បាត់ដំបង ៖ កម្លាំងនគរបាលជំនាញខេត្តបាត់ដំបងបានស្រាវជ្រាវឃាត់ខ្លួនក្រុមអ្នកលេង៣នាក់ បញ្ជូនទៅតុលាការ បន្ទាប់ពីបានប្រើអំពើហិង្សាដោយចេតនាកាប់ទៅលើជនរងគ្រោះបណ្តាលអោយរបួសចំនួន២នាក់ ។
លោកវរសេនីយ៍ទោ ឈឿង គឹមសុង ប្រធានការិយាល័យនគរបាលព្រហ្មទណ្ឌកម្រិតស្រាល នៃស្នងការនគរបាលខេត្តបានប្រាប់អោយដឹងថា ក្រោមការយកចិត្តទុកដាក់ពង្រឹងសន្តិសុខសាធារណៈ ពិសេសនៅថ្នាក់មូលដ្ឋាន លោកឧត្តមសេនីយ៍ទោ អ៊ុច សុខុន ស្នងការនគរបាលខេត្តបាត់ដំបង ក៏ដូចជាស្នងការរងផែនការងារនគរបាលព្រហ្មទណ្ឌ លោកឧត្តមសេនីយ៍ត្រី ជេត វណ្ណនី បានជំរុញដល់កម្លាំងពាក់ពន្ធ័បើកការស្រាវជ្រាវបន្ទាន់មួយ រហូតកំណត់មុខសញ្ញា ហើយស្ទាក់ឃាត់ខ្លួនជនសង្ស័យបានចំនួន៣នាក់ ក្នុងចំណោមជនបង្កចំនួន១១នាក់ផ្សេងទៀតកំពុងគេចខ្លួន និងត្រូវបន្តកំណត់មុខសញ្ញាបន្ថែមទៀតដើម្បីនាំខ្លួនមកអនុវត្តទោសតាមផ្លូវច្បាប់។
ជនសង្ស័យចំនួន៣នាក់ រួមទាំងបក្សពួកចំនួន១១នាក់ខាងលើ កាលពីព្រលប់ថ្ងៃទី១៨ ខែសីហា ឆ្នាំ២០១៩ បានជិះម៉ូតូសំឡឹងមើលមុខជនរងគ្រោះដែលមានគ្នាចំនួន៧នាក់កំពុងអង្គុយលេងត្រង់ចំនុចផ្លូវហាយវ៉េ ក្នុងភូមិកំពង់សីមា សង្កាត់វត្តគរ ក្រុងបាត់ដំបង ហើយភ្លាមៗក៏ជនបង្កបានស្ទុះដកយកពូថៅ កាំបិត បំពង់ទីបកាប់ និងវាយផ្ទួនៗទៅលើជនរងគ្រោះអោយតដៃមិនរួចបណ្ដាលអោយរងរបួសធ្ងន់ត្រូវបញ្ជូនទៅកាន់នៅមន្ទីរពេទ្យដើម្បីសង្គ្រោះ ។
ប្រភពខាងលើបានប្រាប់អោយដឹងដែរថា មុខសញ្ញាជនសង្ស័យចំនួន៣នាក់ដែលឃាត់ខ្លួនបានមានឈ្មោះ មាស វិចិត្រ ភេទប្រុស អាយុ២៥ឆ្នាំ ឈ្មោះពុធ សុវណ្ណរៈ ភេទប្រុស អាយុ២៥ឆ្នាំ ទាំង២នាក់មានទីលំនៅក្នុងភូមិខ្សាច់ពោយ សង្កាត់វត្តគរ ក្រុងបាត់ដំបង និងម្នាក់ទៀតឈ្មោះផល សុផា ហៅប៉ែត ភេទប្រុស អាយុ ២០ឆ្នាំ រស់នៅក្នុងភូមិព្រែកព្រះស្ដេច សង្កាត់ព្រែកព្រះស្ដេច ក្រុងបាត់ដំបង ខេត្តបាត់ដំបង ។ រីឯជនរងគ្រោះឈ្មោះឃត ឆាណុន ភេទប្រុស អាយុ១៧ឆ្នាំ រស់នៅភូមិអូម៉ាល់ សង្កាត់អូរម៉ាល់ ក្រុងបាត់ដំបង រងរបួសត្រង់ដៃស្ដាំ និងឈ្មោះជុំ ភក្ត្រា ភេទប្រុស អាយុ១៥ឆ្នាំមានទីលំនៅភូមិកំពង់សីមា សង្កាត់វត្តគរ ក្រុងបាត់ដំបង រងរបួសត្រង់ក្បាលផ្នែកខាងលើ ។
ប្រតិបត្តិការបង្ក្រាបក្នុងករណីប្រើហឹង្សាដោយចេតនាមានស្ថានទម្ងន់ទោសនេះសមត្ថកិច្ចដកហូតបានវត្ថុតាងកាំបិតកែច្នៃចំនួន១ដើម និងកូនពូថៅចំនួន១ដើមផងដែរ ។ ករណីខាងដើមកម្លាំងការិយាល័យជំនាញបានរៀបចំសំណុំបែបបទបញ្ជូនវត្ថុតាង និងជនសង្ស័យទៅកាន់តុលាកានៅថ្ងៃទី៣ ខែកញ្ញាកន្លងមកនេះ៕ ដោយ ៖ កូឡាប
