ខេត្តព្រះសីហនុ៖ ប្រធានក្រុមក្រុមហ៊ុន ជី.ធី.វី.ស៊ី, ស្ពីដបូតកម្ពុជា (G.T.V.C, SPEED BOAD CAMBODIA) គឺលោកឧកញ៉ា ទៀ វិចិត្រ បានបន្តជួយឧបត្ថម្ភសម្លៀកបំពាក់ និងសម្ភារៈប្រើប្រាស់ចាំបាច់មួយចំនួនទៀត ជូនដល់ប្រជាការពារប៉ុស្តិ៍រដ្ឋបាលឃុំទួលទទឹង ស្រុកព្រៃនប់ ខេត្តព្រះសីហនុ ដែលបានខិតខំបំពេញការងារការពារសន្តិសុខ និងសុវត្ថិភាព ជូនប្រជាពលរដ្ឋក្នុងមូលដ្ឋានមានស្នាដៃល្អ និងមានការកោតសរសើរពីប្រជាពលរដ្ឋក្នុងមូលដ្ឋាន។
ឆ្លើយតបជំនួយឧបត្ថម្ភនេះ នាយប៉ុស្តិ៍នគរបាលរដ្ឋបាលឃុំទួលទទឹង ស្រុកព្រៃនប់ បានថ្លែងអំណរគុណចំពោះ លោកឧកញ៉ា ទៀវិចិត្រ ដែលបានជួយឧបត្តម្ភសម្លៀកបំពាក់ចំនួន២៤កំប្លេ, ដំបងភ្លើង៦ដើម និងពិល២ដើម ជូនដល់ប្រជាការពារ នៅឃុំទួលទទឹង ដើម្បីប្រើប្រាស់ ក្នុងសកម្មភាពការពារសុវត្ថិភាព និងសន្តិសុខនៅក្នុងមូលដ្ឋាននេះ ឲ្យមានភាពល្អប្រសើរថែមទៀត។
ជំនួយឧបត្ថម្ភនេះ ត្រូវបានក្រុមការងារ លោកឧកញ៉ា ទៀ វិចិត្រ បាននាំយកទៅផ្តល់ជូនប្រជាការពារឃុំទួលទទឹង កាលពីល្ងាចថ្ងៃចន្ទ ទី១ ខែកក្កដា ឆ្នាំ២០១៩ម្សិលមិញនេះ។
ទាក់ទិនបញ្ហានេះ លោកឧកញ៉ា ទៀ វិចិត្រ មានប្រសាសន៍ថា ជំនួយឧបត្ថម្ភខាងលើនេះ វាគ្រាន់តែជាការលើកទឹកចិត្ត ដល់កងកម្លាំងប្រជាការពារ នៅតាមមូលដ្ឋានឃុំទទួលទទឹង ស្រុកព្រៃនប់ ដែលជាបន្តបន្ទាប់មកនេះ គឺបានខិតខំជួយការពារសន្តិសុខសណ្តាប់ធ្នាប់ និងសុវត្ថិភាព ជូនប្រជាពលរដ្ឋទាំងយប់ថ្ងៃ ដោយមិនគិតការនឿយហត់៕ ដែន សីមា
