ភ្នំពេញ ៖ ក្នុងសិក្ខាសាលាស្ដីពីសិទ្ធិនិងកាតព្វកិច្ចសារពើពន្ធសម្រាប់អ្នកជាប់ពន្ធមធ្យម លោកហេង សុខណាង អគ្គនាយករងនៃអគ្គនាយកដ្ឋានពន្ធដារ បានថ្លែងថា ការបញ្ជីពន្ធដារនេះអាចជាប្រយោជន៍របស់សហគ្រាសទូទៅព្រោះថារដ្ឋបាលសារពើពន្ធមានការលើកទឹកចិត្តផ្នែកពន្ធដារទៅលើវិស័យអាទិភាពនៅឬសហគ្រាសធុនតូចនិងមធ្យម។ នេះបើតាមសេចក្តីប្រកាសព័ត៌មានរបស់អគ្គនាយកដ្ឋានពន្ធដារកាលពីពេលថ្មីនេះ។
លោកអគ្គនាយករងបានសូមឱ្យសហគ្រាសទាំងអស់ក៏ដូចជាអ្នកជាប់ពន្ធត្រូវគិតថាការបង់ពន្ធគឺជាការចូលរួមចំណែកដល់ការវិនិយោគសម្រាប់អនាគតខ្លួនផងដែរ សម្រាប់កូនចៅខ្លួនផងនិងសម្រាប់ប្រទេសជាតិមានការវិវឌ្ឍន៍រីកចម្រើនរុងរឿងផង។ លោកហេង សុខណាង បានសំដែងនូវការជឿជាក់យ៉ាងមុតមាំថាការចូលរួមនៅក្នុងសិក្ខាសាលានឹងទទួលបានធាតុចូលជាចំណេះដឹងចំណេះធ្វើជាបទបញ្ញត្តិនិងជាបទពិសោធន៍ពាក់ព័ន្ធ ដល់ការបំពេញកាតព្វកិច្ចពន្ធដាររបស់អ្នកជាប់ពន្ធហើយបានជាប្រយោជន៍យកទៅអនុវត្តឲ្យបានត្រឹមត្រូវតាមបទបញ្ញាត្តិនិងលិខិតបទដ្ឋានស្ដីពីពន្ធដារជាធរមានជាពិសេសការដាក់លិខិតប្រកាសពន្ធប្រចាំខែសម្រាប់សហគ្រាសអ្នកជាប់ពន្ធមធ្យមថ្មីដែលទើបចុះបញ្ជីពន្ធដារ។ លោតអគ្គនាយករងក៏បានសំណូមពរឲ្យអ្នកជាប់ពន្ធទាំងអស់ រួតរះក្នុងការដាក់លិខិតប្រកាសបង់ពន្ធឲ្យបានទៀងទាត់រៀងរាល់ខែហើយសូមធ្វើការប្រកាសឲ្យបានស្មោះត្រង់ចៀសវាងការទទួលរងទោសទណ្ឌនៅពេលធ្វើសវនកម្មរបស់មន្ត្រីពន្ធដារ។
ចំណែកលោកកែន សម្បត្តិ អគ្គនាយករងនៃអគ្គនាយកដ្ឋានពន្ធដារ ក៏បានថ្លែងដែរថា ក្នុងក្របខ័ណ្ឌនៃការធ្វើកំណែទម្រង់វិស័យពន្ធដារជាពិសេសស្របតាមយុទ្ធសាស្ត្រគៀងគរចំណូលរយៈពេលមធ្យម 2014-2018 នេះ អគ្គនាយកដ្ឋានពន្ធដារបានសម្រេចនូវសមិទ្ធផលល្អប្រសើរជាច្រើនជូនរាជរដ្ឋាភិបាលនិងប្រទេសជាតិជាពិសេសការសម្រេចបាននូវចំណូលលើសផែនការជាប់ជាប្រចាំនិងមានឆ្នាំខ្លះអត្រាកំណើនលើសផែនការរហូតដល់ ពីរខ្ទង់មានន័យថាលើសជាង 10%។ លោកអគ្គនាយករងបានសង្កត់ធ្ងន់ថា ការពង្រឹងអភិបាលកិច្ចល្អនេះកត្តាសំខាន់នៃភាពជោគជ័យរបស់អគ្គនាយកដ្ឋានពន្ធដារ។ ដូច្នេះត្រូវតែពង្រឹងអភិបាលកិច្ចល្អទ្វេទិសទាំងការពង្រឹងអភិបាលកិច្ចល្អនៃអគ្គនាយកដ្ឋានពន្ធដារទាំងការពង្រឹងអភិបាលកិច្ចល្អសាជីវកម្មនេះផ្នែកឯកជនសម្រេចបាននូវស្ថានភាពឈ្នះឈ្នះទាំងអស់គ្នា។ អគ្គនាយកដ្ឋានពន្ធដារមិនចង់ឃើញអ្នកជាប់ពន្ធធ្វើការបំពេញកាតព្វកិច្ចពន្ធមិនបានត្រឹមត្រូវដោយបង់ពន្ធខ្វះមានបញ្ជីគណនេយ្យ 2ឬ3 ហើយនៅពេលរដ្ឋបាលពន្ធដារធ្វើសវនកម្មរកឃើញនូវកំហុសឆ្គងដែលឈានទៅដល់ការផាកពិន័យក្រុមហ៊ុននោះទេគឺចង់បានក្រុមហ៊ុនមានការប្រកាសបង់ពន្ធដោយស្មោះត្រង់ជាពិសេសចង់ឃើញក្រុមហ៊ុនប្រកាសចំណេញ។ លោកប៉ែន សម្បត្តិ បានជម្រាបជូនអង្គសិក្ខាសាលាថា ពន្ធជាកាតព្វកិច្ចរបស់ប្រជាពលរដ្ឋគ្រប់រូបត្រូវបំពេញទៅតាមទង្វើនិងសកម្មភាពរបស់ខ្លួននីមួយៗដោយចៀសមិនរួចគ្រាន់តែការបង់ពន្ធនោះត្រូវធ្វើឡើងតាមរូបភាពប្រយោល(ពន្ធប្រយោល)ឬដោយត្រង់(ពន្ធផ្ទាល់)ប៉ុណ្ណោះ។ ប្រជាពលរដ្ឋក៏ដូចអ្នកជាប់ពន្ធត្រូវគិតថាការបង់ពន្ធគឺជាការចូលរួមចំណែកដល់ការវិនិយោគសម្រាប់អនាគតខ្លួនឯងផងសម្រាប់កូនចៅខ្លួនផងនិងសម្រាប់ប្រទេសជាតិមានការវិវត្តន៍រីកចម្រើនរុងរឿងផង។ ពន្ធដែលប្រមូលបាននេះរាជរដ្ឋាភិបាលតែងតែយកទៅចំណាយប្រកបដោយតម្លាភាពគណនេយ្យប្រសិទ្ធភាពនៅលើកិច្ចដំណើរការនៃក្រសួងស្ថាប័ននៃព្រះរាជាណាចក្រកម្ពុជានិងចូលរួមចំណែកដល់ការចំណាយលើការរដ្ឋានកំណែទម្រង់ទាំងឡាយរបស់រាជរដ្ឋាភិបាលសំដៅឲ្យកាន់តែប្រសើរឡើង៕ ដោយ៖កូឡាប