ប្រទេសថៃ ៖ សម្តេចអគ្គមហាពញាចក្រី ហេង សំរិន ប្រធានរដ្ឋសភា និងប្រធានសភា ឬប្រធានគណៈប្រតិភូសភា នៃសភាជាសមាជិក AIPA ទាំង១០ប្រទេស បានចូលរួមកិច្ចប្រជុំគណៈកម្មាធិការប្រតិបត្តិ AIPA នៅរាត្រីថ្ងៃទី២៥ ខែសីហា ឆ្នាំ២០១៩ បន្ទាប់ពីបានដឹកនាំគណៈប្រតិភូជាន់ខ្ពស់សភា នៃព្រះរាជាណាចក្រកម្ពុជា អញ្ជើញដល់ប្រទេសថៃ នារសៀលថ្ងៃនេះ។
កិច្ចប្រជុំគណៈកម្មាធិការប្រតិបត្តិ ដឹកនាំដោយ លោក ឈួន លីកផៃ (Chuan Leekpai) ប្រធានសភាប្រទេសថៃ និងជាប្រធានAIPA លើកទី៤០។សមាជិកAIPA មានសភាប្រទេសប្រ៊ុយណេ កម្ពុជា ឥណ្ឌូណេស៊ី ឡាវ ម៉ាឡេស៊ី មីយ៉ាន់ម៉ា សឹង្ហបុរី ថៃ វៀតណាម និងហ្វីលីពីន។ កិច្ចប្រជុំគណៈកម្មាធិការប្រតិបត្តិ ជាកិច្ចប្រជុំសំខាន់ មុនមហាសន្និបាតបើក ដំណើរការ នៅព្រឹកថ្ងៃទី២៦ ខែសីហា ឆ្នាំ២០១៩នេះ។
កិច្ចប្រជុំគណៈកម្មាធិការប្រតិបត្តិពិភាក្សាសម្រេចលើសកម្មភាព និងរបៀបវារៈ មហាសន្និបាតទាំង មូល។
សូមជម្រាបថា សភានៃប្រទេសថៃ រៀបចំមហាសន្និបាត AIPA នៅឆ្នាំនេះ ក្រោមមូលបទ “ការលើកកម្ពស់ភាពជាដៃគូសភា ដើម្បីការអភិវឌ្ឍសហគមន៍ប្រកបដោយចីរភាព” នៅសណ្ឋាគារ Shangri -La នាទីក្រុងបាកក ពីថ្ងៃទី២៥ ដល់ថ្ងៃទី៣០ ខែសីហា ឆ្នាំ២០១៩។
សូមបញ្ជាក់ថា សម្តេចអគ្គមហាពញាចក្រី ហេង សំរិន ប្រធានរដ្ឋសភា នៅរសៀលថ្ងៃទី២៥ ខែសីហា ឆ្នាំ២០១៩នេះ បានដឹកនាំគណៈប្រតិភូជាន់ខ្ពស់សភានៃព្រះរាជាណាចក្រកម្ពុជា ទៅចូលរួមមហាសន្និបាតអន្តរសភាអាស៊ាន ដែលហៅកាត់ថា AIPA លើកទី៤០ នៅទីក្រុងបាងកក ព្រះរាជាណាចក្រថៃ ពីថ្ងៃទី២៥ ដល់ថ្ងៃទី៣០ ខែសីហា ឆ្នាំ២០១៩។
អន្តរសភាអាស៊ានដែលហៅកាត់ថា (AIPA) ជាអង្គការអន្តរសភា ជាតំណាងស្ថាប័ននីតិប្បញ្ញត្តិនៃបណ្តាប្រទេសសមាជិកសមាគមប្រជាជាតិអាស៊ីអាគ្នេយ៍(ASEAN) មានសមាជិក១០ប្រទេស គឺ ប្រទេសប្រ៊ុយណេ កម្ពុជា ឥណ្ឌូណេស៊ី ឡាវ ម៉ាឡេស៊ី មីយ៉ាន់ម៉ា សឹង្ហបុរី ថៃ វៀតណាម និងហ្វីលីពីន។
AIPA ជាការប្រមូលផ្តុំសំឡេងប្រជាពលរដ្ឋក្នុងសហគមន៍អាស៊ាន ជាដៃគូអាស៊ាន ក្នុងការជំរុញឲ្យបានសម្រេចបាននូវគោលដៅសហគមន៍អាស៊ានតែមួយ។
មហាសន្និបាតអាយប៉ា បានប្រារព្ធធ្វើជារៀងរាល់ឆ្នាំ ដោយប្រទេសជាសមាជិកផ្លាស់វេនគ្នាតាមលំដាប់អក្ខរក្រម នៃឈ្មោះប្រទេសតាមអក្សរឡាតាំង ដើម្បីរៀបចំ។ សភាប្រទេសថៃ រៀបចំមហាសន្និបាតអាយប៉ានៅឆ្នាំនេះ គឺក្រោមប្រធានបទ “ជំរុញភាពជាដៃគូសភា ដើម្បីការអភិវឌ្ឍសហគមន៍ប្រកបដោយចីរភាព”។
នៅកំឡុងពេលមហាសន្និបាតនេះ នឹងមានកិច្ចប្រជុំតាមគណៈកម្មាធិការជំនាញ ជាច្រើនរបស់ AIPA ដូចជា កិច្ចប្រជុំគណៈកម្មាធិការប្រតិបត្តិ គណៈកម្មាធិការសមាជិកសភាស្ត្រី(WAIPA) គណៈកម្មាធិការនយោបាយ គណៈកម្មាធិការសេដ្ឋកិច្ច គណៈកម្មាធិការសង្គមកិច្ច គណៈកម្មាធិការរៀបចំ និងកិច្ចប្រជុំរវាង AIPA ជាមួយបណ្តាប្រទេសសង្កេតការណ៍ ជាដើម។
វត្តមានរបស់គណៈប្រតិភូជាន់ខ្ពស់សភាកម្ពុជានៅលើឆាកអន្តរជាតិ គឺជាការបំពេញបេសកកម្មការទូតសភានៅក្នុងការចូលរួមកសាងសុខសន្តិភាព ស្ថិរភាពសង្គម និងការអភិវឌ្ឍដោយចីរភាពនៅក្នុងតំបន់និងពិភពលោក និងជាការកសាងកិត្យានុភាពដល់សភានិងប្រទេសជាតិ នៅលើឆាកអន្តរជាតិ ផងដែរ៕ ដោយ៖កូឡាប
