ខេត្តស្វាយរៀងៈដើម្បីជាការលើកទឹកចិត្តចំំពោះប្អូនៗសិស្សានុសិស្ស ដែលរៀនបានចំណាត់ថ្នាក់ជាសិស្សពូកែ ប្រចាំឆ្នាំពីលេខ១ ដល់លេខ៣ នៅព្រឹកថ្ងៃទី២៣ ខែសីហា ឆ្នាំ២០១៩នេះ នៅសាលាបឋមសិក្សាព្រះសីហនុ ស្ថិតក្នុងភូមិមេភ្លើង សង្កាត់ស្វាយរៀង ក្រុងស្វាយរៀង បានរៀបចំពិធីចែករង្វាន់លើកទឹកចិត្តដល់ប្អូនៗ ដែលជាសិស្សពូកែ នៅតាមថ្នាក់ប្រចាំឆ្នាំសិក្សា ២០១៨. ២០១៩។
លោកស្រី ទុំ ទីណា នាយិកាសាលាបឋមសិក្សាព្រះសីហនុ បានមានប្រសាសន៍ឱ្យដឹងថា ការចែករង្វាន់់ ដើម្បីជាការលើកទឹកចិត្ត ចំំពោះប្អូនៗសិស្សានុសិស្ស ដែលរៀនបានចំណាត់ថ្នាក់ជាសិស្សពូកែប្រចាំឆ្នាំ ពីលេខ១ ដល់លេខ៣ នៅព្រឹកនេះក៏មានការចូលរួម ពីលោកទូច ធី ចៅសង្កាត់រងទី១ សង្កាត់ស្វាយរៀងផងដែរ ហើយពុំមែនជាលើកទី១នោះទេ គឺតែងតែធ្វើជារៀងរាល់ដំណាច់ឆ្នាំសិក្សា ដើម្បីជាការលើកទឹកចិត្តឱ្យប្អូនៗ សិស្សានុសិស្សស្រឡាញ់ការសិក្សារៀនសូត្រ រហូតទទួលបានលទ្ធផលល្អ ក្នុងមួយឆ្នាំសិក្សាកន្លងទៅ។
លោកស្រីនាយិកា បានបន្តទៀតថា សម្រាប់ឆ្នាំសិក្សា២០១៨. ២០១៩នេះ សិស្សដែលរៀនពូកែប្រចាំឆ្នាំមានចំនួន៨០នាក់ ក្នុងចំណោមសិស្សទាំងអស់ មានចំនួន៩២០នាក់ ស្រី៤២៧នាក់ ដែលនឹងត្រូវបញ្ចប់ឆ្នាំសិក្សា នាចុងខែសីហា ឆ្នាំ២០១៩ខាងមុខនេះ។
សូមបញ្ជាក់ផងដែរថា រង្វាន់ដែលប្អូនៗ រៀនបានលទ្ធផលល្អ ប្រចាំឆ្នាំពីលេខ១ ដល់លេខ៣ ម្នាក់ៗ ទទួលបានសៀវភៅសរសេរ ខ្មៅដៃ ប៊ិច និងបន្ទាត់ ៕ដោយ៖ វ៉ៃកូ
