កូរ៉េខាងជើងបានធ្វើការព្រមានថា ខ្លួននឹងធ្វើការបាញ់សាកល្បងនុយក្លេអ៊ែរឡើងវិញ បន្ទាប់ពីរបបនេះបានចោទអាមេរិចថា បានរំលោភស្មារតីនៃកិច្ចចរចារ ដោយអាមេរិចគ្រោងធ្វើសមយុទ្ធយោធាជាមួយនឹងកូរ៉េខាងត្បូងឡើងវិញ។
កូរ៉េខាងជើងគំរាមថា ខ្លួននឹងបំភ្លេចពាក្យសន្យាចោល ដែលបានធ្វើការប្តេជ្ញាចិត្តជាមួយអាមេរិចក្នុងការរំសាយអាវុធនុយក្លេអ៊ែរចោល។
នៅក្នុងសេចក្តីប្រកាសកាលពីថ្ងៃអង្គារ ក្រសួងការបរទេសកូរ៉េខាងជើងបាននិយាយថា សមយុទ្ធយោធារវាងអាមេរិច និងកូរ៉េខាងត្បូងគឺជាការហាត់សមដើម្បីធ្វើសង្គ្រាម ហើយវាគឺជាការរំលោភការសន្យា ដែលបានធ្វើឡើងក្នុងពេលប្រធានាធិបតី ដូណាល់ ត្រាំ ជួបជាមួយនឹង លោកគីម ជុងអ៊ុនក្នុងកិច្ចប្រជុំកំពូលកាលពីខែមិថុនា ឆ្នាំមុន ក្នងប្រទេសសិង្ហបុរី។
សេចក្តីប្រកាសថ្លែងថា “ដោយសារអាមេរិចបំភ្លេចសន្យាចោលជាឯកតោភាគី ពួកយើងបានបាត់បង់នូវហេតុផលដែលត្រូវធ្វើ តាមរយៈការប្តេជ្ញាចិត្តដែលពួកយើងបានសន្យាជាមួយអាមេរិច”។
កូរ៉េខាងជើងបានថ្លែងថា “សមយុទ្ធនោះជាការហ្វឹកហាត់ដើម្បីត្រៀមធ្វើសង្គ្រាមសំដៅលុកលុយពួកយើង។ ការផ្អាកការធ្វើសមយុទ្ធគឺជាអ្វីដែលប្រធានាធិបតីដូណាល់ ត្រាំ និងអគ្គមេបញ្ជាការកងកម្លាំងអាមេរិច បានប្តេជ្ញាចិត្តចំពោះកូរ៉េខាងជើង កំឡុងកិច្ចចរចារនៅសិង្ហបុរី ក្រោមក្រសែភ្នែករបស់ពិភពលោក”។
មន្ទីរបញ្ចាកោណនៃក្រសួងការពារជាតិអាមេរិច បានបញ្ជាក់ថា សមយុទ្ធយោធាជាមួយនឹងកូរ៉េខាងត្បូងនឹងត្រូវធ្វើឡើងនៅរដូវស្លឹកឈើជ្រុះខាងមុខនេះ។
សូមរម្លឹកថា អាមេរិច និងសម្ព័ន្ធកូរ៉េខាងត្បូង បានធ្វើសមយុទ្ធរួមគ្នាជាទៀងទាត់ ប៉ុន្តែសមយុទ្ធនោះត្រូវបានព្យួរ ឬលុបចោលការធ្វើសមយុទ្ធរួមគ្នាជាច្រើនដើម្បីកាត់បន្ថយភាពតានតឹងជាមួយនឹងទីក្រុងព្យុងយ៉ាង៕
អត្ថបទប្រែសម្រួលដោយ៖ សុភ័ក្រ
ប្រភព៖ CNN