ភ្នំពេញ៖ ក្នុងឱកាសដាក់សម្ពោធដាក់ឲ្យប្រើប្រាស់អគារព្យាបាលថ្មី នៅមន្ទីរពេទ្យមិត្តភាពខ្មែរ-សូវៀត សម្តេចតេជោ ហ៊ុន សែន បានអរគុណមន្ត្រីសុខាភិបាលគ្រប់ជាន់ថ្នាក់ ព្រមទាំងក្រុមគ្រូពេទ្យទាំងអស់ ដែលបានខិតខំយកចិត្តទុកដាក់ ជួយព្យាបាលមើលថែអ្នកជំងឺ នៅតាមមន្ទីរពេទ្យទូទាំងប្រទេស។
បើតាមសម្តេចតេជោ ហ៊ុន សែន “យើងដឹងថា គ្រូពេទ្យភាគច្រើន គឺមានចិត្តបុណ្យ ដែលគិតពីសុខុមាលភាពរបស់ប្រជាជន។ ទោះបីសព្វថ្ងៃនេះ វិទ្យាសាស្ត្រជឿនលឿន ឬមានបច្ចេកវិទ្យាទំនើប ឬមានតែមន្ទីរពេទ្យល្អ មានសម្ភារៈល្អៗ ហើយខ្វះគ្រូពេទ្យល្អ គឺពិតជាមិនល្អទេក្នុងការផ្តល់សេវាសុខភាពទូទៅដល់ពលរដ្ឋ ។
សូមមន្ត្រីសុខាភិបាល និងក្រុមគ្រូពេទ្យ បន្តលើកកម្ពស់ក្រមសីលធម៌ គុណធម៌ និងយកចិត្តទុកដាក់ព្យាបាលជំងឺ ដោយមិនមានការរើសអើង។ មនុស្សច្រើនណាស់ដែលបានផ្ញើជីវិតលើគ្រូពេទ្យយើង ដូច្នេះ គឺត្រូវធ្វើយ៉ាងណាអោយពលរដ្ឋមានជំនឿទុកចិត្ត។ ចំពោះគ្រូពេទ្យយើងដែលបានធ្វើល្អហើយ គឺត្រូវបន្តធ្វើអោយបានល្អច្រើនឡើងថែមទៀត។ ខ្ញុំក៏សូមជូនពរបងប្អូនក្រុមគ្រូពេទ្យទាំងអស់ សូមទទួលបានជោគេជ័យ ក្នុងការកិច្ចបម្រើសេវាសុខាភិបាលសាធារណៈ ជូនប្រជាជនយើង”។
ថ្ងៃ ៣រោច ខែបុស្ស ឆ្នាំរកា ព.ស២៥៦១ ត្រូវនឹងថ្ងៃទី៤ ខែមករា ឆ្នាំ២០១៨ នៅព្រឹកថ្ងៃ ព្រហស្បត៍នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអញ្ជើញសម្ពោធអគារព្យាបាលជំងឺថ្មីដែលមានឈ្មោះថា អគារសម្តេចអគ្គមហាសេនាបតីតេជោ ហ៊ុន សែន ដែលមានទីតាំងស្ថិតនៅក្នុងមន្ទីរពេទ្យមិត្តភាពខ្មែរ-សូវៀត។ អគារព្យាបាលជំងឺថ្មីនេះ គឺជាអគារទំនើបល្អ ដែលបានសាងសង់លើផ្ទៃ ដីទំហំ ៥៥០ម៉ែត្រការ៉េ កម្ពស់៦ជាន់ មានចំនួន ៧៨បន្ទប់ ដោយចំណាយថវិកាប្រមាណ ៣លានដុល្លារអាមេរិក។
សម្តេចតេជោ ហ៊ុន សែន នាយករដ្ឋមន្ត្រីមានក្តីសប្បាយរីករាយជាខ្លាំងចំពោះការបើកសម្ភោធអាគារ សុខាភិបាលថ្មីមួយទៀតនេះ ដើម្បីបំរើសេវាសុខាភិបាលជូនប្រជាពលរដ្ឋទូទៅ។ មន្ទីពេទ្យនេះគឺ ជាមន្ទីពេទ្យដ៏វ័យចំណាសមួយក្នុងទីក្រុងភ្នំពេញដែលជាមន្ទីពេទ្យមិត្តភាព កម្ពុជា-សូវៀត ក្នុងសម័យសង្គ្រមរាស្ត្រនិយម របស់សម្តេចនរោត្តមសីហនុ។ ក្រៅពីមន្ទីពេទ្យនេះ សមិទ្ធផលរបស់សហភាពសូវៀតនៅមានផ្សេងៗទៀតដូចជាសាលាតិចណូជាដើម។
