ទីក្រុងប៉េកាំង កាលពីថ្ងៃអង្គារម្សិលមិញនេះ បានប្រកាសគាំទ្រពេញទំហឹងចំពោះមេដឹកនាំហុងកុង គឺអ្នកស្រី Carrie Lam ក្រោយពេលមានការបែកធ្លាយខ្សែអាត់សំឡេងដោយអ្នកស្រីនិយាយថា អ្នកស្រីចង់ចុះចេញពីដំណែង ដោយសារតែការតវ៉ាអស់រយៈពេលជាង ៣ខែនៅទីក្រុង។
“ពួកយើងគាំទ្រអ្នកស្រី Carrie Lam ពេញទំហឹងក្នុងការដឹកនាំរដ្ឋាភិបាលនៃតំបន់រដ្ឋបាលពិសេស”។ នេះបើតាមការបញ្ជាក់របស់លោក Yang Guang អ្នកនាំពាក្យសម្រាប់កិច្ចការហុងកុង និងម៉ាកាវ របស់រដ្ឋាភិបាលមជ្ឈិមចិន។
ចំណែកអ្នកនាំពាក្យម្នាក់ទៀតឈ្មោះ Xu Luying បានថ្លែងនៅក្នុងសន្និសីទថា ទីក្រុងប៉េកាំងមានទំនុកចិត្តថា រដ្ឋាភិបាលហុងកុងមានឆន្ទៈ និងសមត្ថភាពក្នុងការបញ្ចប់អំពើហឹង្សាបានយ៉ាងលឿនតាមតែអាចធ្វើបាន។
ទោះយ៉ាងណារដ្ឋាភិបាលចិនធ្លាប់ព្រមានថា ខ្លួននឹងមិនអង្គុយនៅស្ងៀមឡើយ ប្រសិនជាស្ថានការណ៍មិនអាចគ្រប់គ្រងបាន និងធ្វើឲ្យគ្រោះថ្នាក់ដល់អធិបតេយ្យភាពជាតិ។
អ្នកនាំពាក្យ បានថ្លែងថា “ការបញ្ចប់អំពើហឹង្សា ភាពចលាចល និងការស្ថារសណ្តាប់ធ្នាប់ឡើងវិញ គឺជាកិច្ចការបន្ទាន់ដែលត្រូវធ្វើនៅហុងកុង”។
អ្នកស្រីបន្ថែមថា “រដ្ឋាភិបាលមជ្ឈិមនឹងមិនបណ្តែតបណ្តោយឲ្យស្ថានការណ៍នៅហុងកុង បន្តកើតឡើងឥតស្រាកស្រាន្តនោះឡើយ។ ប្រសិនជាស្ថានភាពបន្តដុនដាប និងឈានដល់ដំណាក់កាលដែលធ្វើឲ្យគ្រោះថ្នាក់ដល់អធិបតេយ្យភាព និងសន្តិសុខ វាគឺហួសពីការគ្រប់គ្រងរបស់រដ្ឋាភិបាលហុងកុង ហើយរដ្ឋាភិបាលមជ្ឈិមនឹងមិនអង្គុយនៅស្ងៀមឡើយ”។
សូមបញ្ជាក់ថា ទីក្រុងហុងកុង ដែលជាអតីតដែនដីអាណានិគមន៍របស់អង់គ្លេស ត្រូវបានញាំញីដោយការធ្វើបាតុកម្មដ៏ធំ មិនធ្លាប់មានអស់រយៈពេលជាង ៣ខែមកហើយ។ ការផ្ទុះបាតុកម្មកើតឡើងដោយសារតែច្បាប់ធ្វើបត្យាប័នដែលច្បាប់នេះ អនុញ្ញាតិឲ្យមានការបញ្ជូនជនសង្ស័យទៅធ្វើការកាត់ទោសនៅប្រទេសចិនបាន។
ក្រុមអ្នកតវ៉ា បានទាមទារឲ្យរដ្ឋាភិបាលហុងកុង បោះបង់ចោលច្បាប់នោះទាំងស្រុង និងឲ្យមេដឹកនាំហុងកុង ដែលគាំទ្រដោយរបបប៉េកាំងចុះចេញពីដំណែង៕
ហុងកុង ត្រូវបានអង់គ្លេសប្រគល់ឲ្យចិនកានកាប់វិញក្នុងឆ្នាំ ១៩៩៧ ក្រោមកិច្ចព្រមព្រៀង ប្រទេសមួយ ប្រព័ន្ធដឹកនាំពីរ៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia
