បាត់ដំបង៖ ទឹកភ្លៀងដែលបានគ្របដណ្តប់គំរាមកំហែងដល់ស្រុកសំឡូត បានធូរស្រាលឡើងវិញហើយ ក្រោយពីអាជ្ញាធរជម្លៀសពលរដ្ឋជាច្រើនគ្រួសារចេញពីលំនៅដ្ឋានរកទីទួលមានសុវត្ថិភាព។
លោក សើ ម៉េត អភិបាលស្រុកសំឡូតនៅថ្ងៃទី១៧ ខែកញ្ញា ឆ្នាំ២០១៩នេះបានឲ្យដឹងថា ទឹកភ្លៀងបន្តធ្លាក់យ៉ាងគំហុកពេញមួយយប់ទល់ភ្លឺ ចាប់តាំងព្រលប់ថ្ងៃទី១៥ កញ្ញាមក បានបង្កឲ្យឃុំចំនួន៤ ក្នុងស្រុកសំឡូត រងការជន់លិច ពិសេសនៅតំបន់ទំនាបទីប្រជុំជនឃុំសំឡូត តាតោក ឃុំតាសាញ និងអូរតាទៀករបស់ស្រុកសំឡូត ក្នុងខេត្តបាត់ដំបង ។
ជំនន់ទឹកភ្លៀងនៅតំបន់ជួរភ្នំស្ថិតនៅប៉ែកខាងលើស្រុកសំឡូតនេះ បានបុកផ្តាច់ស្ពានយោលស្ទឹងក្រញូងខូចខាតទាំងស្រុង និងបង្ខំអោយអាជ្ញាធរស្រុកជាប់ព្រំដែនមួយនេះជម្លៀសប្រជាពលរដ្ឋចំនួន២៧គ្រួសារភ្លាមៗ ចេញពីលំនៅដ្ឋានជាបណ្តោះអាសន្ន ដើម្បីទៅរកទីទួលមានសុវត្ថិភាព។ អំណាចជំនន់ទឹកភ្លៀងហូរចាក់យ៉ាងគំហុកភ្លាមៗនេះ ធ្វើឲ្យប្រជាពលរដ្ឋត្រូវប្រញាប់ប្រញាល់រំដោះខ្លួនចេញ ដោយឡែកសម្ភារ ឬទ្រព្យសម្បត្តិសំខាន់ៗផ្សេងៗ មិនអាចយកចេញទាន់បានឡើយ។
លោកអភិបាលស្រុកសំឡូតបន្តថា មកដល់ព្រឹកថ្ងៃទី១៧ ខែកញ្ញានេះមេឃរាំងមិនបង្អុរទឹកភ្លៀង បានធ្វើឲ្យផ្នែកជាច្រើនដូចជាកំណាត់ផ្លូវ ស្ពាន ក៏ដូចលំនៅដ្ឋានរបស់ប្រជាពលរដ្ឋទឹកបានស្រក និងធ្វើដំណើរឆ្លងកាត់បានមួយចំនួនវិញហើយ ។ គ្រោះធម្មជាតិនេះមិនបណ្តាលឲ្យមានការប៉ះពាល់ដល់អាយុជីវិតមនុស្ស សត្វឡើយរាប់ទាំងការជួយសង្គ្រោះធានាសុវត្ថិភាពដល់ព្រះសង្ឃ និងប្រជាពលរដ្ឋចំនួន៣៦នាក់ ដែលជាប់នៅលើទីទួលមួយកន្លែងស្ថិតនៅក្នុងភូមិដូនព្រឹក។
ជំនន់ដែលហក់ឡើងយ៉ាងគំហុកខាងលើនេះ បានជោរជនបន្ទាប់ពីនៅទូទាំងស្រុកសំឡូត ពិសេសនៅតំបន់ភ្នំបានគ្របដណ្តប់ ទៅដោយភ្លៀងធ្លាក់យ៉ាងជោគជាំចាប់តាំងព្រលប់ថ្ងៃទី១៥ រហូតដល់រសៀលម៉ោង២.០០នាទីរសៀលថ្ងៃទី១៦ ខែកញ្ញា ទើបស្រកចុះបណ្តើរៗទៅវិញ ដោយសារមន្ត្រីជំនាញមន្ទីរធនធានទឹក និងឧតុនិយមខេត្តបាត់ដំបងបើកទ្វាទំនប់ទឹកពហុបំណងសេកសក ដើម្បីបញ្ចៀសទឹកឲ្យហូរចូលក្នុងស្ទឹងសង្កែចុះទៅផ្នែកខាងក្រោម៕ដោយ៖កូឡាប
