មហាយក្សចិនបានធ្វើសមយុទ្ធនៅដែនសមុទ្រក្បែរកោះតៃវ៉ាន់ ខណៈពេលដែលភាពតានតឹងរវាង ប៉េកាំង និងវ៉ាស៊ីនតោនកំពុងឡើងខ្លាំង ដោយសារតែការគ្រោងលក់អាវុធរបស់អាមេរិច ទៅឲ្យតៃវ៉ាន់។
បើតាមកងកម្លាំងរំដោះប្រជាជនចិនបានថ្លែងនៅក្នុងសេចក្តីប្រកាសថា សមយុទ្ធយោធារបស់ពួកគេ នឹងមានការចូលរួមពីកងកម្លាំងជើងទឹក និងអាកាស ។
សូមបញ្ជាក់ថា ភាពតានតឹងរវាងប៉េកាំង និងវ៉ាស៊ីនតោនកើនឡើងក្រោយពេលអាមេរិចគ្រោងលក់
អាវុធតម្លៃ ២,២ពាន់លានដុល្លារ ទៅឲ្យកោះតៃវ៉ាន់ ហើយកាលពីពេលថ្មីៗនេះដែរ ប្រធានាធិបតីតៃវ៉ាន់ Tsai Ing-wen ក៏បានធ្វើដំណើរទស្សនកិច្ចទៅកាន់អាមេរិចដែរ ដើម្បីគៀរគរការគាំទ្រពីសម្ព័ន្ធមិត្តរបស់ខ្លួន។
ជុំវិញគម្រោងលក់អាវុធនេះដែរ ប្រទេសចិនបានព្រមានថា នឹងដាក់ទណ្ឌកម្មលើក្រុមហ៊ុនអាមេរិច ដែលជាប់ពាក់ព័ន្ធនឹងការលក់អាវុធទៅឲ្យកោះតៃវ៉ាន់។
“ការលក់អាវុធរបស់អាមេរិចទៅឲ្យតៃវ៉ាន់ គឺរំលោភយ៉ាងធ្ងន់ធ្ងន់ លើបទដ្ឋាន នៃច្បាប់អន្តរជាតិ និងទំនាក់ទំនងអន្តរជាតិ”។ នេះបើតាមការថ្លែងរបស់អ្នកនាំពាក្យក្រសួងការបរទេសចិនឈ្មោះ Geng Shuang នៅក្នុងសេចក្តីប្រកាសអនឡាញ។
ចិនតែងតែចាប់ទុកកោះតៃវ៉ាន់ គឺជាផ្នែកមួយនៃទឹកដីរបស់ខ្លួន ហើយរំពឹងថានឹងធ្វើការរួបរួមគ្នាវិញ នៅថ្ងៃណាមួយ។ ចិនតែងព្រមានតៃវ៉ាន់ថា បើហ៊ានប្រកាសឯករាជ្យ ចិននឹងប្រើប្រាស់កម្លាំងទ័ពដើម្បីវាយយកតៃវ៉ាន់មកគ្រប់គ្រងវិញ៕ អត្ថបទប្រែសម្រួលដោយ៖ សុភ័ក្រ / ប្រភព៖ CNN
