ទាហានជើងទឹករបស់អង់គ្លេសបានធ្វើការរឹបអូសកប៉ាល់ដឹកប្រេងរបស់ប្រទេសអ៊ីរ៉ង់ កាលពីថ្ងៃព្រហស្បតិ៍ម្សិលមិញនេះ នៅសមុទ្រ Gibraltar ដែលកប៉ាល់នោះត្រូវបានគេជឿជាក់ថា ដឹកប្រេងទៅកាន់ប្រទេសស៊ីរី។
អាជ្ញាធរអង់គ្លេសបញ្ជាក់ថា វាគឺល្មើសទៅនឹងទណ្ឌកម្មរបស់សភាពអឺរ៉ុបប្រឆាំងរបបស៊ីរី។
កប៉ាល់ដឹកប្រេងដ៏ធំឈ្មោះ Grace 1 ត្រូវបានរឹបអូស និងរក្សាទុកនៅកំពុងផែ Gibraltar កាលពីព្រឹកថ្ងៃព្រហស្បតិ៍។ នេះបើតាមការបញ្ជាក់របស់រដ្ឋមន្រ្តីប្រចាំតំបន់នោះឈ្មោះ Fabian Picardo នៅក្នុងសេចក្តីប្រកាស។
រដ្ឋមន្រ្តីការបរទេសស្តីទីរបស់អេស្ប៉ាញ លោក Josep Borrell បាននិយាយថា សហរដ្ឋអាមេរិចបានស្នើឲ្យអង់គ្លេសចាប់កប៉ាល់ខាងលើនោះ។
រដ្ឋមន្រ្តីប្រចាំតំបន់ Gibraltar បញ្ជាក់ថា “ពួកយើងមានហេតុផលដែលជឿជាក់ថា កប៉ាល់Grace 1កំពុងដឹកប្រេងឆៅ ទៅកាន់រោងចក្រចម្រាញ់ប្រេង Baniyas Refinery។ រោងចក្រនោះគឺជាកន្លែងដែលគោលដៅនៃទណ្ឌកម្មរបស់សភាពអឺរ៉ុបប្រឆាំងនឹងស៊ីរី “។
ជុំវិញបញ្ហាខាងលើ អ្នកនាំពាក្យក្រសួងការបរទេសអ៊ីរ៉ង់លោក Abbas Mousavi បានធ្វើការថ្លែងថា ឯកអគ្គរាជទូតអង់គ្លេសត្រូវបានកោះហៅ ជុំវិញការរឹបអូសខុសច្បាប់លើកប៉ាល់ដឹកប្រេង។
សូមរំលឹកថា សហភាពអឺរ៉ុបបានដាក់ទណ្ឌកម្មផ្នែកហិរញ្ញវត្ថុ ជំនួញ និងការដឹកជញ្ជូនដើម្បីប្រឆាំងទៅនឹង របបប្រធានាធិបតីស៊ីរី លោក Bashar al-Assad ក្នុងឆ្នាំ ២០១១ ដើម្បីជាការឆ្លើយតបទៅនឹងរបបនោះ ដែលបន្តធ្វើយុទ្ធនាការប្រឆាំងប្រជាជនរបស់ខ្លួន។ប្រភព៖ CNN៕ អត្ថបទប្រែសម្រួលដោយ៖ សុភ័ក្រ
