ស្រ្តីហុងកុងចំនូនរាប់ពាន់នាក់ បានធ្វើការចូលរួមតវ៉ា ដើម្បីជាការគាំទ្រទៅដល់កូនៗរបស់ពួកគេ ដែលកំពុងធ្វើការតវ៉ាអស់ជាច្រើនសប្តាហ៍មកហើយ ដើម្បីប្រឆាំងទៅនឹងច្បាប់ធ្វើបត្យាប័ន ដែលអនុញ្ញាតឲ្យមានការបញ្ជូនអ្នកទោសពីហុងកុង ទៅកាត់ទោសនៅចិនបាន។
ស្រ្តីម្នាក់ឈ្មោះ Carina Wan វ័យ ៤០ឆ្នាំ បានថ្លែងថា “យុវជនបានធ្វើរឿងជាច្រើនសម្រាប់ពួកយើង។ យ៉ាងហោចណាស់ ពួកយើងគួរតែក្រោកឡើងដើម្បីពួកគេ”។
អ្នកស្រីបន្តទៀតថា អ្នកដែលធ្វើឲ្យពួកយើងឈឺចាប់ គឺរដ្ឋាភិបាល។ ប្រសិនជារដ្ឋាភិបាល មិនដោះលែងយុវជនទេ ពួកយើងនឹងនៅតែបន្តធ្វើការតស៊ូ។
បើតាមអ្នករៀបចំកម្មវិធី មានស្រ្តីជាម្តាយជាច្រើនប្រមាណ ៨.០០០នាក់ បានចូលរួមធ្វើការហែក្បួន ខណៈដែលប៉ូលិសបញ្ជាក់ពីតួលេខថា មានតែប្រមាណ ១.៣០០ប៉ុណ្ណោះ។
សូមបញ្ជាក់ថា ទីក្រុងហុងកុង ត្រូវបានញាំញីដោយការធ្វើបាតុកម្មអហឹង្សា អស់ជាច្រើនសប្តាហ៍មកហើយ ពីសំណាក់ និស្សិត និងយុវជន ដើម្បីទាមទារឲ្យរដ្ឋាភិបាលហុងកុង បោះបង់ចោលច្បាប់ធ្វើបត្យាប័ន។
ដោយសារតែសន្ទុះ នៃការតវ៉ាកាន់តែខ្លាំង មេដឹកនាំហុងកុង គឺអ្នកស្រី Carrie Lam ដែលគាំទ្រដោយរបបក្រុងប៉េកាំង បានសម្រេចចិត្តធ្វើការព្យួរសេចក្តីព្រាងច្បាប់នោះ ប៉ុន្តែក្រុមអ្នកតវ៉ា នៅតែទាមទារឲ្យមានការបោះបង់ចោលច្បាប់នោះ។
អ្នកស្រីក៏បានស្នើសុំជួបពិភាក្សា ជាមួយនឹងក្រុមនិស្សិតផងដែរ ដើម្បីធ្វើការចរចាគ្នា ប៉ុន្តែត្រូវក្រុមនិស្សិបដិសេធ ដោយសារតែកិច្ចប្រជុំនោះ ត្រូវធ្វើឡើងមិនបើកចំហរ។ ក្រុមនិស្សិតបានទាមទារឲ្យបើកចំហរ ទៅដល់ប្រជាជនហុងកុងទាំងអស់ ហើយអនុញ្ញាតឲ្យពួកគេសម្តែងមតិ។
ទីក្រុងហុងកុង ត្រូវបានអង់គ្លេស ប្រគល់ទៅឲ្យចិនវិញនៅក្នុងឆ្នាំ ១៩៩៧ ដោយស្ថិតក្រោមរូបមន្តប្រទេសមួយ ប្រព័ន្ធគ្រប់គ្រងពីរ ដែលផ្តល់សេរីភាព ដល់ទីក្រុងហុងកុង រួមមាន សិទ្ធិសេរីភាពក្នុងការតវ៉ា និងប្រព័ន្ធតុលាការឯករាជ្យ។ ប្រភព៖ Channelnewsasia៕ អត្ថបទប្រែសម្រួលដោយ៖ សុភ័ក្រ
