មនុស្សចំនួន ២នាក់បានស្លាប់ និងជាច្រើននាក់ទៀតកំពុងស្ថិតក្នុងស្ថានភាពធ្ងន់ធ្ងរ ដោយសារតែអួលនំប្រពៃណីជប៉ុនឈ្មោះ Mochi ក្នុងកំឡុងពេលញាំដើម្បីអបអរឆ្នាំថ្មី។ នេះបើតាមការចេញផ្សាយរបស់ BBC នៅមុននេះបន្តិច។
នំប្រពៃណីជប៉ុន ផលិតពីអង្គរ មើលទៅដូចជាមិនទំនងមានគ្រោះថ្នាក់ទេ ប៉ុន្តែរៀងរាល់ឆ្នាំ នំនេះបានឆក់យកជីវិតមនុស្សជាច្រើននាក់។ មន្ត្រីជប៉ុនក៏បានធ្វើការព្រមានរៀងរាល់ឆ្នាំផងដែរ។
នំប្រពៃណីនេះ មានឈ្មោះថា Mochi។ វាមានរាងមូល ផលិតពីអង្ករដំណើប។ ដើម្បីផលិតនំនេះ គេត្រូវយកអង្ករទៅចំហុយ បន្ទាប់មកយកវាទៅកិន។ ក្រោយពេលកិនរួច គេយកវាមកធ្វើជារៀងមូល និងអាំង ឬចំហុយវា។
តើវាសម្លាប់មនុស្សដោយវិធីណា?
នំនេះស្អិត ហើយមានទំហំធំគួរសម ដែលពិបាកធ្វើឲ្យយើងញាំមួយម៉ាត់ ដូច្នេះយើងត្រូវទំពារវាសិន ចាំលេប។
អ្នកដែលមិនអាចទំពារវាបានល្អ ជាពិសេសក្មេងៗ ឬមនុស្សចាស់ អាចនឹងមានបញ្ហាពិបាកក្នុងការញាំវា។
ប្រសិនជាមិនទំពារវាឲ្យបានម៉ត់ល្អ ហើយលេបតែម្តង នោះនំដ៏ស្អិតនោះនឹងស្លាក់ជាប់នៅបំពងក ដែលអាចធ្វើឲ្យយើងថប់ដង្ហើមស្លាប់បាន។
បើតាមប្រព័ន្ធផ្សព្វផ្សាយរបស់ជប៉ុន មនុស្ស ៩០ភាគរយ ដែលត្រូវបានគេដឹកទៅកាន់ពេទ្យដោយសារតែអួលនំ Mochi នេះភាគច្រើនជាមនុស្សមានអាយុលើស ៦៥ឆ្នាំ។
ដើម្បីញាំវាឲ្យបានស្រួល មុនដំបូងយើងត្រូវទំពារឲ្យបានល្អ ឬក៏ត្រូវកាត់វាជាដុំតូចៗ ទើបមានសុវត្ថភាពក្នុងការញាំ។
សូមរំលឹកដែរថា កាលពីឆ្នាំ ២០១៤ និង ២០១៥ អ្នកស្លាប់ដោយសារអួលនំនេះមាន ៩នាក់ ចំនែកក្នុងឆ្នាំ ២០១៦កន្លងទៅ មនុស្សម្នាក់ស្លាប់ ហើយកាលពីឆ្នាំ ២០១៧ ក៏មាន ២នាក់ស្លាប់ដែរ៕ សុភ័ក្ត្រ
