ខេត្តស្វាយរៀង៖ លោកស្រីអភិបាលរងខេត្តស្វាយរៀង បានស្នើសុំដល់ម្ចាស់ក្រុមហ៊ុន សហគ្រាសដឹកជញ្ជូនទំនិញ និងម្ចាស់អាជីវករលក់គ្រឿងសំណង់ទាំងអស់ នៅក្នុងអំឡុងពេលកម្មករ កម្មការីនី ចេញពីផ្ទះមកធ្វើការ នឹងចេញពីធ្វើការទៅផ្ទះវិញ ដែលមានរថយន្តកុងតឺន័រ រថយន្តដឹកទំនិញធុនធ្ងន់ រថយន្តដឹកជញ្ជូនគ្រឿងសំណង់នានា ដែលធ្វើចរាចរណ៍តាមបណ្តោយផ្លូវជាតិលេខ១ ហាមធ្វើដំណើរ ពេលព្រឹកចាប់ពីម៉ោង ៦:០០នាទី ដល់ម៉ោង៧:០០នាទី, ពេលល្ងាចចាប់ពីម៉ោង៤:៣០នាទី ដល់ម៉ោង៥:៣០នាទី ដើម្បីកុំឲ្យមានការកកស្ទះ និងមានគ្រោះថ្នាក់ចរាចរកើតឡើងផងដែរ
លោកស្រី ឯក សុវណ្ណភារៈ អភិបាលរងខេត្ត និងជាអនុប្រធានគណៈកម្មការសុវត្ថិភាពចរាចរណ៍ផ្លូវគោកខេត្ត នៅថ្ងៃទី១៩ ខែកញ្ញា ឆ្នាំ២០១៩ បានអញ្ជើញជាអធិបតីក្នុង កិច្ចប្រជុំពិគ្រោះយោបល់ស្តីពីការសម្របសម្រួលយន្តការ ការពារគ្រោះថ្នាក់ចរាចរនៅតាមដងផ្លូវជាតិលេខ១ នៅតំបន់សេដ្ឋកិច្ចពិសេស តាយសេង ក្រុងបាវិត ។
លោក តី ស៊ីផន អនុប្រធានមន្ទីរសាធារណការនិងដឹកជញ្ជូនខេត្តស្វាយរៀង បានឲ្យដឹងថា: ចំពោះគ្រោះថ្នាក់ចរាចររយៈពេល៩ខែ កើនឡើងសរុបចំនួន ១២២លើក (លើផ្លូវជាតិ៨០លើក, ផ្លូវក្នុងខេត្ត៣៥លើក, ផ្លូវលំ៧លើក) បើប្រៀបធៀបនឹងរយៈពេល៩ខែ ឆ្នាំ២០១៨ គឺ១២២លើក លើ១២៨លើក ថយចុះ០៦លើកស្មើ៥% មនុស្សរងគ្រោះសរុបចំនួន៣០៧នាក់ ស្រី១៣៣នាក់ លើ២៦៩នាក់ កើនឡើង៣៨នាក់ ស្មើ១២% ក្នុងនោះបណ្ដាលឲ្យមនុស្សស្លាប់៧០នាក់ ស្រី១៣នាក់លើ៥៨នាក់ កើនឡើងចំនួន១២នាក់ស្មើ១៧%, របួសធ្ងន់៩៩នាក់ស្រី២៦នាក់ លើ១១២នាក់ ថយចុះចំនួន១៣នាក់ស្មើ១២%, របួសស្រាល១៣៨នាក់ស្រី៩៤នាក់ លើ៩៩នាក់ កើនឡើងចំនួន៣៩នាក់ស្មើ២៨% ។
លោកស្រី ឯក សុវណ្ណភារៈ បានមានប្រសាសន៍ថា: បញ្ហាប្រឈមនៃការគ្រោះថ្នាក់ចរាចរបណ្ដាលមកពី ការយល់ដឹងរបស់ប្រជាពលរដ្ឋនៅមានកម្រិត អំពីច្បាប់ចរាចរណ៍ផ្លូវគោក ។ មន្ត្រីរាជការមួយចំនួន មិនទាន់ធ្វើគំរូល្អដល់ប្រជាពលរដ្ឋ ក្នុងការគោរពច្បាប់ចរាចរណ៍ ។ ការចូលរួមសហការផ្ដល់ព័ត៌មានរបស់ប្រជាពលរដ្ឋ ពេលមានគ្រោះថ្នាក់ម្ដងៗមានការយឺតយ៉ាវ ។ អ្នកបើកបរមួយចំនួនខ្វះក្រមសីលធម៌ មិនគោរពច្បាប់ ខ្វះការយោគយល់អាធ្យាស្រ័យគ្នា ដឹកមនុស្សលើសចំណុះ បើកបរវ៉ាជែង គ្មានសណ្តាប់ធ្នាប់ ។ ការគោរពច្បាប់ចរាចរណ៍ផ្លូវគោក មានប្រជាជនខ្លះគោរពតែចំពោះមុខសមត្ថកិច្ច គ្មានសមត្ថកិច្ចគាត់មិនគោរព ធ្វើឲ្យគ្រោះថ្នាក់នៅតែបន្តកើនឡើង ។ អ្នកបើកបរមិនយល់ពីច្បាប់ចរាចរណ៍ និងផ្លាកសញ្ញាកំណត់ល្បឿនអតិបរមា៤០គីឡូម៉ែត្រក្នុង១ម៉ោង។ ផ្ទាំងផ្លាកសញ្ញាកំណត់ល្បឿនតាមដងផ្លូវមានលក្ខណៈតូច មើលមិនឃើញច្បាស់ ។ មិនមានផ្ទាំងផ្លាកសញ្ញា ចាប់ការកំណត់ល្បឿនអតិបរមា៤០គីឡូម៉ែត្រក្នុង១ម៉ោង នៅតាមផ្លូវជាតិ ។ អ្នកបើកបររថយន្តធំគ្រប់ប្រភេទ ដឹកខុសលក្ខណៈបច្ចេកទេស បញ្ចេញសំឡេងខ្លាំងៗ គ្មានភ្លើងបំភ្លឺផ្លូវ គ្មានភ្លើងសញ្ញាបត់ឆ្វេងបត់ស្តាំគ្រប់គ្រាន់ ។ អ្នកបើកបរម៉ូតូងាយរងគ្រោះថ្នាក់ភាគច្រើន ជាពិសេសកម្មកររោងចក្រនិងសំណង់ ។ អ្នកបើកបរម៉ូតូអូសរ៉ឺម៉កមួយចំនួនម៉ូតូចាស់ៗ គ្មានភ្លើងបំភ្លឺគ្រប់គ្រាន់ ។ អ្នកបើកបរម៉ូតូភាគច្រើនមិនពាក់មួកសុវត្ថិភាព ជាពិសេសសិស្សសាលានិងអ្នកនៅប្រជុំជន ។ អ្នកបើកបរសេពគ្រឿងស្រវឹងក្នុងពេលបើកបរលើដងផ្លូវនៅពេលយប់ ។ អ្នកបើកបរម៉ូតូភាគច្រើនឃើញសមត្ថកិច្ចដាក់គោលដៅត្រួតពិនិត្យតែងតែបើកគេច និងបើកត្រឡប់ក្រោយដាក់អ្នកជិះជាមួយចុះដើរ ឬបន្ថែមល្បឿនទៅមុខទៀត ៕ដោយ៖វ៉ៃកូ