ខេត្តព្រះសីហនុ៖ សមត្ថកិច្ចបានផ្តល់ព័ត៌មានបឋមថា មានអាគារកំពុងសង់ថ្មីមួយកន្លែងកំពស់៧ជាន់ មានទីតាំងនៅជិតកន្លែងលាងរថយន្តអារុណរះ ស្ថិតក្នុងសង្កាត់លេខ៤ ក្រុងព្រះសីហនុ បានបាក់រលំនៅវេលាម៉ោងជិត ៥ព្រឹកថ្ងៃទី២២ ខែមិថុនា ឆ្នាំ២០១៩នេះ។
សមត្ថកិច្ចបន្តថា ក្នុងនោះកន្លែងលាងរថយន្តអារុណរះ ក៏ទទួលរងផលប៉ះពាល់ និងរងការខូចខាតរថយន្ត និងទ្រព្យសម្បត្តិមួយចំនួនពីការបាក់រលំអាគារនេះដែរ។
សេចក្តីរាយការណ៍បឋមពីកន្លែងកើតហេតុបញ្ជាក់ថា មានមនុស្សមួយចំនួន ភាគច្រើនជាកម្មករបានជាប់ក្នុងគំនរអាគាររំបាក់នោះ ប៉ុន្តែភ្លាមៗមិនទាន់ដឹងពីចំនួនពិតប្រាកដ ឬមានអ្នកស្លាប់ និងរបួសចំនួនប៉ុន្មាននាក់នៅឡើយទេ។
ករណីនេះសមត្ថកិច្ច និងក្រុមសង្គ្រោះកំពុងអន្តរាគមន៍ដោយយកចិត្តទុកដាក់។
សេចក្តីរាយការណ៍ការបន្ថែមពីហេតុការបាក់ស្រុតអាគារ នៅក្រុងព្រះសីហនុនេះ នឹងរាយការជូនពិស្តារនៅពេលក្រោយទៀត៕ ដែន សីមា
