ភ្នំពេញ៖ ក្រសួងការងារនិងបណ្ដុះបណ្ដាលវិជ្ជាជីវៈនៅថ្ងៃទី 17 ខែកក្កដា បានចេញសេចក្តីជូនដំណឹង លេខ ០២៤/១៩ ក.ប/សជណគបក ស្តីពី កាលវិភាគនៃការចរចាប្រាក់ឈ្នួលអប្បបរមាផ្នែកវាយនភណ្ឌ កាត់ដេរ និងផលិតស្បែកជើង សម្រាប់ឆ្នាំ២០២០។
បើតាមលោកអ៊ិត សំហេង រដ្ឋមន្ត្រីក្រសួងការងារ បានបញ្ជាក់ថា ក្រសួងការងារបណ្ដុះបណ្ដាលវិជ្ជាជីវៈ សូមប្រកាសដល់សាធារណៈជន កម្មករនិយោជិត និយោជក និងអង្គការវិជ្ជាជីវៈ អំពីការវិភាគ នៃការចរចាប្រាក់ឈ្នួលអប្បបរមាផ្នែកវាយនភណ្ឌកាត់ដេរ និងផលិតស្បែកជើង សម្រាប់ឆ្នាំ 2020។ ការពិភាក្សាប្រាក់ឈ្នួលអប្បបរមាសម្រាប់ឆ្នាំ 2020 ត្រូវអនុវត្តន៍តាមប្រតិទិនដូចតទៅ កំណត់យកខែកក្កដា ឆ្នាំ 2019 ជាការចាប់ផ្ដើមពិភាក្សាប្រាក់ឈ្នួលអប្បបរមា ជាលក្ខណៈផ្ទៃក្នុងរបស់ភាគីនីមួយៗ ។ កំណត់យកខែសីហា ឆ្នាំ 2019 ជាការចាប់ផ្ដើមពិភាក្សាប្រាក់ឈ្នួលអប្បបរមាជាលក្ខណៈទ្វេភាគី ។ កំណត់យកខែកញ្ញា ឆ្នាំ 2019 ជាការចាប់ផ្ដើមពិភាក្សាប្រាក់ឈ្នួលអប្បបរមាជាលក្ខណៈត្រីភាគី។ កំណត់យកខែតុលា ឆ្នាំ 2019 បើកកិច្ចប្រជុំក្រុមប្រឹក្សាជាតិ ប្រាក់ឈ្នួលអប្បរមា ដើម្បីសម្រេចប្រាក់ឈ្នួលអប្បបរមា ផ្នែកវាយនភ័ណ្ឌកាត់ដេរ និងផលិតស្បែកជើង សម្រាប់ឆ្នាំ 2020។ កំណត់យកថ្ងៃទី 1 ខែមករា ឆ្នាំ 2020 ជាកាលបរិច្ឆេទ ចូលជាធរមានប្រាក់ឈ្នួលអប្បរមា។ បើតាមលោករដ្ឋមន្ត្រី គ្រប់ភាគីទាំងអស់ ត្រូវប្រើលក្ខណៈវិនិច្ឆ័យ បែបសង្គម ស្ថានភាពគ្រួសារ អត្រាអតិផរណា និងការចំណាយក្នុងការរស់នៅ និងលក្ខណៈវិនិច្ឆ័យបែបសេដ្ឋកិច្ច ផលិតភាព ភាពប្រកួតប្រជែង របស់ប្រទេស ស្ថានភាពទីផ្សារការងារ និងកម្រិតចំណេញ របស់វិស័យ ក៏ដូចជា បន្ទាត់ភាពក្រីក្រ សម្រាប់ធ្វើជាមូលដ្ឋាន ក្នុងការពិភាក្សាប្រាក់ឈ្នួលអប្បបរមា នៅកម្ពុជា។ គ្រប់ភាគីទាំងអស់សូមផ្ដោត លើទិន្នន័យ និងការស្រាវជ្រាវបែបវិទ្យាសាស្ត្រ ដោយយោងលើលក្ខណៈវិនិច្ឆ័យទាំង 7 ដូចដែលបានកំណត់ក្នុងមាត្រា5 នៃច្បាប់ ស្ដីពីប្រាក់ឈ្នួលអប្បបរមា ដើម្បីធ្វើជាមូលដ្ឋាន ក្នុងការសម្របសម្រួលផ្ទៃក្នុង និងប្រកាន់គោលជំហររួមមួយ។
សូមបញ្ជាក់ថា ប្រាក់ឈ្នួលសម្រាប់កម្មករកម្មការិនី រោងចក្រកាត់ដេរ និងស្បែកជើង ឆ្នាំ 2018 គឺប្រាក់ខែគោលចំនួន 183 ដុល្លារ ដោយមិនគិតពីប្រាក់អត្ថប្រយោជន៍ផ្សេងៗទៀត៕ ដោយ៖កូឡាប
