(ទីក្រុង Hamilton) ៖ នៅថ្ងៃទី៥ ខែកក្កដា ឆ្នាំ២០១៩ លោករដ្ឋមន្ត្រី ថោង ខុន បានជួបពិភាក្សាការងារជាមួយលោកស្រី Allison Kirkman សាកលវិទ្យាធិការរង និងលោក Christ Ryan នៃសាកលវិទ្យាល័យវៃកាតូ (University of Waikato) អំពីកិច្ចសហប្រតិបត្តិការបណ្តុះបណ្តាលជំនាញវិជ្ជាជីវៈទេសចរណ៍ និងការអភិវឌ្ឍធនធានមនុស្សក្នុងវិស័យទេសចរណ៍។
លោករដ្ឋមន្ត្រីបានគូសបញ្ជាក់ពីសារសំខាន់ភាពជាដៃគូនៃកិច្ចសហការរួមគ្នាក្នុងការបណ្តុះបណ្តាល និងអភិវឌ្ឍធនធានមនុស្សក្នុងវិស័យទេសចរណ៍ ដើម្បីឆ្លើយតបទៅនឹងតម្រូវការទីផ្សារការងារនាពេលអនាគត ពិសេសចូលរួមសម្រេចនូវទិសដៅយុទ្ធសាស្ត្រអភិវឌ្ឍធនធានមនុស្សក្នុងវិស័យទេសចរណ៍នៅកម្ពុជា។
ជាកិច្ចឆ្លើយតប ភាគីសាកលវិទ្យាល័យវៃកាតូ បានគាំទ្រដល់សំណើជាក់ស្តែងរបស់ក្រសួងទេសចរណ៍កម្ពុជា ដែលរួមមាន៖
១៖ ការផ្តល់បច្ចេកទេស និងអ្នកស្រាវជ្រាវដើម្បីជួយដល់វិទ្យាស្ថានជាតិទេសចរណ៍។
២៖ ការអភិវឌ្ឍវិស័យអេកូទេសចរណ៍ និងសហគមន៍ទេសចរណ៍នៅកម្ពុជា។
៣៖ ការបណ្តុះបណ្តាលជំនាញគ្រប់គ្រងទេសចរណ៍ និងបដិសណ្ឋារកិច្ច ព្រមទាំងការគ្រប់គ្រង និងវិភាគទិន្នន័យស៊ីជម្រៅ (Big Data Analysis System) សម្រាប់វិស័យទេសចរណ៍ និងជំនាញចាំបាច់ផ្សេងៗទៀត។
៤៖ ការផ្តល់អាហារូបករណ៍ដល់យុវជន សិស្ស និស្សិតកម្ពុជាសិក្សានៅសកលវិទ្យាល័យវៃកាតូ។
៥៖ ការបង្កើតឱ្យមានកម្មវិធីផ្លាស់ប្តូរកម្មសិក្សារវាងមន្ត្រីជំនាញ និងសិស្ស និស្សិតជំនាញទេសចរណ៍ រវាងសកលវិទ្យាល័យវៃកាតូ ជាមួយកម្ពុជាផងដែរ។
ដោយឡែក នៅព្រឹកថ្ងៃដដែលនេះ គណៈប្រតិភូកម្ពុជាក៏បានទស្សនកិច្ចនៅសាលាបណ្តុះបណ្តាលជំនាញគ្រប់គ្រង និងវិជ្ជាជីវៈទេសចរណ៍ (New Zealand Management Academy) ដោយបានជួបពិភាក្សាការងារ និងពង្រីកកិច្ចសហប្រតិបត្តិការលើការបណ្តុះបណ្តាលជំនាញទេសចរណ៍ផងដែរ ដែលនៅទីនោះប្រតិភូក៏ត្រូវបានទទួលបដិសណ្ឋារកិច្ចស្វាគមន៍ដោយក្រុមសិល្បៈរបស់សាលា ដែលច្រៀងចម្រៀងជនជាតិដើមនៅទីក្រុងនោះដ៏ពីរោះ និងស្និទ្ធស្នាលបំផុត៕ ដោយ៖កូឡាប