ខេត្តព្រះសីហនុ ៖ ថ្នាក់ដឹកនាំរដ្ឋបាលខេត្តព្រះសីហនុ ទទួលជួប លោក តឹង អ៊ីងគ័ង ប្រធានធនាគារខេត្តជាំងស៊ី បានដឹកនាំគណៈប្រតិភូខេត្ត ចូលជួបសំដែងការគួរសមជាមួយ អភិបាលខេត្តព្រះសីហនុ នៅសាលប្រជុំសាលាខេត្តព្រះសីហនុ ដើម្បីស្វែងយល់អំពីសក្តានុពលវិនិយោគ នាព្រឹកថ្ងៃទី១២ ខែមិថុនា ឆ្នាំ២០១៩។
លោក យន្ត មីន អភិបាលខេត្តព្រះសីហនុ បានជំរាបជូនពីសក្តានុពល របស់ខេត្តព្រះសីហនុ មានដូចជា៖ វិស័យកសិកម្ម , ឧស្សាហកម្ម, ពាណិជ្ជកម្ម និងទេសចរណ៍ ជាវិស័យគោលដៅក្នុងការអភិវឌ្ឍសេដ្ឋកិច្ចខេត្ត។
លោកបន្តថា មូលដ្ឋានខេត្តព្រះសីហនុ មានកំពង់ផែទឹកជ្រៅ តំបន់សេដ្ឋកិច្ចពិសេស, ព្រលានយន្តហោះអន្តរជាតិ, តំបន់ឆ្នេរ និងកោះ ៣៣ ជាមរតកធម្មជាតិ ដ៏មានតម្លៃ ដែលរាជរដ្ឋាភិបាលចាត់ទុក នឹងប្រែក្លាយខេត្តព្រះសីហនុ ទៅជាតំបន់សេដ្ឋកិច្ចគំរូពហុបំណង ស្របតាមគោលនយោបាយអភិវឌ្ឍន៍វិស័យឧស្សាហកម្មកម្ពុជាឆ្នាំ២០១៥ -២០២៥ ។
លោក យន្ត មីន អភិបាលខេត្ត ព្រះសីហនុ បន្តថា វិស័យអទិភាពឈានមុខគេ ក្នុងការអភិវឌ្ឍខេត្តនាពេលបច្ចុប្បន្នគឺមានទី១- កំពង់ផែសមុទ្រអន្តរជាតិក្រុងព្រះសីហនុ ក្នុងការដឹកជញ្ជូនតាមផ្លូវសមុទ្រ ជាលក្ខណៈជាតិ និងអន្តរជាតិ ដែលមានទំនិញជាកុងតឺន័រ ចេញ-ចូលប្រមាណ ៧៣ភាគរយ នៃបរិមាណទំនិញនាំចេញ-ចូលទូទាំងប្រទេស ។ ទី២- ព្រលានយន្តហោះអន្តរជាតិខេត្តព្រះសីហនុ នាពេលបច្ចុប្បន្ន បាននឹងកំពុងប្រតិបត្តិការ មានក្រុមហ៊ុនអាកាស ចរណ៍ចំនួន១០ មានជើងហោះហើរចំនួន ១៣៣ជើងក្នុងមួយសប្តាហ៍ ហោះហើរទៅកាន់អន្តរជាតិ មាន ៩១ជើងក្នុងមួយសប្តាហ៍។ ទី៣ – តំបន់សេដ្ឋកិច្ចពិសេស បានដើរតួរនាទីយ៉ាងសំខាន់ ក្នុងការលើកកម្ពស់សេដ្ឋកិច្ច បង្កើនការងារជូនប្រជាពលរដ្ឋឲ្យមានការងារធ្វើថែមទៀតផង។
លោក យន្ត មីន ឲ្យដឹងដូច្នេះ រួចបញ្ជាក់ថា ខេត្តព្រះសីហនុ មានតំបន់សេដ្ឋកិច្ចពិសេសចំនួន៥ កំពុងដំណើរការ និងមានរោងចក្រធំ តូចសរុប ២១៩កន្លែង, សិប្បកម្ម អាជីវកម្មខ្នាតតូច និងមធ្យមមាន ១.០៣៧កន្លែង និងសេវាកម្មផ្សេងៗទៀត ស្រូបយកកម្លាំងពលកម្មសរុប ៨១.៤៧៥នាក់។ ស្រី ៣៨.៦៥២ នាក់ ក្នុងនោះទុនវិនិយោគក្នុងវិស័យឧស្សាហកម្ម មានចំនួន ៨ពាន់លានដុល្លារអាមេរិក និងធានាសន្តិសុខ សុវត្ថិភាពជូនអ្នកវិនិយោគនៅខេត្តព្រះសីហនុ។
នាឱកាសនោះដែរ លោក តឹង អ៊ីងគ័ង ប្រធានធនាគារខេត្តជាំងស៊ី មានប្រសាសន៍ថា គណៈប្រតិភូមានគោលបំណងស្វែងយល់ពីសក្តានុពល និងការវិនិយោគនៅខេត្តព្រះសីហនុ។ ហើយថា ក្រុមហ៊ុនវិនិយោគ របស់លោកចង់មកធ្វើ ការវិនិយោគលើវិស័យធនគារ និងសំណង់នៅខេត្តព្រះសីហនុ។
ព្រមជាមួយគ្នានេះ គណៈប្រតិភូចិន ក៏បានកោតសរសើរចំពោះ លោកអភិបាលខេត្តព្រះសីហនុ ដែលបានដឹកនាំខេត្តនេះ មានការអភិវឌ្ឍរីកចម្រើនយ៉ាងឆាប់រហ័ស ក្នុងរយៈពេលប៉ុន្មានឆ្នាំចុងក្រោយនេះ។ លោកថា បច្ចុប្បន្ននេះឃើញមានអ្នកវិនិយោគគិនជាច្រើន ជាពិសេសអ្នកវិនិយោគទុនជនជាតិចិន បានចូលមកកាន់ខេត្តព្រះសីហនុ យ៉ាងគំហុក ហើយសង្ឃឹមថា និងមានអ្នកវិនិយោគគិនចិនច្រើនទៀត នឹងបន្តមកកាន់ខេត្តព្រះសីហនុជាបន្តទៀត។
លោក តឹង អ៊ីងគ័ង ក៏បានសន្យា ជួយផ្សព្វផ្សាយពីសក្តានុពល របស់ខេត្តព្រះសីហនុ ដល់វិនិយោគខេត្តជាំងស៊ី ឲ្យមកកាន់ខេត្តព្រះសីហនុបន្តទៀត៕ ដោយ ៖ ដែន សីមា
