ភ្នំពេញ៖ ដោយមានការចង្អុលបង្ហាញដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន ក្នុងឱកាសកិច្ចប្រជុំពេញអង្គគណៈរដ្ឋមន្ត្រី កាលពីថ្ងៃទី ៣០ ខែ សីហា ឆ្នាំ ២០១៩ កន្លងមក, នាព្រឹកថ្ងៃទី ៤ ខែ កញ្ញា ឆ្នាំ ២០១៩, គណៈកម្មាធិការគោលនយោបាយសេដ្ឋកិច្ច និង ហិរញ្ញវត្ថុ (គ.ស.ហ) ដឹកនាំដោយលោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធាន គ.ស.ហ បានរៀបចំកិច្ចប្រជុំអន្តរក្រសួង-ស្ថាប័នពាក់ព័ន្ធ ជាបន្ទាន់, ដើម្បីពិនិត្យ និងពិភាក្សាអំពី “ការធ្វើអាទិភាវូបនីយកម្ម ក្នុងការជួសជុល និង សាងសង់ផ្លូវថ្នល់ក្នុងខេត្តព្រះសីហនុ” ។
កិច្ចប្រជុំរៀបចំនៅទីស្ដីការក្រសួងសេដ្ឋកិច្ច និងហិរញ្ញវត្ថុ និងបានការអញ្ជើញចូលរួមពីលោក ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់, លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន, លោក ថោង ខុន រដ្ឋមន្ត្រីក្រសួង ទេសចរណ៍, លោក សាយ សំអាល់ រដ្ឋមន្ត្រីក្រសួងបរិស្ថាន, លោក តឹករ៉េត សំរេច រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានក្រុមការងារថ្នាក់ជាតិ ចុះមូលដ្ឋានក្រុងព្រះសីហនុ, លោក គួច ចំរើន អភិបាលនៃគណៈ អភិបាលខេត្តព្រះសីហនុ និងថ្នាក់ ដឹកនាំជាន់ខ្ពស់នៃក្រសួង-ស្ថាប័នពាក់ព័ន្ធរបស់រាជរដ្ឋាភិបាល ។
បើតាមសេចក្តីប្រកាសព័ត៌មាន ស្តីពីកិច្ចប្រជុំគណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ (គ.ស.)
ស្តីពីការធ្វើអាទិភាវូបនីយកម្មក្នុងការជួសជុល និងសាងសង់ផ្លូវថ្នល់ ប្រព័ន្ធរំដោះទឹកភ្លៀង និងប្រព័ន្ធទឹកកខ្វក់ក្នុងខេត្តព្រះសីហនុបានបញ្ជាក់ថា បន្ថែមលើសេចក្តីសម្រេចរបស់កិច្ចប្រជុំ ត. ស.ហ កាលពីថ្ងៃទី ២៨ ខែ សីហា ឆ្នាំ ២០១៩ និងដើម្បីឆ្លើយតប ឲ្យកាន់តែមានប្រសិទ្ធភាពខ្ពស់តាមសេចក្តីត្រូវការចាំបាច់ជាក់ស្តែង នៅខេត្តព្រះសីហនុ, កិច្ចប្រជុំ គ. ស.ហ បន្ទាន់នេះបានពិនិត្យ និងពិភាក្សាលើការកំណត់ជាអាទិភាព រៀបចំក្របខណ្ឌ យន្តការនៃការអនុវត្តការងារឱ្យបានច្បាស់លាស់ចំពោះការជួសជុល កសាងផ្លូវក្នុងក្រុង ផ្លូវវាងក្រុង ប្រព័ន្ធរំដោះទឹកភ្លៀង និងប្រព័ន្ធទឹកកង្វក់ ក្នុងខេត្តព្រះសីហនុ ដើម្បីធានាបាននូវប្រសិទ្ធភាពការងារ សំណង់ប្រកបដោយគុណភាព ទាន់ពេលវេលា ក៏ដូចជា តម្លៃនៃថវិកា ។ ជាលទ្ធផលអង្គប្រជុំ បានឯកភាពលើវិធាការ និងគោលការណ៍បន្ថែម ដូចខាងក្រោម ៖ ទី១. បន្តអនុវត្តន៍គោលការណ៍ដែលបានសម្រេចក្នុងកិច្ចប្រជុំ គ. ស.