ចំនួនអ្នកស្លាប់បានកើនឡើងដល់ ៥៥នាក់ នៅក្នុងហេតុការណ៍គ្រោះទឹកជំនន់ និងរអិលបាក់ដី នៅក្នុងរយៈពេល ៣ថ្ងៃ និងជាច្រើននាក់បានបាត់ខ្លួន នៅក្នុងប្រទេសនេប៉ាល់។ នេះបើតាមការបញ្ជាក់របស់មន្រ្តីរដ្ឋាភិបាល នៅថ្ងៃអាទិត្យម្សិលមិញនេះ។
មនុស្សរាប់ពាន់នាក់ត្រូវបានជម្លៀសចេញពីផ្ទះពួកគេ ខណៈដែលភ្លៀងបានបន្តធ្លាក់ឥតឈប់នៅតំបន់ជាច្រើន ចាប់ពីថ្ងៃព្រហស្បតិ៍មក បណ្តាលឲ្យជន់លិចផ្ទះ ផ្លូវ និងបំផ្លាញស្ពានជាច្រើនកន្លែងទូទាំងប្រទេស។
ក្រសួងផ្ទះសម្បែងបានថ្លែងថា មនុស្ស ៥៥នាក់បានស្លាប់ និង ៣៣នាក់រងរបួស។
អ្នកនាំពាក្យទីស្តីការគណៈរដ្ឋមន្រ្តីនេប៉ាល់ លោក Gokul Banskota បានថ្លែងថា គ្រោះមហន្តរាយ បានធ្វើឲ្យមានការបាត់បង់យ៉ាងធំចំពោះសេដ្ឋកិច្ចជាតិ ហើយរដ្ឋាភិបាល នឹងធ្វើការវាយតម្លៃលើការខូចខាតទាំងនោះ ក្នុងពេលឆាប់ៗ។
ប្រជាជនដែលគ្មានផ្ទះសម្បែងជាច្រើនបានមកស្នាក់នៅក្នុងសាលារៀន និងអគារសាធារណៈ៕ អត្ថបទប្រែសម្រួលដោយ៖ សុភ័ក្រ / ប្រភព៖ channelnewsasia
