ថ្លែងក្នុងកិច្ចប្រជុំថ្នាក់ដឹកនាំក្រសួង លោកទេសរដ្ឋមន្ត្រី ស៊ុន ចាន់ថុល បានជំរុញឱ្យមន្ត្រីក្រោមឱវាទលើកិច្ចការងារថែទាំផ្លូវស្ពានដែលត្រូវដល់អាយុ និងរៀបចំលិខិតបទដ្ឋានអនុវត្តការងារដឹកជញ្ជូន និងការអភិវឌ្ឍហេដ្ឋារចនាសម្ព័ន្ធតភ្ជាប់ បន្ថែមលើការរៀបចំផែនការមេភស្តុភារកម្មកម្ពុជា។
ថ្ងៃពុធ ៩រោច ខែជេស្ឋ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២៦ ខែមិថុនា ឆ្នាំ២០១៩ នៅទីស្តីការក្រសួងសាធារណការ និងដឹកជញ្ជូន ឯកឧត្ដមទេសរដ្ឋមន្ត្រី ស៊ុន ចាន់ថុល បានដឹកនាំកិច្ចប្រជុំថ្នាក់ដឹកនាំក្រសួង ដោយមានការចូលរួមពីមន្ត្រីរាជការក្រសួង និងមន្ត្រីអង្គភាពក្រោមឱវាទ។
កិច្ចប្រជុំនេះផ្តោតជាសំខាន់លើការប្រមូលធាតុចូលពីបណ្តាអង្គភាពពាក់ព័ន្ធនានាដាក់ចូលទៅក្នុងផែនការមេថ្នាក់ជាតិស្តីពីការដឹកជញ្ជូនភស្តុភារកម្ម ការពិនិត្យឡើងវិញវិធានការ និងនីតិវិធីសាងសង់ផ្លូវឱ្យបានរឹងមាំ។
លោកទេសរដ្ឋមន្ត្រី បានស្នើឱ្យបញ្ចូលក្នុងផែនការមេថ្នាក់ជាតិនូវគម្រោងផ្លូវសាងសង់ពីខេត្តកំពង់ឆ្នាំង ទៅខេត្តកំពង់ធំដែលទទួលបានការឯកភាពពីសម្តេចនាយករដ្ឋមន្ត្រីរួចហើយ គម្រោងសិក្សាសាងសង់ផ្លូវ ប៉ូលសេដ្ឋកិច្ចរវាងខេត្តសៀមរាប និងបាត់ដំបងដែលមានផលប្រយោជន៍ច្រើន គម្រោងសាង់សង់ផ្លូវដែក ពីភ្នំពេញទៅបាវិត និងផែនការមេកំពង់ផែក្រុងព្រះសីហនុផងដែរ។
លោកទេសរដ្ឋមន្ត្រីបានស្នើឱ្យមន្ត្រីក្រោមឱវាទទាំងអស់ និងក្រុមការងារបច្ចេកទេសសាងសង់ផ្លូវពិនិត្យឡើងវិញនូវវិធានការ និងនីតិវិធីសាងសង់ឱ្យបានម៉ត់ចត់ ជាពិសេសផ្លូវជាតិលេខ៧ និងផ្លូវជាតិលេខ៣ និងគម្រោងសាងសង់ផ្លូវកំពុងអនុវត្តនានា ធ្វើយ៉ាងណាឱ្យគុណភាពផ្លូវមានភាពរឹងមាំ ប្រើប្រាស់ជាប់បានយូរស្របតាមស្តង់ដាដែលអាចទទួលយកបាន។
ឆ្លៀតក្នុងឱកាសនោះផងដែរ លោកទេសរដ្ឋមន្ត្រី បានជំរុញឱ្យមន្ត្រីក្រសួងទាំងអស់ ក៏ដូចជាប្រជាពលរដ្ឋដោនឡូតកម្មវិធីថែទាំផ្លូវ ROAD CARE Mobile App ដើម្បីប្រើប្រាស់ក្នុងការរាយការណ៍ផ្លូវជង្ហុកសំបុកមាន់ និងផ្លូវខូច និងបានណែនាំឱ្យប្រធានមន្ទីរទាំង២៥រាជធានី-ខេត្តទាំងអស់ ប្រកបដោយទំនួលខុសត្រូវចំពោះបណ្តាញផ្លូវថ្នល់ដែលឋិតនៅក្នុងដែនសមត្ថកិច្ចរបស់ខ្លួនមិនថាផ្លូវនោះជាផ្លូវរបស់ក្រុមហ៊ុន ឬស្ថាប័នណាជាអ្នកសាងសង់ទេ។
ជាមួយគ្នានេះផងដែរ លោកទេសរដ្ឋមន្ត្រី ក៏បានជំរុញឱ្យក្រុមការងារត្រួតពិនិត្យរឹតបន្តឹងការអនុវត្តច្បាប់ស្តីពីចរាចរណ៍ផ្លូវគោកនៅគោលដៅដើមទីក្នុងកំពង់ផែស្វយ័តភ្នំពេញ និងកំពង់ផែស្វយ័តក្រុងព្រះសីហនុចាត់វិធានការតឹងរឹង និងពិនិត្យលទ្ធភាពឈានទៅរកការបិទអាជីវកម្មក្រុមហ៊ុនដឹកជញ្ជូនទំនិញធុនធ្ងន់ទាំងឡាយណាដែលចេញចូលកំពង់ផែស្វយ័តទាំងនេះ មិនអនុវត្តតាមការណែនាំ កែច្នៃយានយន្តខុសលក្ខណៈបច្ចេកទេស ធ្វើឱ្យខូចខាតផ្លូវ ដើម្បីទុកជាការព្រមាន ដែលទាំងនេះជាអ្វីដែលយើងត្រូវសម្រេចអោយបានតាមច្បាប់កំណត់ និងតាមអនុសាសន៍របស់សម្តេចតេជោនាយករដ្ឋមន្ត្រី ៕ ដោយ៖កូឡាប
