៧-ឈ្មោះ ហែម ខន ប្រុស ៧៥ឆ្នាំ ៨-ឈ្មោះ អោម ម៉ាប់ ប្រុស ២៦ឆ្នាំ មានសំភារះម៉ូតូ ១១គ្រឿង។ ក្នុងនោះ ៨គ្រឿងម្ចាស់រត់ចោលអស់និងរថយន្ត០២គ្រឿង។
មនុស្សអ្នកញៀនល្បែងអាប៉ោងនេះទម្លាយអោយដឹងថា : ល្បែងស៊ីសងកាន់ឆ្នាំ មួយកន្លែងនេះធ្លាប់ត្រូវសមត្ថកិច្ចនគរបាលមូលដ្ឋានបង្ក្រាបនិងអៅយធ្វើកិច្ចសន្យាបញ្ឈប់ដែរ។ តែតមកបានសមត្ថកិច្ចមូលដ្ឋានទាំងនោះ បិតបាំងឬធ្វើជាមិនដឹងមិនឃើញ ទើបពួកបាញ់មេអាប៉ោង និងពួកខ្លួនបានលួចលេងឡើងវិញអស់រយ:ពេលយូរក្រែលដែរមកហើយ។
លោកវរសេនីយ៍ ខែម សុភ័ណនិយាយបន្តថា ៖ អ្នកលេងល្បែងទាំង៨នាក់ រួមទាំងវត្ថុតាង ដែលដកហូតបានកម្លាំងជំនាញនគរបាលព្រហ្មទណ្ឌកំពុងរៀបចំសំណុំរឿងបញ្ជូនទៅសាលាដំបូងខេត្តបន្ទាយមានជ័យដើម្បីចាត់ការបន្ត។ ឯមុខសញ្ញា មេបន មេបាញ់អាប៉ោងត្រូវបានកំណត់មុខសញ្ញារួចហើយៗ បាននឹងសុំដីកាដើម្បីស្វែងរកចាប់ខ្លួន៕ ដោយ ៖ បន្ទាយ