ហ កាលពីថ្ងៃទី ២៨ ខែ សីហា ឆ្នាំ២០១៩ កន្លងទៅ ចំពោះវិធានការការងារបន្ទាន់ និងអាទិភាព ក្នុងការស្តារអូរធម្មជាតិទាំង ៥ និងលូដែលមានស្រាប់ ដែលសព្វថ្ងៃកំពុងទទួលរងការរំលោភយក ចំណីអូរ និងប្រឡាយ ដើម្បីបើកមុខទឹកហូរ និងដោះស្រាយជំនន់ទឹកភ្លៀង ។ ទី ២, ក្នុងការស្តារ ជួសជុលផ្លូវក្នុងក្រុង ផ្លូវវាងក្រុង ការស្តាររៀបចំអូររំដោះទឹកភ្លៀង និងប្រព័ន្ធទឹកកង្វក់, កិច្ចប្រជុំ បានកំណត់អាទិភាព និងវាយតម្លៃពីទំហំនៃការស្តារ និងជួសជុលកំណាត់ផ្លូវទាំង ២២ ខ្សែ និងផ្លូវវាងក្រុង តាមបទដ្ឋានស្តង់ដា ដែលសិក្សាដោយគណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា ដោយផ្សារភ្ជាប់ជាមួយនឹងគុណភាព សោភ័ណភា, សុវត្ថិភាព ម្រេវការហិរញ្ញប្បទាន, តម្រូវការនៃការដោះស្រាយផលប៉ះពាល់ ក្នុងនោះ ត្រូវផ្តោតលើបច្ចេកទេសក្នុងការសាងសង់ ការត្រួតពិនិត្យគុណភាព សំណង, ទំហំផ្លូវ, ការបង្កប់ប្រព័ន្ធខ្សែកាប, ទូរស័ព្ទ
, បំពង់ទឹកស្អាត និងបណ្តាញទឹកកខ្វក់ ទឹកភ្លៀង ជាដើម ។ ទី ៣ ចំពោះប្រភពហិរញ្ញប្បទាន , បន្ថែមលើការឯកភាព ជាគោលការណ៍របស់ប្រមុខរាជរដ្ឋាភិបាល ដែលអនុញ្ញាតឲ្យប្រើប្រាស់ថវិកាសន្សំរបស់រាជរដ្ឋាភិបាល ចំនួន ១០០ លានដុល្លារអាមេរិក, ត្រូវអនុវត្តន៍គោលការណ៍ * យកស្លឹកត្នោតខ្ចប់ស្ករត្នោត” ដែលជាការណែនាំដ៏ខ្ពង់ខ្ពស់របស់ សម្តេចតេជោនាយករដ្ឋមន្ត្រី ចំពោះការស្ថាបនា ជួសជុល កសាងផ្លូវក្នុងក្រុង ផ្លូវវាងក្រុង ប្រព័ន្ធរំដោះទឹកភ្លៀងនិងប្រព័ន្ធទឹកកង្វក់ ក្នុងខេត្តព្រះសីហនុនេះ ។
ជាទីបញ្ចប់, អង្គប្រជុំ ក៏បានប្តេជ្ញាអនុវត្តតាមសេចក្តីសម្រេចដ៏ថ្លៃថ្លារបស់ប្រមុខរាជរដ្ឋាភិបាល ក៏ដូចជាស្មារតីអង្គប្រជុំ គ. ស.ហ និង បន្តផ្តល់កិច្ចសហការប្រកបដោយស្មារតីទទួលខុសត្រូវខ្ពស់ក្នុងការអនុវត្តន៍កិច្ចការនេះ ។
លោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី និងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ តំណាងឲ្យអង្គប្រជុំទាំងមូល ក៏បានថ្លែងអំណរគុណយ៉ាងជ្រាលជ្រៅជូនចំពោះ សម្តេចអគ្គមហាសេនាបតីតេជោ ហ៊ុន សែននាយករដ្ឋមន្ត្រី ដែលតែងតែបានយកចិត្តទុកដាក់ខ្ពស់ ណែនាំចង្អុលបង្ហាញ និង ដាក់ចេញវិធានការណ៍ជាបន្តបន្ទាប់ ក្នុងការដោះស្រាយបញ្ហាសំដៅលើកកម្ពស់ជីវភាពរស់នៅរបស់ប្រជាពលរដ្ឋកម្ពុជា និយាយជារួម និងដោយឡែក ក្នុងការស្តារ និងកសាងហេដ្ឋារចនាសម្ព័ន្ធក្នុងខេត្តព្រះសីហនុនេះ ៕ ដោយ ៖ បញ្ញាស័ក្តិ