ភ្នំពេញ ៖ ស្នូរកាំភ្លើងបានផ្ទុះឡើងចំនួន៣ប្រាប់ផ្ទួនៗគ្នា បង្កអោយមានការភ្ញាក់ផ្អើលមួយកើតឡើងកាលពីវេលាម៉ោង១និង៤០នាទីយប់ រំលងអធ្រាត្រឈានចូលថ្ងៃទី២៨ ខែធ្នូ ឆ្នាំ២០១៧នេះ បន្ទាប់ពីមានជនមិនស្គាល់មុខមួយក្រុម ជិះរថយន្តពីរគ្រឿង មិនចាំម៉ាក មកឈប់នៅចំណុចមុខផ្ទះលីហួរវេរលុយ ផ្ទះលេខ៨៥ ផ្លូវ៥៩២ ក្នុងសង្កាត់បឹងកក់២ ខណ្ឌទួលគោក ហើយដកអាវុធបាញ់ រួចនាំគ្នាឡើងជិះរថយន្តគេចខ្លួនបាត់ស្រមោលនោះ។
បើតាមបុរសម្នាក់ដែលជាសាក្សីនៅកន្លែងកើតហេតុបានអោយដឹងថា នៅមុនកើតហេតុ គាត់បានជិះម៉ូតូមួយគ្រឿង បម្រុងបត់ចូលផ្ទះ ខណៈពេលនោះ រូបគាត់ក៏ឃើញបុរសមួយក្រុម ជិះរថយន្តពីរគ្រឿង មិនចាំម៉ាក ឈប់នៅចំណុចកើតហេតុខាងលើ មិនដឹងជាយ៉ាងមិចនោះទេ ស្រាប់តែបុរសម្នាក់ ក្នុងចំណោមជាច្រើននាក់ បានដកអាវុធបាញ់បីគ្រាប់ ធ្វើឲ្យរូបគាត់ភ័យបានជិះម៉ូតូឡប់ក្រោយវិញ។ ចំណែក ជនមិនស្គាល់មុខមួយក្រុមនោះ បាននាំគ្នាជិះរថយន្តបន្តដំណើរទៅមុខបាត់ស្រមោល បន្សល់សម្បកគ្រាប់នៅនឹងកន្លែងកើតហេតុចំនួនបីគ្រាប់។
ក្រោយកើតហេតុ សមត្ថកិច្ចមូលដ្ឋានបានចុះមកដល់ និងបានពិនិត្យនៅនឹងកន្លែងកើតហេតុ ពិតជាមានករណីផ្ទុះអាវុធបីគ្រាប់ពិតប្រាដកមែន ទើបសមត្ថកិច្ចប្រមូលយកសម្បកគ្រាប់ ទៅរក្សាទុកនៅប៉ុស្តិ៍នគរបាលសង្កាត់បឹងកក់២ ដើម្បីស្រាវជ្រាវបន្ត៕ ដោយ៖បញ្ញាស័ក្តិ
