ខេត្តព្រះសីហនុ៖ ភ្ញៀវទេសចរជាតិ-អន្តរជាតិ ដែលបានធ្វើដំណើរកម្សាន្តមកដល់ខេត្តព្រះសីហនុ និងចេញទៅកម្សាន្តនៅតាមបណ្ដាកោះមួយចំនួន នៅមុនឆ្លងឆ្នាំសកល ២០១៧-២០១៨ បានកោតសរសើរផែនការអភិវឌ្ឍ របស់រដ្ឋបាលខេត្តព្រះសីហនុ ជាពិសេសប្រតិបត្តិករទេសចរ ដែលបានរួមគ្នាបង្កើតតំបន់ឆ្នេរកម្សាន្តថ្មីៗ មានសោភ័ណភាពទាក់ទាញ សម្រាប់បម្រើដល់វិស័យទេសចរណ៍មានឈ្មោះថា «កោះឋានសួគ៌ ឆ្នេរភ្លោះកោះរ៉ុង»។
ចំណែកស្ថាបនិក បង្កើត ឆ្នេរ “កោះខានសួគ៌ឆ្នេរភ្លោះកោះរ៉ុង” ក៏ប្រកាសស្វាគន៍ភ្ញៀវទេចរនាឱកាសពិធីឆ្លងឆ្នាំសកល ២០១៧-២០១៨ ខាងមុខនេះដែរ ដោយអះអាងថា ឆ្នេរទើបបង្កើតថ្មីនេះ មានបរិស្ថានលក្ខណៈធម្មជាតិ សោភ័ណភាពមានអនាម័យល្អ មានសន្តិសុខសុវត្ថិភាព និងមានសម្ភារៈ ឬឧបរកណ៍ជាច្រើនប្រភេទ សម្រាប់ផ្តល់ជម្រើសជូនភ្ញៀវទេសចរ ដែលចូលមកសម្រាកលំហែកម្សាន្តនៅឆ្នេរមួយនេះ។
ប្រធានមន្ត្រីទេសចរណ៍ និងអភិបាលខេត្តព្រះសីហនុ បានគាំទ្រប្រតិបត្តិករទេសចរ ដែលបានរួមគ្នាបង្កើតតំបន់ឆ្នេរកម្សាន្តថ្មីៗឲ្យបានច្រើនកន្លែង ដើម្បីទាក់ទាញចំណាប់អារម្មណ៍ភ្ញៀវទេសចរជាតិអន្តរជាតិ ឲ្យចូលមកទស្សនាខេត្តនេះ ឲ្យបានកាន់តែច្រើននាថ្ងៃអនាគត។
ភ្ញៀវទេសចរចម្រុះជាតិសាសន៍ ពិសេសភ្ញៀវជាតិដែលធ្វើដំណើរទៅកម្សាន្តតាមបណ្ដាកោះមួយចំនួននាខេត្តព្រះសីហនុ នៅមុនពិធីឆ្លងឆ្នាំសកល ២០១៧-២០១៨ រួមមាន៖ ឆ្នេរឡុងសិត ឆ្នេរកោះរ៉ុងសន្លឹម ឆ្នេរកោះតូច និងឆ្នេរសុខសាន្ត ជាដើម បានបង្ហាញអារម្មណ៍ពេញចិត្តឆ្នេរកម្សាន្តទើបបង្កើតថ្មី មានឈ្មោះថា «កោះឋានសួគ៌ ឆ្នេរភ្លោះកោះរ៉ុង» ដែលប្រតិបត្តិករទេសចរខេត្តនេះរួមគ្នាអភិវឌ្ឍ បម្រើដល់វិស័យទេសចរណ៍។ ភ្ញៀវទេសចរទាំងនោះបានសរសើរថា ឆ្នេរមានអនាម័យល្អ ឆ្នេរធំទូលាយមានខ្សាច់សក្បុស និងសមុទ្រថ្លាឆ្លុះគួរជាទីគយគន់មិនចេះជិនណាយ។
