តាកែវ៖ ថ្លែងនៅក្នុងពិធីប្រកាសផ្សព្វផ្សាយតំបន់ភូមិអំពិល ឃុំពន្លៃ ស្រុកអង្គរបូរី ខេត្តតាកែវ ជាតំបន់ផ្ទុះជំងឺប៉េស្តជ្រូកអាហ្វ្រិក នាព្រឹកថ្ងៃទី ១០ ខែកក្កដា ឆ្នាំ២០១៩នេះ លោក តាន់ ផាន់ណារ៉ា ប្រធានអគ្គនាយកដ្ឋានសុខភាពសត្វនិងផលិតកម្មសត្វ បានប្រកាសជាផ្លូវការថា តំបន់នៅក្នុងមូលដ្ឋាននេះ គឺត្រូវបានរកឃើញថា មានផ្ទុកមេរោគជំងឺប៉េស្តអាហ្វ្រិក ដែលជាប្រភេទជំងឺដ៏កាចសាហាវ ដែលកើតនៅលើសត្វជ្រូក ហើយវាមានការឆ្លងរីករាលដាលលឿនណាស់ចំពោះសត្វជ្រូក និងមិនទាន់មានថ្នាំសម្រាប់ព្យាបាលជំងឺនេះបាននូវឡើយទេ តែមេរោគនេះគឺមិនឆ្លងពីសត្វមកមនុស្សឡើយ ។
ប្រធានអគ្គនាយកដ្ឋានសុខភាពសត្វនិងផលិតកម្មសត្វ បានស្នើសុំឲ្យអាជ្ញាធរខេត្ត មន្ត្រីជំនាញពាក់ព័ន្ធទាំងអស់ ត្រូវរួមគ្នាទប់ស្កាត់ចលនារបស់សត្វ ឲ្យបានដើម្បីជៀសវាងការឆ្លងរីករាលដាលពីតំបន់មួយទៅតំបន់មួយទៀត ។
បើតាមរបាយការណ៍របស់លោក ញិប ស្រ៊ន ប្រធានមន្ទីរកសិកម្ម រុក្ខប្រមាញ់ និងនេសាទខេត្តតាកែវ បានឲ្យដឹងថា នៅក្នុងខេត្តតាកែវមានសត្វជ្រូក ចិញ្ចឹមដោយកសិដ្ឋាន និងការចិញ្ចឹមតាមលក្ខណៈគ្រួសារ គឺមានជ្រូកសរុបចំនួន ២២៧៨៤ក្បាល ដោយឡែកនៅក្នុង ស្រុកអង្គរបូរី មានចំនួន ៦៧៥០ក្បាល និងនៅក្នុងមូលដ្ឋាន ឃុំបន្លៃមាន ៦ភូមិ មានសរុប ១២៦០ក្បាល ក្នុងភូមិអំពិល ដែលជាតំបន់ផ្ទុះជំងឺមានជ្រូក ១២២ក្បាល មកទល់ពេលនេះ ក្នុងតំបន់នោះ គឺងាប់អស់ ១១១ក្បាលហើយ នៅសល់តែ ១១ក្បាលកំពុងមានជំងឺ ហើយមន្ត្រីជំនាញកំពុងសម្របសម្រួលលើសត្វជ្រូកដែលនៅសល់ ១១ក្បាលដែលកំពុងឈឺនេះ ។
ជុំវិញការកើតមាននៅការផ្ទុះជំងឺប៉េស្តជ្រូកអាហ្រិ្វកនេះដែរ លោក ខាន់ សុខា អភិបាលរងខេត្តតាកែវ បានជំរុញឲ្យមន្ត្រីនៅក្រោមឱវាទ ឲ្យយកចិត្តទុកដាក់ខ្ពស់លើការការពារ និងទប់ស្កាត់ ការចរាចរណ៍សត្វ ដែលមានការនាំចូលពីប្រទេសជិតខាង និងទប់ស្កាត់ការចរាចរណ៍សត្វ ចេញពីតំបន់ផ្ទុះជំងឺនេះ ។ លោកអភិបាលរងខេត្ត បានសង្កត់ធ្ងន់ថា បើសិនជាមានមន្ត្រីរាជការរូបណា មិនថាជាកងកម្លាំង ឬមន្ត្រីជំនាញ ឬអាជ្ញាធរ ជាប់ពាក់ព័ន្ធលើការណីឃុបឃិតគ្នាឲ្យមានជ្រូកចូល បើកឲ្យមានការដឹកជ្រូកចេញពីតំបន់ផ្ទុះជំងឺនោះ បន្តមកចម្លងមេរោគ ដល់តំបន់ផ្សេងៗទៀត មន្ត្រីទាំងនោះនឹងប្រឈមមុខ ជាមួយនឹងផ្លូវច្បាប់ដោយខ្លួនឯងតែម្តង និងគ្មានការលើកលែង ឬយោគយល់ឡើយ ៕ ដោយ៖ តាកែវ