នាយករដ្ឋមន្រ្តីអង់គ្លេស អ្នកស្រី Theresa May បានបើកកិច្ចប្រជុំគណៈកម្មាការបន្ទាន់ នៅថ្ងៃចន្ទនេះ ដើម្បីធ្វើការពិភាក្សាលើរឿងអ៊ីរ៉ងចាប់កប៉ាល់ដោតទង់ជាតិអង់គ្លេស នៅឈូងសមុទ្រ។
វាអាចជាកិច្ចប្រជុំដ៏មានសារសំខាន់មួយចុងក្រោយ ក្នុងនាមជានាយករដ្ឋមន្រ្តី មុនពេលអ្នកស្រីធ្វើការលាលែងដំណែងនៅថ្ងៃពុធ។
ក្រោយអ៊ីរ៉ងធ្វើការចាប់កប៉ាល់ដឹកប្រេងអង់គ្លេស កាលពីថ្ងៃសុក្រកន្លងទៅ អង់គ្លេសបានធ្វើកិច្ចប្រជុំគណៈកម្មការបន្ទាន់ចំនួន ៣ដង។
អង់គ្លេសព្រមានថានឹងមានរឿងធំ បើអ៊ីរ៉ងមិនដោះលែងកប៉ាល់ដឹកប្រេងអង់គ្លេសដែលខ្លួនចាប់ នៅច្រកសមុទ្រ Hormuz។
ប្រទេសអ៊ីរ៉ងបានធ្វើការចាប់កប៉ាល់ដឹកប្រេងដែលមានដោតទង់ជាតិអង់គ្លេស នៅច្រកសមុទ្រ Hormuz។ សកម្មភាពរបស់អ៊ីរ៉ងនេះ ត្រូវបានរដ្ឋមន្រ្តីការប្រទេសអង់គ្លេស លោក Jeremy Hunt បានធ្វើការព្រមានថា នឹងមានផលវិបាកធ្ងន់ធ្ងន់ ប្រសិនអ៊ីរ៉ងមិនព្រមលែងកប៉ាល់នោះមកវិញ។
បើតាមប្រព័ន្ធផ្សព្វផ្សាយអ៊ីរ៉ងបានឲ្យដឹងថា កប៉ាល់ដឹកប្រេងអង់គ្លេសឈ្មោះ Stena Impero ត្រូវបានចាប់ដោយកងកម្លាំងបដិវត្តន៍អ៊ីរ៉ង។ សកម្មភាពអ៊ីរ៉ងនេះ នឹងធ្វើឲ្យភាពតានតឹងរវាងប្រទេសទាំងពីរកាន់តែក្តៅខ្លាំង។
កប៉ាល់ដឹកប្រេង Stena Impero ធ្វើនាវាចរក្រោមទង់ជាតិអង់គ្លេស ហើយកប៉ាល់នេះត្រូវបានចុះបញ្ជីនៅទីក្រុងឡុង៕
អត្ថបទប្រែសម្រួលដោយ៖ សុភ័ក្រ
ប្រភព៖ channelnewsasia
