ភ្នំពេញ៖ អភិបាលរាជធានីភ្នំពេញ និងជាប្រធានគណៈកម្មាធិការសាខាកាកបាទក្រហមកម្ពុជារាជធានីភ្នំពេញ លោក ឃួង ស្រេង បានផ្តល់អំណោយជូនបងប្អូនកម្មករស៊ីក្លូជាង៣០០នាក់ ដើម្បីឲ្យបងប្អូនបានទៅវត្តធ្វើបុណ្យទានតាមប្រពៃណីជាតិក្នុងឱកាសបុណ្យភ្ជុំបិណ្ឌនេះ។
ពិធីនេះបានធ្វើឡើងនារសៀលថ្ងៃសុក្រ ទី ២០ ខែកញ្ញា ឆ្នាំ២០១៩នេះ នៅក្នុងសាលារាជធានី ក្រោមអធិបតីភាពលោក ឃួង ស្រេង និងមានការចូលរួមពី មន្ត្រីក្រោមឱវាទមួយចំនួនទៀត។
លោក ឃួង ស្រេង បានមានប្រសាសន៍លើកឡើងថា សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន តែងតែគិតគូរអំពីសុខទុក្ខប្រជាពលរដ្ឋគ្រប់ទីកន្លែង ។ ដោយឡែកសម្រាប់បងប្អូនកម្មករស៊ីក្លូ សម្តេចតេជោ ក៏បានសម្រេចបង្កើតឲ្យមានជាសមាគមមូលនិធិត្រីចក្រយានកម្ពុជាដែលជាផ្នែកមួយក្នុងការចូលរួមអនុវត្តន៍ប្រព័ន្ធគាំពារសង្គម និងគិតគូរពីសុខទុក្ខរបស់បងប្អូនក្នុងចំណោមអ្នកប្រកបរបរធាក់ស៊ីក្លូចំនួនជាង៣០០នាក់ក្នុងរាជធានីភ្នំពេញបច្ចុប្បន្ន។
ជាក់ស្តែងសម្រាប់នៅរសៀលនេះ បងប្អូនស៊ីក្លូចំនួន៣១៦នាក់ បានទទួលអំណោយពីសម្តេចតេជោនិងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដោយក្នុងម្នាក់ៗ ទទួលបានអាវយឺត ៥អាវ មី៥កញ្ចប់ តែ៥កញ្ចប់ ទឹកដោះគោ ២កំប៉ុង ស្ករស ១គីឡូក្រាម ត្រីខ ២កំប៉ុង ទឹកក្រូច៤ កំប៉ុង ស្រាក់បាយ ១ស្រាក់ សាប៊ូកន្លះគីឡូ ១កញ្ចប់ នំប៉ុង១ដើម ទឹកសុទ្ធបរិភោគ ១ដប និងថវិកាចំនួន១១ម៉ឺនរៀល ដើម្បីឲ្យបងប្អូនបានទៅវត្តធ្វើបុណ្យទានតាមប្រពៃណីជាតិ ក្នុងឱកាសបុណ្យភ្ជុំបិណ្ឌនេះផងដែរ៕ ដោយ ៖ កូឡាប
