ខេត្តព្រះសីហនុ ៖ ប្រជាពលរដ្ឋរស់នៅក្រុងព្រះសីហនុ បានឱ្យដឹងថា នៅថ្ងៃនេះ មានសំណង់ឃ្លាំងសង់ពីដែកប្រក់ស័ង្កសី របស់អាជីវករជនជាតិចិនមួយកន្លែង បានដួលរលំរាបដល់ដី កាលពីវេលាថ្ងៃត្រង់ថ្ងៃទី៣ ខែកក្កដា ឆ្នាំ២០១៩នេះ។
ប្រជាពលរដ្ឋ បានបន្តថា សំណង់ឃ្លាំងដែកកំពុងដំឡើងសង់ថ្មី ដែលដួលរលំនេះ មានទីតាំងស្ថិតនៅភូមិថ្មី ស្ថិតក្នុងសង្កាត់លេខ៣ ក្រុងព្រះសីហនុ។
ទាក់ទិនឧប្បទ្ទវហេតុនេះ លោក ឃាង ភារម្យ មន្ត្រីនាំពាក្យសាលាខេត្តព្រះសីហនុ បានទទួលស្គាល់ថា ពិតជាមានសំណង់ឃ្លាំងសង់ពីដែក ប្រកស័ង្កសីមួយកន្លែង ដែលជាកម្មសិទ្ធិ របស់អាជីវករជនជាតិចិន កំពុងសាងសង់ បានដួលរលំរាបដល់ដី ពិតប្រាកដមែន។
លោក ឃាង ភារម្យ បន្តថា សំណង់ឃ្លាំងដែក ដែលដួលរលំខាងលើនេះ មិនបណ្តាលឲ្យមានមនុស្សគ្រោះថ្នាក់នោះទេ។
យ៉ាងនេះក្តី លោក ឃាង ភារម្យ មិនទាន់បញ្ជាក់ថា បណ្តាលមកពីមូលហេតុអ្វីឲ្យពិតប្រាកដ ទើបបណ្តាលឲ្យបាក់រលំ សំណង់ឃ្លាំងសង់ពីដែកនេះទេ ព្រោះមិនទាន់មានប្រភពច្បាស់លាស់នៅឡើយទេ៕ ដោយ៖ ដែន សីមា
