ខេត្តស្វាយរៀង ៖ ប្រជាពលរដ្ឋមានការព្រួយបារម្មណ៍យ៉ាងខ្លាំងអំពីសន្តិសុខ ដោយប៉ុន្មានសប្តាហ៍ចុងក្រោយនេះមានករណីចោរធ្វើសកម្មភាពបំពុលសត្វឆ្កែងាប់ជាបន្តបន្ទាប់ ហើយចូលគាស់បន្ទប់ក្រោមផ្ទះលួចយកម៉ូតូរបស់ប្រជាពលរដ្ឋអស់ជាច្រើនគ្រឿងមិនដែលឃើញសមត្ថកិច្ចចាប់ខ្លួនបានទេ ទើបមានការព្រួយ បារម្មណ៍អំពីសុវត្ថិភាពសន្តិសុខនៅមូលដ្ឋាន ។
បើតាមសមត្ថកិច្ចបានឲ្យដឹងថា ៖ នៅវេលាម៉ោង១និង០០នាទីយប់រំលងអាធ្រាតឈានចូលថ្ងៃទី១ កក្កដា២០១៩ មានចោរមួយក្រុមធ្វើសកម្មភាពបំពុលឆ្កែងាប់អស់ជាច្រើនក្បាល ហើយចូលលួចគាស់យកម៉ូតូរបស់ប្រជាពលរដ្ឋអស់ចំនួន ២គ្រឿងយកទៅបាត់។
ករណីក្រុមចោរបំពុលឆ្កែលួចគាស់ផ្ទះយកម៉ូតូនេះកើតឡើងនៅក្នុងភូមិត្រោក ឃុំគ្រួស ស្រុកស្វាយជ្រំ ខេត្តស្វាយរៀង។
បើតាមសមត្ថកិច្ចបានឲ្យដឹងថា ជនរងគ្រោះឈ្មោះកុសល់និងប្រពន្ធឈ្មោះគារ មានទីលំនៅកើតហេតុខាងលើត្រូវក្រុមចោរធ្វើសកម្មភាពបំពុលឆ្កែងាប់អស់ចំនួន៩ក្បាលហើយបានចូលគាស់សោបន្ទប់ក្រោមផ្ទះយកម៉ូតូអស់ចំនួន២គ្រឿងម៉ាកហុងដាសេ១២៥ទៅបាត់ដោយសុវត្ថិភាព។លុះព្រឹកឡើងទើបសមត្ថកិច្ចចុះទៅផ្ទះកើតហេតុធ្វើការសាកសួរដើម្បីស្រាវជ្រាវរកជនល្មើសមកផ្តន្ទាទោសតាមច្បាប់។
បើតាមម្ចាស់ផ្ទះឲ្យដឹងថា ពួកគាត់ចូលដេកនៅវេលាម៉ោង១០យប់ដូច្នេះគាត់សន្និដ្ឋានថា ក្រុមចោរធ្វើសកម្មភាព ប្រហែលជាម៉ោង១១និង០០នាទីទៅម៉ោង១និង០០នាទីយប់រំលងអាធ្រាតដោយគាត់ចុះមកមើលជំវិញផ្ទះស្រាប់តែឃើញឆ្កែរបស់គាត់កំពុងតែពុលនិងងាប់ជាបន្តបន្ទាប់ហើយពេលនោះគាត់ទៅមើលទ្វាបន្ទប់ក្រោមផ្ទះដែលកន្លែងដាក់ម៉ូតូស្រាប់តែឃើញមានកាត់សោ ហើយលួចយកម៉ូតូរបស់គាត់បាត់ទាំងពីគ្រឿងទៅហើយក៏ប្តឹងសមត្ថកិច្ចភ្លាមៗដែរ។
សូមឲ្យប្រជាពលរដ្ឋមានការប្រុងប្រយ័ត្ននិងចូលរួមការពារសុវត្ថិភាពទាំងអស់គ្នា ៕ ដោយ ៖ វ៉ៃកូ
