ភ្នំពេញ ៖ សេចក្ដីប្រកាសព័ត៌មាន របស់ក្រសួងសាធារណការ និងដឹកជញ្ជូននៅថ្ងៃទី 15 ខែកញ្ញានេះ បានឲ្យដឹងថា ក្រុមអ្នកជំនាញ បច្ចេកទេសសាងសង់ស្ពាន មកពីប្រទេសចិន បានបញ្ជាក់ថា សាឡង់ដឹកខ្សាច់ដែលជាប់កឿងខាងលើ មិនធ្វើឲ្យប៉ះពាល់ធ្ងន់ធ្ងរដល់សសរស្ពាន និង តួស្ពានព្រែកតាមាក់ទេ។
ក្រសួងសាធារណការ និងដឹកជញ្ជូន នៅថ្ងៃ អាទិត្យ ២រោច ខែភទ្របទ ឆ្នាំកុរ ព.ស ២៥៦៣ ត្រូវនឹងថ្ងៃទី ១៥ ខែកញ្ញា ឆ្នាំ២០១៩ បានចេញសេចក្តីប្រកាសព័ត៌មាន ពាក់ព័ន្ធនិងសាឡង់បូមខ្សាច់ដោយជាប់គឿងនិងគល់ស្ពានព្រែកតាមាក់។
អ្នកនាំពាក្យ ក្រសួងសាធារណការ និងដឹកជញ្ជូន សូមជម្រាបជូនសាធារណជនមេត្តាជ្រាបថា កាលពី
រសៀលថ្ងៃអាទិត្យ ទី០៨ ខែកញ្ញា ឆ្នាំ២០១៩ កន្លងទៅនេះ មានឧប្បទវហេតុមួយកើតឡើង ដោយសាឡង់
ដឹកខ្សាច់មួយគ្រឿង ត្រូវបានកំលាំងទឹកបោកហើយបានភ្លើងជាប់នឹងជើងតាងនៃសសរស្ពានផ្នែកកណ្តាល
ប៉ែកខាងកើត នៃស្ពានព្រែកតាមាក់ ដែលស្ថិតនៅក្នុងស្រុកខ្សាច់កណ្តាល និងស្រុកមុខកំពូល ខេត្តកណ្តាល ។
ក្រោយពីបូមខ្សាច់ចេញពីសាឡង់អស់ ក្រុមការងារបច្ចេកទេសរបស់ក្រសួងសាធារណការ និងដឹកជញ្ជូន ដឹកនាំដោយ ឯកឧត្តម ទេសរដ្ឋមន្ត្រី ស៊ុន ចាន់ថុល ដោយមានការចូលរួមពីតំណាងក្រសួងរ៉ែ និង
ថាមពល អភិបាល នៃគណៈអភិបាលខេត្តកណ្តាល តំណាងអាជ្ញាធរជាតិគ្រប់គ្រងគ្រោះមហន្តរាយ កងអន្តរាគមន៏អង្គរក្ស សម្តេចតេជោ និងក្រុមអ្នកជំនាញការបច្ចេកទេសសាងសង់ស្ពានមកពីប្រទេសចិន ព្រមទាំង
មានកិច្ចសហការជាមួយអាជ្ញាធរមានសមត្ថកិច្ចពាក់ព័ន្ធ បានធ្វើការអូសសាឡង់ជាច្រើនលើកច្រើនសារ ហើយជម្រើសចុងក្រោយក្រុមការងារបានសរុបកំលាំងរួមគ្នា អូសទាំងផ្លូវទឹក អូសទាំងលើគោក នៅតែមិនអាចអូសសាឡង់ខាងលើនេះបាន ដោយសារសម្ពាធទឹកខ្លាំងពេក ។
បន្ទាប់ពីបានពិភាក្សាយ៉ាងល្អិតល្អន់ជាមួយ ក្រុមបច្ចេកទេសក្រសួងសាធារណការ និងដឹកជញ្ជូន និងក្រុមអ្នកជំនាញការបច្ចេកទេសសាងសង់ស្ពានមកពីប្រទេសចិន បានបញ្ជាក់ថា សាឡង់ដឹកខ្សាច់ដែលជាប់ឡើងខាងលើ មិនធ្វើអោយមានផលប៉ះពាល់ធ្ងន់ធ្ងរដល់សសរ និងតួស្ពានព្រែកតាមាក់ទាំងមូលទេ ។
ដូច្នេះក្រុមការងារបានសម្រេចធ្វើការផ្អាកនូវប្រតិបត្តិការអូសសាឡង់ខាងលើនេះជាបណ្តោះអាសន្ន
ហើយក្រសួងសាធារណការ និងដឹកជញ្ជូន នឹងបន្តប្រតិបត្តិការសាជាថ្មី នៅពេលទឹកមានសភាព ធូរស្រាលឡើងវិញ៕ ដោយ៖កូឡាប