ភ្ញៀវទេសចរមួយក្រុម មកពីរាជធានីភ្នំពេញ ដែលបានរួមដំណើរជាមួយក្រុមគ្រួសារទៅកម្សាន្តតាមកោះនានា ហើយចុងក្រោយ បានចូលទៅសម្រាកកម្សាន្តនៅលើ «កោះឋានសួគ៌ឆ្នេរភ្លោះកោះរ៉ុង» កាលពីសប្តាហ៍មុននេះ បានកោតសរសើរការថែរក្សាបរិស្ថាននៅតាមឆ្នេរកោះឋានសួគ៌ ថាមានអនាម័យល្អ និងមានសោភ័ណភាពស្រស់ត្រកាល សមជាមួយការដាក់ឈ្មោះឆ្នេរនេះ ថាជា «កោះឋានសួគ៌»។
ភ្ញៀវទេសចរក្រុមនេះ បានផ្តល់សម្ភាសដល់អ្នកយកព័ត៌មាន CEN.COM.KH ដែលចុះទៅដល់ឆ្នេរកោះឋានសួគ៌ក្នុងទឹកមុខរីករាយ និងសម្ដីមួយៗថា បរិស្ថាននៅជុំវិញឆ្នេរទើបអភិវឌ្ឍថ្មីនេះមានឆ្នេរធំទូលាយ មានខ្សាច់សក្បុស មានទឹកថ្លាឆ្លុះ និងហ៊ុមព័ទ្ធដោយចម្ការដូង ផ្កាភ្ញីចម្រុះពណ៌ ព្រៃកោងកាង និងព្រៃឈើធម្មជាតិមានពណ៌ខៀវស្រងាត់។
ភ្ញៀវទេសចរដែលមានសម្រស់ស្រស់ឆើតឆាយរូបនេះ ហាក់មានការយល់ដឹងខ្ពស់ជុំវិញការងារថែរក្សាបរិស្ថាន និងអនាម័យនៅតាមឆ្នេរ ដោយស្នើឲ្យភ្ញៀវទេសចរទាំងអស់ដែលចូលទៅទស្សនាកោះឋានសួគ៌ ឆ្នេរភ្លោះកោះរ៉ុង ឲ្យជួយថែរក្សាបរិស្ថានឆ្នេរជាមួយប្រតិបត្តិករទេសចរបង្កើតតំបន់ឆ្នេរកម្សាន្តនេះ ឲ្យមានអនាម័យល្អជារៀងរហូត ដោយត្រូវវេចខ្ចប់កាកសំណល់សល់ពីការទទួលទានឲ្យបានត្រឹមត្រូវ និងទុកដាក់ឲ្យមានរបៀបរៀបរយ នៅទីតាំងទុកដាក់សំរាមនីមួយៗ។
ចំណែកភ្ញៀវទេសចរមួយក្រុមទៀត ដែលអះអាងថា ជាអាជីវករលក់ដូរសម្លៀកបំពាក់ស្ត្រី នៅផ្សារទួលទំពូង នៅរាជធានីភ្នំពេញ ដែលបានធ្វើដំណើរកម្សាន្តនៅតាមបណ្ដាកោះមួយចំនួននាខេត្តព្រះសីហនុ កាលពីថ្ងៃទី២៤ ខែធ្នូ ឆ្នាំ២០១៧ ដើម្បីអបអរមុនពិធីឆ្លងឆ្នាំសកល ២០១៧-២០១៨ នឹងចូលមកដល់ ពួកគេក៏គាំទ្រស្ថាបនិកអភិវឌ្ឍ «កោះឋានសួគ៌» ដែលបានរួមគ្នាបង្កើតឆ្នេរកម្សាន្តថ្មី ថាការពារបរិស្ថានឆ្នេរបានល្អ និងថែរក្សាសោភ័ណភាពឆ្នេរមានអនាម័យ គួរជាទីគយគន់សម្រាប់ភ្ញៀវទេសចរជាតិ និងអន្តរជាតិ ដែលចូលមកដល់ឆ្នេរនេះ។