សម្តេចតេជោ ហ៊ុន សែន បានមានប្រសាសន៍ថាក្រោយឆ្នាំ១៩៧៩ នៅសល់គ្រូពេទ្យតិចតួចណាស់ សម្រាប់បំរើសេវាសុខាភិបាលដែលធ្វើអោយយើងមានការលំបាកក្នុងការស្វែងរកគ្រូពេទ្យដើម្បីព្យាបាលជំងឺ។ ក្រោយពីប្រទេសជាតិមានសន្តិភាព និងរីកចម្រើន ចំនួនគ្រូពេទ្យក៏បានកើនឡើងច្រើនដើម្បីបំពេញសេចក្តីត្រូវកាផ្នែកសុខាភិបាល។
បច្ចុប្បន្នកម្ពុជាបានពង្រាយគ្រូពេទ្យនៅតាមបណ្តាលខេត្តជាច្រើនផងដែរក្នុងការបំរើសេវាថែទាំសុខភាពដល់ប្រជាពលរដ្ឋ គឺនៅតាមមណ្ឌលសុខភាព មន្ទីរពេទ្យបង្អែកនានាតាមបណ្តាលខេត្ត។
សម្តេចតេជោ ហ៊ុន សែន នៅឆ្នាំ២០១៧កន្លងផុតទៅគឺជាឆ្នាំដែលកម្ពុជាបានដាក់ចេញនូវ គោនយោបាយ គាំពារសង្គមក្នុងការយកចិត្តទុក្ខដាក់ និងថែទាំសុខភាពដល់ប្រជាពលរដ្ឋ និងស្ត្រីមានផ្ទៃពោះជាដើមតាមរយៈមូលនិធិសមធម៌ដើម្បីធ្វើយ៉ាងណាអោយជីវភាព និងការរស់នៅរបស់ប្រជាពលរដ្ឋកាន់តែមានភាពងាយស្រួល និងកាត់បន្ថយការចំណាយលើសេវាសុខាភិបាល។
សម្តេចតេជោ ហ៊ុន សែន បានថ្លែងអំណគុណដល់ក្រសួងសុខភិបាល និងមន្ត្រីសុខាភិបាល គ្រប់ជាន់ថ្នាក់ទាំងអស់ដែលបានចូលរួមយ៉ាងសកម្មក្នុងយុទ្ធនាការលុបបំបាត់ជំងឺគ្រុនចាញ់ចាប់តាំងពីកម្ពុជាមានតំបន់ត្រួតត្រាពីរពោលគឺពេលកម្ពុជាមានខ្មែរក្រហមសេសសល់តាមតំបន់ព្រំដែន ដូចជាតំបន់ឪរ៉ាល់ ម៉ាឡៃ តាកែនកោះស្លា ប៉ៃលិន និងអន្លង់វែងជាដើម ហើយយុទ្ធនាការលុបំបាត់ជំងឺគ្រុនចាញ់នេះត្រូវបានលប់បំបាត់នៅឆ្នាំ២០០០។ទាក់ទងទៅនឹងបញ្ហាសុខភាពនេះផងដែរ សម្តេចតេជោនាយករដ្ឋមន្ត្រីបានកត់សំគាល់ឃើញថាក្នុងរយៈពេលប៉ុន្មាន ឆ្នាំចុងក្រោយនេះ អត្រាអ្នកជក់បារីបានថយចុះយ៉ាងច្រើន ជាពិសេសតាមស្ថាប័ននានា គឺបានកាត់បន្ថយច្រើន ដោយសារតែការយល់ដឹងរបស់ប្រជាពលរដ្ឋអំពីគ្រោះថ្នាក់ និងដោយមានការផ្សព្វផ្សាយបានទូលំទូលាយ៕ ដោយ៖កូឡាប
