បាត់ដំបង៖ លោក ឧត្តមសេនីយ៍ទោ អ៊ុច សុខុន បានចុះសួរសុខទុក្ខក្មួយៗ កំពុងបន្សាបគ្រឿងញៀន នៅមជ្ឈមណ្ឌលពិភពនៃក្តីសង្ឃឹម ហើយលោកថា ឥទ្ធិពលគ្រឿងញៀនពិតជាបានបំផ្លាញនូវអនាគតខ្លួនយើងក្រុមគ្រួសារយើង និងសង្គមជាតិយើង ដែលចាំបាច់យើងទាំងអស់គ្នា ត្រូវតែចូលរួមលុបបំបាត់ ឲ្យបាននូវបញ្ហាគ្រឿងញៀន នៅក្នុងសង្គមរបស់យើង ។
លោកឧត្តមសេនីយ៍ទោ អ៊ុច សុខុន ស្នងការនៃស្នងការដ្ឋាននគរបាលខេត្តបាត់ដំបង បានអញ្ជើញសួរសុខទុក្ខក្មួយៗដែលកំពុងធ្វើការអប់រំកែប្រែ (បន្សាបសារធាតុញៀន) នៅក្នុងមជ្ឈមណ្ឌលពិភពនៃក្តីសង្ឃឹម ស្ថិតនៅភូមិដំណាក់ដង្កោ ឃុំក្តុលតាហែន ស្រុកបវេល ខេត្តបាត់ដំបង នាឱកាសបុណ្យកាន់បិណ្ឌ ភ្ជុំបិណ្ឌប្រពៃណីជាតិខ្មែរនៅព្រឹកថ្ងៃ សៅរ៍ ទី ២១ ខែ កញ្ញា ឆ្នាំ២០១៩ ។
លោកឧត្តមសេនីយ៍ទោ ស្នងការ មានប្រសាសន៍ថា ក្មួយៗទាំងអស់គ្នាដែលកំពុងស្ថិតនៅទីនេះ គឺមិនមែនជាអ្នកទោសនោះទេ ប៉ុន្តែក្មួយៗគឺជាជនរងគ្រោះដោយសារគ្រឿងញៀន។ លោកបន្តថា ឥទ្ធិពលគ្រឿងញៀនពិតជាបានបំផ្លាញនូវអនាគតខ្លួនយើងក្រុមគ្រួសារយើង និងសង្គមជាតិយើងដែលចាំបាច់យើងទាំងអស់គ្នា ត្រូវតែចូលរួមលុបបំបាត់ឲ្យបាននូវបញ្ហាគ្រឿងញៀននេះ នៅក្នុងសង្គមរបស់យើង ។
លោកបានបញ្ជាក់ថា ដោយការយកចិត្តទុកដាក់គិតគូរពីប្រមុខដឹកនាំរាជរដ្ឋាភិបាល នៃព្រះរាជាណាចក្រកម្ពុជា ពីក្រសួងមហាផ្ទៃ ពីអគ្គស្នងការដ្ឋាននគបាលជាតិ ក៏ដូចគណៈអភិបាលខេត្តបាត់ដំបង លោកបានយកចិត្តទុកដាក់គិតគូរអំពីផលប៉ះពាល់ នៃបញ្ហាគ្រឿងញៀននេះ ក្នុងនោះវិធានការអប់រំបន្សាបការញៀនគ្រឿងញៀន គឺជាចំណែកមួយដ៏សំខាន់ ក្នុងការរួមចំណែកស្តានីតិសម្បទាឡើងវិញ ដើម្បីឲ្យក្មួយៗជាជនរគ្រោះបានវិលត្រឡប់ទៅរកស្ថានភាពប្រក្រតី ធម្មតាឡើងវិញ មុនពេលវិលចូលទៅកាន់សហគមន៍មូលដ្ឋានសង្គមគ្រួសារវិញ។
ចុងក្រោយលោក បានផ្តាំផ្ញើដល់ក្មួយៗទាំងអស់ ត្រូវព្យាយាមអប់រំកែប្រែខ្លួនដោយការតាំងចិត្តខ្ពស់បំផុត ត្រូវចេះស្រឡាញ់គ្នាចេះជួយគ្នាពេលមានធុរៈហើយសូមជូនពរក្មួយៗទាំងអស់ មានសុខភាពល្អ ក្នុងឱកាសបុណ្យកាន់បិណ្ឌ ភ្ជុំបិណ្ឌ ប្រពៃណីជាតិខ្មែរ សូមជោគជ័យទាំងអស់គ្នា ក្នុងកិច្ចបន្សាបសារធាតុញៀននៅក្នុងខ្លួន៕ដោយ៖កូឡាប