ភ្ញៀវទេសចរទាំងអស់ ដែលស្ថិតក្នុងចំណោមសាច់ញាតិ ឬមិត្តភ័ក្ដិជាច្រើនក្នុងក្រុមនេះ បានបង្ហាញទឹកមុខរីករាយពេលបានមកឃើញទិដ្ឋភាពបរិស្ថាន«កោះឋានសួគ៌» ឆ្នេរមានអនាម័យ និងបរិស្ថានឆ្នេរមានសោភ័ណភាពគួរឲ្យចង់គយគន់ និងបន្តស្នាក់នៅរយៈពេលវែង។ បន្ថែមលើនេះ ប្រតិបត្តិករទេសចរនៅលើឆ្នេរនេះ ចេះឆ្នៃប្រឌិត សំណង់បឹងកាឡូ ឬផ្ទះសម្រាប់ជួលស្នាក់នៅ ឲ្យមានភាពធំទូលាយ មានបរិស្ថានល្អ ព្រមទាំងមានដាំផ្កាតាមសួនច្បារ នៅជុំវិញទីតាំងស្នាក់នៅប្រកបដោយសោភ័ណភាព ហើយមានផ្ការីកស្កុះស្គាយ គួរជាទីគយគន់ថែមទៀត។
ភ្ញៀវទេសចរមួយរូប ដែលមានសម្រស់ស្រស់ឆើតឆាយ និងមានសម្ដីរួសរាយរាក់ទាក់ ស្នើមិនបញ្ចេញឈ្មោះ តាមរយៈ CEN.COM.KH បានអំពាវនាវដល់ភ្ញៀវទេសចរជាតិ និងអន្តរជាតិ ឲ្យងាកមកចាប់អារម្មណ៍ និងចូលមកទស្សនា «កោះឋានសួគ៌ ឆ្នេរភ្លោះកោះរ៉ុង» មានទីតាំងនៅចុងបំផុត នៃកោះរ៉ុង ឲ្យច្រើនកុះករថែមទៀត ព្រោះឆ្នេរទើបអភិវឌ្ឍថ្មីនេះ មានបរិស្ថានអនាម័យល្អ និងមានលក្ខណៈធម្មជាតិ។
ភ្ញៀវទេសចរមួយចំនួន បានអួតសរសើរថា នៅលើ«កោះឋានសួគ៌»នេះ ក៏មានប្រភេទឧបករណ៍ជាជម្រើសកម្សាន្ត ដែលប្រតិបត្តិករ ឬម្ចាស់ឆ្នេរ បានផ្តល់ជូនភ្ញៀវទេសចរមានដូចជា ការចុះងូតទឹកកម្សាន្តតាមឆ្នេរខ្សាច់សក្បុស ជិះម៉ូតូទឹក អុំទូកតូចៗប្រណាំងគ្នាតាមដៃព្រែក និងឆ្នេរសមុទ្រ មានដុះដើមកោងកាងអមដោយព្រៃឈើធម្មជាតិ និងមានផ្ទាំងថ្មធំៗជាដើម។
ពួកគេម្នាក់ៗស្នើដល់ភ្ញៀវទេសចរទាំងអស់ ដែលចូលមកទស្សនាកម្សាន្តកោះឋានសួគ៌ ឆ្នេរភ្លោះកោះរ៉ុង ត្រូវចូលរួមថែរក្សាអនាម័យបរិស្ថានឆ្នេរនេះឲ្យបានល្អជាមួយស្ថាបនិកអភិវឌ្ឍន៍ឆ្នេរកម្សាន្តមួយនេះ ឲ្យមានអនាម័យឲ្យបានទាំងអស់គ្នា ដើម្បីរក្សាឆ្នេរសមុទ្រធម្មជាតិមួយនេះឲ្យមានបរិស្ថាន និងសោភ័ណភាពស្រស់បំព្រងរហូតនាថ្ងៃអនាគត។
