ភ្នំពេញ៖ ទឹកជំនន់បានវាយប្រហារខេត្តចំនួន ៧ ក្នុងរយៈពេលកន្លះខែមកនេះ បានបណ្តាលឲ្យមនុស្ស ១២នាក់ បានស្លាប់ និងជាង ១ម៉ឺនគ្រួសារ ត្រូវបានជម្លៀសចេញពីផ្ទះសម្បែងទៅកាន់ទីទួលសុវត្ថិភាព បង្កផលប៉ះពាល់ដល់ប្រជាពលរដ្ឋសរុប ៨៧.៤៦៩គ្រួសារ ផ្ទះប្រជាពលរដ្ឋ ៥១ខ្នងផ្ទះ ក៏ត្រូវរុះរើបន្ទាន់ដោយសារបាក់ច្រាំងទន្លេ ។
លោក កែវ វី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានប្រាប់សារព័ត៌មានក្នុងស្រុកថា គិតត្រឹមថ្ងៃទី១៥ ខែកញ្ញានេះ ទឹកជំនន់ទន្លេមេគង្គ និងជំនន់ទឹកភ្លៀង បានប៉ះពាល់ដល់ខេត្តចំនួន ៧ រួមមានខេត្តព្រះវិហារ ស្ទឹងត្រែង ក្រចេះ ត្បូងឃ្មុំ កំពង់ចាម កំពង់ធំ និងខេត្តព្រៃវែង។
លោកបានឱ្យដឹងទៀតថា គ្រោះទឹកជំនន់ បានបណ្តាលឲ្យមនុស្ស ១២នាក់ បានស្លាប់ ក្នុងនោះ មានកុមារ ៦នាក់ផងដែរ ។ ចំណែកមនុស្ស ៥នាក់ទៀត បានរងរបួសដោយសារពស់ចឹក ។ មនុស្សមួយចំនួន បានស្លាប់ដោយសារលង់ទឹកទន្លេ មួយចំនួនទៀត ស្លាប់ដោយសារលង់ទឹកបឹង និងព្រែកនៅក្បែរៗផ្ទះ ស្លាប់ដោយសារការធ្វេសប្រហែសរបស់អាណាព្យាបាល មានកុមារម្នាក់ស្លាប់ដោយសារទឹកគួចទៅបាត់នៅឯខេត្តព្រះវិហារ ពេលជិះម៉ូតូជាមួយឱពុកម្ដាយឆ្លងកាត់ទំនប់បង្ហៀរ។
លោក កែវ វី ប្រាប់ថា៖ យើងសោកស្ដាយណាស់ដែលចំនួនអ្នកស្លាប់ បន្ទាប់ពីទឹកជំនន់នេះ មានរហូតដល់១២នាក់។ សូមអំពាវនាវឱ្យពលរដ្ឋទាំងអស់ មានការប្រុងប្រយ័ត្នខ្ពស់ ពិសេសសុវត្ថិភាពកូនចៅតូចៗ ក្នុងគ្រាដែលទឹកឡើង។
លោក កែវ វី បានឲ្យដឹងថា ទឹកជំនន់ទន្លេមេគង្គបង្កផលប៉ះពាល់ដល់ប្រជាពលរដ្ឋសរុប ៨៧.៤៦៩គ្រួសារ ក្នុងនោះទឹកជន់លិចស្រែស្រូវជាង ៣៧.៨០១ហិចតា លិចចម្ការ ៣.៤៧០ហិចតា។ ទឹកជំនន់ជន់លិចសាលា ៣២៣កន្លែង លិចវត្តអារាម ១៥៣វត្ត និងលិចមណ្ឌលសុខភាព ២៨កន្លែង។ ច្រាំងទន្លេប្រវែង២២.៣៤៥ម៉ែត្រ នៅខេត្តក្រចេះ កំពង់ចាម និងត្បូងឃ្មុំ ដែលបង្កឱ្យផ្ទះប្រជាពលរដ្ឋ ៥១ខ្នងផ្ទះ ក៏ត្រូវរុះរើបន្ទាន់។
លោក កែវ វី បានលើកឡើងទៀតថា ចំណាត់ការអន្តរាគមន៍ជួយប្រជាពលរដ្ឋ ដែលរងគ្រោះដោយទឹកជំនន់ គឺធ្វើឡើងដោយបានទាន់ពេលវេលា ពីគ្រប់ភាគីពាក់ព័ន្ធទាំងអស់។ ប្រជាពលរដ្ឋដែលមករស់នៅទីសុវត្ថិភាព ទទួលបានការផ្គត់ផ្គង់គ្រឿងឧបភោគបរិភោគ ទទួលបានការគាំពារផ្នែកសុខភាព ព្រមទាំងសន្តិសុខសុវត្ថិភាព ពីសំណាក់អាជ្ញាធរមូលដ្ឋាន។ យើងផ្តល់ជាថ្នាំពេទ្យ ជាស្បៀងសង្គ្រោះនេះ យើងធ្វើជាបន្តបន្ទាប់ និងទាន់ពេលវេលា ព្រោះរបស់ទាំងអស់នោះ មាននៅក្នុងស្តុកនៅតាមបណ្ដាខេត្តរួចហើយ។ ពលរដ្ឋឈឺល្មមៗ យើងអាចមើលនៅកន្លែង។ បើករណីណាធ្ងន់ យើងមានមធ្យោបាយបញ្ជូនបន្តទៅកាន់មន្ទីរពេទ្យខេត្តតែម្ដង៕ដោយ៖បញ្ញាស័ក្តិ
