ភ្នំពេញ៖ ពិតជាមិនគួរអោយជឿ ប៉ុន្តែអ្វីៗវាបានកើតឡើងរួចទៅហើយ នោះគឺសំរាមបានកកក្នុងពោះប្រឡាយកំរាស់ជាង៣ម៉ែត្រ ក្រោយពីការរុះរើផ្ទះប្រជាពលរដ្ឋដោយស្ម័គ្រចិត្តនៅ ប្រឡាយស្ទឹងមានជ័យជាង១០០គ្រួសាររួចមក។
មន្ត្រីរដ្ឋបាលរាជធានីភ្នំពេញបានអោយដឹងថា សំរាមជាច្រើននៅកកក្នុងពោះប្រឡាយ កម្រាស់ពី ២,៥ម៉ែត្រ ទៅ ៣,៥ម៉ែត្រ ដែលបង្កអោយមានការកកស្ទះចរន្តទៅហូរនិងជាដើមចមបង្កអោយមានការលិចលង់កន្លងមកនោះ។ មន្ត្រីដដែរបានអោយដឹងទៀតថា ប្រជាពលរដ្ឋចំនួន ១៦៦គ្រួសារ បានស្ម័គ្រចិត្តរុះរើលំនៅដ្ឋានលើពោះប្រឡាយស្ទឹងមានជ័យដើម្បីអោយអាជ្ញាធរសាងសង់ប្រឡាយបេតុងថ្មី ភ្ជាប់ពីទ្វារទឹកដើមស្លែងផ្លូវលេខ ៣៧១ មកប្រឡាយនៅស្ពានស្ទឹងមានជ័យ ហើយខណៈរុះរើផ្ទះសំបែងរួចដាក់គ្រឿងចក្រចូលស្តារ ទើបបានដឹងថា សំរាមបានកកក្នុងពោះប្រឡាយកំរាស់ពី២.៥ម៉ែត្រ ទៅ ៣.៥ម៉ែត្រ ។
គួរបញ្ជាក់ថា ជាគម្រោងរបស់រដ្ឋបាលរាជធានីភ្នំពេញ នៅពេលដែលការស្ថាបនាប្រឡាយនិងផ្លូវអមសងខាងប្រឡាយនេះ រួចរាល់ រដ្ឋបាលរាជធានីភ្នំពេញ នឹងរៀបចំតបណ្តាញទឹកស្អាត ភ្លើងអគ្គីសនីចូលផ្ទះប្រជាពលរដ្ឋ រួមនឹងការដាក់បង្កោលភ្លើងសាធារណៈនៅលើផ្លូវនេះថែមទៀត ដើម្បីអោយតំបន់នេះក្លាយជាទីក្រុងស្ទឹងមានជ័យ ។
ប្រឡាយស្ទឹងមានជ័យដែលរដ្ឋបាលរាជធានីភ្នំពេញគ្រោងនឹងធ្វើការអភិវឌ្ឍនេះមានប្រវែង១៣៥០ម៉ែត្រ ដោយឆ្លងកាត់ខណ្ឌចំនួន២ នោះគឺខណ្ឌមានជ័យនិងខណ្ឌសែន សុខ ដែលមានប្រជាពលរដ្ឋរស់នៅនិងរងផលប៉ះពាល់ប្រឡាយនេះចំនួន៥៦២គ្រួសារ ហើយប្រជាពលរដ្ឋទាំងអស់នេះនឹងទទួលបានដីទំហំ៤គុណនិង៦ម៉ែត្រជាកម្មសិទ្ធិស្របច្បាប់នៅហ្នឹងកន្លែងតែម្តង។
ប្រឡាយស្ទឹងមានជ័យនឹងត្រូវសាងសង់ឡើង ដោយបុកស៊ីផាយដូចនៅប្រឡាយបាក់ទូកដែរ ដោយត្រូវធ្វើផ្លូវ៦ម៉ែត្រជាប្រភេទផ្លូវបេតុង រៀបចំតបណ្តាញទឹក ភ្លើងអគ្គីសនីចូលផ្ទះប្រជាពលរដ្ឋ ដាក់បង្កោលភ្លើងសាធារណៈនៅលើផ្លូវនេះថែមទៀត ។ ប្រឡាយស្ទឹងមានជ័យនេះបានដើរតួយ៉ាងសំខាន់ ក្នុងការនាំទឹកទំលាក់ចូលទៅបឹងទំពុន ជាគម្រោងតួប្រឡាយស្ទឹងមានជ័យមានទំហំ៨ម៉ែត្រ ចិញ្វើម២ ម៉ែត្រ សាងសង់ផ្លូវបេតុងទទឹង៦ម៉ែត្រ ផ្លូវមុខផ្ទះ៥ម៉ែត្រ ដីនៅសល់មុខផ្ទះ១ម៉ែត្រកន្លះនិងក្រោយផ្ទះកន្លះម៉ែត្រ៕ ដោយ៖កូឡាប
