ខេត្តព្រះសីហនុ ៖ សមត្ថកិច្ចកងរាជអាវុធហត្ថស្រុកកំពង់សិលាបានឲ្យដឹងថា មកទល់នឹងម៉ោង ៦ព្រឹកថ្ងៃទី៥ ខែកញ្ញា ឆ្នាំ២០១៩នេះ អាជ្ញាធរបានបើកឲ្យធ្វើចរាចរណ៍ឆ្លងកាត់ឡើងវិញជាធម្មតាហើយ នៅស្ពានស្ទឹងសំរោង ផ្លូវជាតិលេខ៤ ទាំងរថយន្តតូច និងរថយន្តធំ ក្រោយពីទឹកបានស្រកចុះវិញជាបណ្តើរៗ។
កាលពីយប់ថ្ងៃទី៤ ខែកញ្ញាម្សិលមិញ អាជ្ញាធរស្រុកកំពង់សិលា បានបិទផ្លូវជាតិលេខ៤ នៅចំណុចស្ពានស្ទឹងសំរោង ជាច្រើនម៉ោង មិនឲ្យអ្វើចរាចរណ៍ឆ្លងកាត់។
គួររំលឹកថា ជាបន្តបន្ទាប់មកនេះ នៅពេលមានភ្លៀងធ្លាក់ខ្លាំង ស្ថានភាពកម្ពស់ទឹកនៅចំណុចស្ពានស្ទឹងសំរោង ឃុំអូរបាក់រទេះ ស្រុកកំពង់សិលា ត្រង់គីឡូម៉ែត្រលេខ ១១៥-១១៦ ផ្លូវជាតិលេខ ៤ ទឹកតែងបានឡើងកម្ពស់ និងហូរកាត់ផ្លូវប្រវែង ១០០ ម៉ែត្រ ត្រង់កន្លែងទំនាប។ ហើយថា នៅពេលទឹកឡើងខ្ពស់ រាល់ការធ្វើចរាចរណ៍ ត្រូវអាជ្ញាធរផ្អាកមិនឲ្យដំណើរការទេ នៅពេលទឹកឡេីងដល់ ៦និង០០ម៉ែត្រ និងត្រូវបិទផ្លូវជាតិលេខ៤បណ្តោះអាសន្ន៕ ដោយ៖ ដែន សីមា