ភ្ញៀវទេសចរច្រើនទៀត ដែលបានសម្រាកមួយយប់ កាលពីចុងសប្តាហ៍កន្លងទៅនេះ នៅតំបន់ឆ្នេរកម្សាន្តកោះឋានសួគ៌ ឆ្នេរភ្លោះកោះរ៉ុង ក៏បានស្នើឲ្យប្រតិបត្តិករ ឬម្ចាស់ទីតាំងវិនិយោគតំបន់កម្សាន្តមួយនេះ ត្រូវកំណត់ស្តង់ដារនៃតម្លៃសេវាស្នាក់នៅ និងសេវាម្ហូបអាហារ ជូនភ្ញៀវទេសចរឲ្យបានសមរម្យ ដោយមិនត្រូវឆ្លៀតដំឡើងថ្លៃតាមទំនើងចិត្តនៅពេលថ្ងៃមានបុណ្យទានធំៗចូលមកដល់ ដូចប្រតិបត្តិករ លក់ដូរនៅតាមតំបន់កម្សាន្តដទៃទៀតនាខេត្តព្រះសីហនុ ធ្លាប់កំណត់តម្លៃខ្ពស់កក់ពពកនារដូវមានបុណ្យទានធំៗចូលមកដល់នោះទេ។
ទាក់ទិនបញ្ហានេះ លោក យន្ត មីន អភិបាលខេត្តព្រះសីហនុ ក៏បានស្នើដល់ប្រតិបត្តិករទេសចរ មន្ត្រីរាជការ ប្រជាពលរដ្ឋ ក៏ដូចជាភ្ញៀវទេសចរជាតិ និងអន្តរជាតិ ត្រូវរួមសហការគ្នាអភិវឌ្ឍមណ្ឌលកម្សាន្ត ឬបង្កើតទីតាំងទេសចរណ៍ ឬតំបន់កម្សាន្តថ្មីៗនាមូលដ្ឋាននេះ ឲ្យបានច្រើនទីតាំងថែមទៀត សម្រាប់ផ្តល់ជម្រើសកម្សាន្តជូនភ្ញៀវទេសចរនាថ្ងៃអនាគត។
យ៉ាងណាក៏ដោយចុះ លោក យន្ត មីន រំពឹងថា កំណើនភ្ញៀវទេសចរនឹងកើនខ្ពស់ពីមួយឆ្នាំទៅមួយឆ្នាំ នៅគ្រាខេត្តជាប់ឆ្នេរសមុទ្រមួយនេះមានទីកន្លែងកម្សាន្ត មានបរិស្ថានអនាម័យ និងឆ្នេរមានសោភ័ណភាពល្អ គួបផ្សំប្រតិបត្តិករបានកំណត់តម្លៃសេវាស្នាក់នៅ និងសេវាម្ហូបអាហារជាដើមមានតម្លៃសមរម្យ ជាពិសេសខេត្តជាប់ឆ្នេរសមុទ្រមួយនេះ មានការអភិវឌ្ឍគ្រប់វិស័យ និងមានសន្តិសុខសុវត្ថិភាពល្អ ផ្តល់ជូនដល់ភ្ញៀវទេសចរ ដែលចូលមកទស្សនាខេត្តនេះ។
លោកស្នើដល់ភ្ញៀវទេសចរដែលចូលមកកម្សាន្តតាមឆ្នេរនានានៅខេត្តព្រះសីហនុ រួមមាន៖ កោះឋានសួគ៌ ឆ្នេរភ្លោះកោះរ៉ុង ជាដើម ត្រូវរួមគ្នាថែរក្សាអនាម័យបរិស្ថាននៅតាមឆ្នេរនីមួយៗឲ្យបានទាំងអស់គ្នា និងជាប្រចាំ ដោយមិនត្រូវបោះចោលកាកសំណល់ ឬសំរាមសល់ពីអាហារទទួលទានរបស់ខ្លួននៅតាមទីសាធារណៈ ឬនៅតាមតំបន់ឆ្នេរគ្មានសណ្ដាប់ធ្នាប់ដូចគ្នាភ្ញៀវទេសចរភាគច្រើនបានប្រព្រឹត្តនាពេលកន្លងមកទៀតទេ។
