ប្រធានាធិបតីអាមេរិច លោកដូណាល់ ត្រាំ បានថ្លែងកាលពីថ្ងៃសុក្រម្សិលមិញថា សម្ពាធសេដ្ឋកិច្ចរបស់អាមេរិចលើចិន បានការពារមិនឲ្យអាជ្ញាធរធ្វើការបង្រ្កាបយ៉ាងអាក្រក់ទៅលើក្រុមអ្នកតវ៉ា នៅក្នុងទីក្រុងហុងកុង។
លោកត្រាំបានថ្លែងដូច្នេះនៅសេតវិមានថា “ដោយសារតែអ្វីដែលខ្ញុំកំពុងធ្វើទាក់ទងនឹងបញ្ហាពាណិជកម្ម គឺវាពិតជាជួយរក្សាកម្តៅ”។
លោកត្រាំអះអាងថា ព្រឹត្តិការណ៍នានានៅក្នុងទីក្រុងហុងកុងជាប់ទាក់ទងទៅនឹងសង្រ្គាមពាណិជកម្ម ហើយលោកបញ្ជាក់ថា កាលពីសប្តាហ៍មុន អ្នកចរចារបស់ចិនហាក់បង្ហាញពីអារម្មណ៍ក្នុងការបង្កើតកិច្ចព្រមព្រៀងជាងមុន។
លោកថ្លែងប្រាប់អ្នកសារព័ត៌មានថា “បើវាមិនជាប់ទាក់ទងនឹងការចរចាពាណិជ្ជកម្មទេ ទីក្រុងហុងកុងអាចនឹងជួបបញ្ហាធ្ងន់ធ្ងរជាងនេះទៀត”។ លោកក៏បានស្នើឲ្យក្រុងប៉េកាំងដោះស្រាយបញ្ហានៅហុងកុងប្រកបដោយមនុស្សធ៌ម។
ការអះអាងរបស់លោក ត្រាំ បានកើតឡើងនៅថ្ងៃជាមួយគ្នា ដែលសកម្មជនប្រជាធិបតេយ្យហុងកុងដ៏លេចធ្លោចំនួន ៣នាក់ ត្រូវបានអាជ្ញាធរចាប់ខ្លួន។
លោក ត្រាំក៏បានអះអាងផងដែរថា ការយកពន្ធថ្មីលើផលិតផលនាំចូលពីចិននឹងចាប់ផ្តើមនៅថ្ងៃអាទិត្យនេះ៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia