ភ្នំពេញ៖ រដ្ឋបាលខណ្ឌច្បារអំពៅ បានដុតកម្ទេចចោលទូហ្គេមបាញ់ត្រី ចំនួន១១ទូ ព្រមទាំងឧបករណ៍ សម្ភារប្រើប្រាស់មួយចំនួនទៀត ដែលបានរឹបអូស មកពីមូលដ្ឋានសង្កាត់ច្បារអំពៅទី២ និងសង្កាត់ព្រែកប្រា។ ពិធីដុតបំផ្លាញធ្វើឡើង នាព្រឹកថ្ងៃទី៦ ខែកញ្ញា ឆ្នាំ២០១៩នេះ ។
លោក ចេង មុនីរ៉ា អភិបាលខណ្ឌច្បារអំពៅ ដែលចូលរួមដុតបំផ្លាញទូហ្គេមបាញ់ត្រី បានថ្លែងថា សម្រាប់ការបើកកន្លែងហ្គេមខុសច្បាប់ នៅក្នុងទឹកដីខណ្ឌច្បារអំពៅ ចាប់ពីពេលនេះទៅ រដ្ឋបាលខណ្ឌ មិនចេញច្បាប់អនុញ្ញាតឲ្យបើកនោះទេ ដែលបញ្ហានេះ នាំឲ្យប៉ះពាល់ ដល់ការរៀនសូត្ររបស់ក្មេងៗ ក្រោយពីពួកគេបានគេចសាលា ចំណាយពេលវេលា និងលុយកាក់សម្រាប់ទៅលេងហ្គេមទាំងនោះ។
លោកអភិបាលខណ្ឌ បានបន្ថែមថា ទាក់ទងទៅនឹងអ្នក ដែលមានច្បាប់កន្លងមក ត្រូវចូលរួមអនុវត្តន៍ឲ្យបានល្អ ទៅតាមច្បាប់កំណត់។ ប្រសិនបើនៅក្នុងអាជីវកម្មណាមួយ មានបង្កប់នូវទូហ្គេមស៊ីសងខុសច្បាប់ រដ្ឋបាលខណ្ឌច្បារអំពៅ នឹងចុះបិទ ព្រមទាំងដកហូត យកមកកម្ទេចចោល ដោយស្វ័យប្រវត្តិ។
លោកអភិបាលខណ្ឌច្បារអំពៅ បានអំពាវនាវដល់អ្នកធ្វើអាជីវកម្មមានច្បាប់ទាំងឡាយ សូមកុំឲ្យអ្នកដែលមានពាក់ឯកសណ្ឋានសិស្ស ចូលលេងក្នុងម៉ោងសិក្សាជាដាច់ខាត។ ជាមួយគ្នានេះ ក៏សូមឲ្យម្ចាស់ទាំងនោះ ជួយសរសេរបម្រាម នៅមុខកន្លែងរបស់ខ្លួននីមួយៗ ដោយសសេរថា ហាមលេងអ៊ីនធឺណិតក្នុងម៉ោងសិក្សា ។ ការសរសេរដាក់ដូចនេះ ក៏ព្រោះតែកន្លងមក មានអ្នកចូលលេងទៅស្រាវជ្រាវ ដើម្បីជាប្រយោជន៍ដល់ការសិក្សាណាស់ គឺពួកគេគ្រាន់តែចូលទៅលេងហ្គេមតែប៉ុណ្ណោះ។
លោកអភិបាលខណ្ឌ ក៏បានណែនាំដល់ម្ចាស់អាជីវកម្មហ្គេមទាំងអស់ ជាពិសេសអ្នកដែលមានច្បាប់ត្រឹមត្រូវ ចូលរួមអនុវត្តន៍ឲ្យបានល្អ តាមគោលការណ៍ច្បាប់ មិនត្រូវកែច្នៃពីហ្គេមកម្សាន្ត ឲ្យទៅជាហ្គេមស៊ីសងនោះទេ។ ចំពោះអ្នកមិនមានច្បាប់អនុញ្ញាតត្រឹមត្រូវ ត្រូវតែទៅសុំច្បាប់ពីមន្ទីរពាក់ព័ន្ធ បើមិនដូចច្នេះទេ រដ្ឋបាលខណ្ឌ នឹងមានវិធានការណ៍ទៅតាមផ្លូវច្បាប់៕ដោយ: កូឡាប