ទាក់ទិនបញ្ហានេះ លោក ជី ឈុនលាង អ្នកទទួលមើលការខុសត្រូវនៅលើ «កោះឋានសួគ៌ ឆ្នេរភ្លោះកោះរ៉ុង» ផ្តល់សម្ភាសឲ្យអ្នកយកព័ត៌មាន CEN.COM.KH ប្រចាំខេត្តព្រះសីហនុដឹងថា សេវាបម្រើទាំងការស្នាក់នៅ និងម្ហូបអាហារ គឺពួកគេបានកំណត់តម្លៃប្រហាក់ប្រហែលគ្នានឹងតម្លៃអាហារទទួលទាននៅលើទីផ្សារលើដីគោកដែរ។ បន្ថែមលើនេះ រាល់ការជិះទូកកម្សាន្តតាមព្រែក ឬតាមឆ្នេរសមុទ្រ ឧបករណ៍តន្ត្រីចាក់រាំកម្សាន្តនាពេលរាត្រីក្តី គឺគឺមានឧបករណ៍មួយចំនួន ពួកគេមិនគិតថ្លៃសេវាពីភ្ញៀវទេសចរទេ។
លោក ឈុនលាង បន្តថា តម្លៃម្ហូបអាហារដែលភ្ញៀវកុម្ម៉ង់ធ្វើភ្លាមៗនៅ «កោះឋានសួគ៌ ឆ្នេរភ្លោះកោះរ៉ុង»នេះ គឺមិនលក់កោរភ្ញៀវទេសចរ ដូចនៅទីតាំងឆ្នេរផ្សេងនោះទេ ទោះថ្ងៃធម្មតា ឬថ្ងៃមានពិធីបុណ្យជាតិធំៗក្តី គឺរក្សាតម្លៃថេរធម្មតា។ ពិសេសជាងនេះ សម្រាប់ភ្ញៀវទេសចរដែលនាំយកអាហារហូបចុកមកតាមខ្លួន ពួកគាត់បានផ្តល់តុអង្គុយ និងផ្តល់ជូនសម្ភារផ្សេងៗទៀតដូចជា ចាន ស្លាបព្រាជាដើម សម្រាប់ការទទួលទាន និងសម្រាកកម្សាន្តនៅតាមឆ្នេរសមុទ្រ ដោយមិនគិតតម្លៃសេវានេះពីភ្ញៀវទេសចរនោះទេ។
លោក ឈុនលាង ឲ្យដឹងថា ជម្រើសកម្សាន្តជាច្រើនប្រភេទសម្រាប់ផ្តល់ជូនភ្ញៀវទេសចរដែលចូលមកកម្សាន្តនៅតំបន់ឆ្នេរកោះឋានសួគ៌ មានដូចជា៖ ភ្ញៀវ ជិះម៉ូតូទឹកកម្សាន្តតាមសមុទ្រ អាចចែវទូកកម្សាន្ត មើលព្រៃកោងកាងតាមដងព្រែក តាមឆ្នេរសមុទ្រ ជិះទូកស្ទូចត្រីកម្សាន្ត ព្រមទាំងមានឧបករណ៍ជាច្រើនប្រភេទទៀតសម្រាប់ជម្រើសកម្សាន្ត របស់ភ្ញៀវទេសចរ ដែលចូលមកដល់កោះឋានសួគ៌ ដោយជួលក្នុងតម្លៃសមរម្យ និងមានឧបរកណ៍ខ្លះមិនយកលុយពីភ្ញៀវនោះទេ។ ជាងនេះទៀត ក៏មានកម្មវិធីចាក់ភ្លេងជូនភ្ញៀវរាំច្រៀងកម្សាន្តនៅពេលរាត្រី ដោយម្ចាស់ទីតាំងនេះមានឧបករណ៍ប្រគំតន្ត្រីសម័យរង់ចាំបម្រើតាមតម្រូវការ ហើយមិនគិតថ្លៃសេវាពីភ្ញៀវថែមទៀត។
លោក ឧកញ៉ា ទៀ វិចត្រ អគ្គនាយកក្រុមហ៊ុនកប៉ាល់ ឬអូប័រដឹកភ្ញៀវទេសចរ ជី.ធី.វី.ស៊ី (G.T.V.C) និងជាស្ថាបនិកផ្ដួចផ្ដើមអភិវឌ្ឍបង្កើតឲ្យមានតំបន់ឆ្នេរកម្សាន្តថ្មីមានឈ្មោះថា «កោះឋានសួគ៌ ឆ្នេរភ្លោះកោះរ៉ុង» ដែលភ្ញៀវទេសចរកំពុងចាប់អារម្មណ៍នាខេត្តព្រះសីហនុ។ លោកឧកញ៉ា បានផ្តល់សម្ភាសតាមបណ្តាញសង្គម Messenger ដល់អ្នកយកព័ត៌មាន CEN.COM.KH ប្រចាំខេត្តព្រះសីហនុដឹងថា នឹងបង្កើតទីកន្លែងលំហែកម្សាន្តឲ្យបានច្រើនថែមទៀត ព្រមទាំងបង្កើតឲ្យមានឧបករណ៍ច្រើនប្រភេទទុកសម្រាប់ផ្តល់ជម្រើសកម្សាន្ត ឬជម្រើសសប្បាយរីករាយជូនភ្ញៀវទេសចរ ដែលនឹងចូលមកទស្សនាឆ្នេរទើបអភិវឌ្ឍថ្មីនេះ ឲ្យសម្បូរបែបក្នុងរយៈពេលដ៏ខ្លីខាងមុខ ឬនៅមុនពិធីបុណ្យចូលឆ្នាំប្រពៃណីជាតិខ្មែរ នឹងចូលមកដល់នាថ្ងៃខាងមុខ។
លោកឧកញ៉ា ទៀ វិចិត្រ ដែលជាប្រធានសមាគមដឹកជញ្ជូនទេសចរណ៍ប្រចាំខេត្តព្រះសីហនុផងនោះ បានធានាថា ក្នុងនាមជាអ្នករួមបង្កើតឆ្នេរកម្សាន្តកោះឋានសួគ៌នេះ នឹងខិតខំថែរក្សាបរិស្ថាននៅតាមឆ្នេរ និងព្រែកនានាឲ្យមានអនាម័យល្អ ព្រមទាំងថែរក្សាបរិស្ថានព្រៃឈើធម្មជាតិ និងដាំដើមកោងកាង លែងត្រីសមុទ្រប្លែកៗ និងជិតផុតពូជ ចូលទៅក្នុងព្រែក និងសមុទ្រ ដើម្បីផ្តល់ជូនភ្ញៀវទេសចរដែលនឹងចូលមកទស្សនាតំបន់នេះអាចមុជទឹកទស្សនាត្រី ក្រោមបាតសមុទ្រតាមឆ្នេរនេះនាថ្ងៃអនាគត។
ចំពោះការងារថែរក្សាបរិស្ថានឆ្នេរ លោកឧកញ៉ា ទៀ វិចិត្រ ស្ថាបនិកអភិវឌ្ឍន៍កោះឋានសួគ៌ បានអះអាងថា ក្រុមហ៊ុន ជី.ធី.វី.ស៊ី របស់លោក បានបង្កើតឲ្យមានក្រុមការងារដើរសម្អាតរើសសំរាម ឬសម្អាតអនាម័យបរិស្ថាននៅតាមឆ្នេរជារៀងរាល់ថ្ងៃ និងពង្រាយកម្លាំងយាមរង់ចាំការពារសុវត្ថិភាពសន្តិសុខជូនភ្ញៀវទេសចរដោយយកចិត្តទុកដាក់។
លោកឧកញ៉ា ទៀ វិចិត្រ បញ្ជាក់ថា ចាប់តាំងពីការបង្កើត ឬអភិវឌ្ឍឆ្នេរកម្សាន្តកោះឋានសួគ៌ ឆ្នេរភ្លោះកោះរ៉ុងកាលពីឆ្នាំ២០១៦ មក គឺឆ្នេរកម្សាន្តមួយនេះមិនដែលកើតមានចោរកម្ម និងបញ្ហាផ្សេងៗនាំឲ្យប៉ះពាល់ដល់អារម្មណ៍ភ្ញៀវទេសចរមានការភ័យខ្លាចម្តងណាទេ ជាពិសេសមិនអនុញ្ញាតឲ្យមានអ្នកប្រើប្រាស់ ឬជួញដូរគ្រឿងញៀននៅលើទីតាំងនេះជាដាច់ខាត ដោយពង្រាយកម្លាំងឃ្លាំមើលជាប្រចាំ។
ចំណែក លោកស្រី ស៊ុយ ស្រីមុំ អគ្គនាយកក្រុមហ៊ុនដឹកភ្ញៀវទេសចរចេញទៅកម្សាន្តតាមកោះ មានឈ្មោះថា អាយលែន ស្ពីដហ្វឺរី ខេមបូឌា ( Island Speed Ferry Cambodia)ដែលជាស្ថាបនិករួមគ្នាអភិវឌ្ឍ «កោះឋានសួគ៌ ឆ្នេរភ្លោះកោះរ៉ុង» ម្នាក់ដែរ បានឲ្យដឹងថា ភ្ញៀវទេសចរដែលចង់ធ្វើដំណើរទៅកាន់កោះនេះ អាចធ្វើដំណើរតាម រយៈ ក្រុមហ៊ុន អាយលែន ស្ពីដហ្វឺរី ខេមបូឌា ( Island Speed Ferry Cambodia) មានតម្លៃសមរម្យ ហើយមានកប៉ាល់ និងទូកធំៗ បំពាក់ម៉ាស៊ីនត្រជាក់ រង់ចាំបំរើសេវាដឹកភ្ញៀវទៅកាន់ទីតាំងកម្សាន្តមួយនេះជារៀងរាល់ថ្ងៃ និងមានសុវត្ថិភាពខ្ពស់។ លោកស្រីបន្តថា ទាំងអាហារទទួលទាន និងបឹងកាឡូកោះឋានសួគ៌ ឬផ្ទះស្នាក់នៅលើកោះនេះ គឺមានតម្លៃសមរម្យ និងមានសន្តិសុខសុវត្ថិភាពសម្រាប់ភ្ញៀវទេសចរទាំងយប់ថ្ងៃ។
យ៉ាងណាក៏ដោយចុះ លោក តាំង សុចិត្រគ្រឹស្នា ប្រធានមន្ទីរទេសចរណ៍ខេត្តព្រះសីហនុ បានស្នើដល់វិស័យឯកជន ឬប្រតិបត្តិករទេសចរទាំងអស់នាមូលដ្ឋាននេះ ឲ្យបង្កើនគុណភាពសេវាកម្មទេសចរណ៍របស់ខ្លួនឲ្យមានគុណភាព ដោយត្រូវកំណត់តម្លៃសេវាឲ្យបានសមរម្យ មិនត្រូវលក់កោរភ្ញៀវ និងបើកធ្វើអាជីវកម្ម ត្រូវសុំការអនុញ្ញាតច្បាប់ឲ្យបានត្រឹមត្រូវពីស្ថាប័នជំនាញពាក់ព័ន្ធ។
ឆ្នេរសមុទ្រខេត្តព្រះសីហនុ មានប្រវែងជាង ១៧១គីឡូម៉ែត្រ (១៧១.៣៥គីឡូម៉ែត្រ) មានខ្សាច់សស្អាត ទឹកសមុទ្រថ្លាឆ្លុះ ឆ្នេររាក់ ទឹកធ្លាក់ មច្ឆាសមុទ្រ ផ្កាថ្ម ឧទ្យានជាតិ និងមានកោះចំនួន៣២ មានជីវចម្រុះធម្មជាតិស្រស់ស្អាត ជាសក្ដានុពលក្នុងការអភិវឌ្ឍវិស័យទេសចរណ៍ នៅក្នុងព្រះរាជាណាចក្រកម្ពុជា៕ ដែន សីមា
