មណ្ឌលគិរី៖ សមត្ថកិច្ចចម្រុះបានឃាត់ខ្លួនលោក តែ គឹមសាន ប្រធានសហគមន៍រ៉ែមាសចុងផ្លាស់ សង្ស័យជាប់ពាក់ព័ន្ធបទល្មើសព្រៃឈើ ដែលលាក់ទុកឈើខុសច្បាប់ជាច្រើនម៉ែត្រគូប នៅក្នុងរោងអាជីវកម្មរ៉ែមាស។ នៅព្រឹកថ្ងៃទី២១ ខែកញ្ញា ឆ្នាំ២០១៩នេះ មន្រ្តីជំនាញកំពុងបន្តនីតិវិធីរបស់ខ្លួន ដើម្បីធ្វើការបញ្ជូនជនសង្ស័យទៅកាន់អយ្យការសាលាដំបូងខេត្តមណ្ឌលគិរី ដើម្បីចាត់ការបន្តទៀត។
សមត្ថកិច្ចចម្រុះបានឃាត់ខ្លួនលោក តែ គឹមសាន មានកម្លាំងកងរាជអាវុធហត្ថខេត្ត សហការជាមួយកងកម្លាំងជំនាញជាច្រើនដឹកនាំដោយ ចឹង សុចន្ថា អភិបាលរងខេត្តមណ្ឌលគិរី កាលពីល្ងាចថ្ងៃទី២០ ខែកញ្ញា ឆ្នាំ២០១៩ ក្នុងឃុំចុងផ្លាស់ ស្រុកកែវសីមា ខេត្តមណ្ឌលគិរី។
លោក ហែម បូណារ៉ែល មេបញ្ជាការអាវុធហត្ថខេត្តមណ្ឌលគិរី បានបញ្ជាក់នៅព្រឹកថ្ងៃទី២១ ខែកញ្ញា ឆ្នាំ២០១៩នេះថា ពិតជាមានការ ឃាត់ខ្លួនជនសង្ស័យនេះមែន ដោយសារមន្រ្តីជំនាញចម្រុះខេត្ត បានរកឃើញការស្តុកលាក់ទុកឈើជាច្រើនម៉ែត្រគូប ជាវត្ថុតាងនៅក្នុងរោងអាជីវកម្មរ៉ែមាសរបស់គាត់ ហើយជនសង្ស័យ ត្រូវបានសមត្ថកិច្ចបញ្ជូនទៅកាន់ទីបញ្ជាការដ្ឋានអាវុធហត្ថខេត្ត ដើម្បីបន្តនីតិវិធីតាមផ្លូវច្បាប់។
លោក ចឹង សុចន្ថា អភិបាលរងខេត្តមណ្ឌលគិរី ទទួលបន្ទុកប្រធានគណៈកម្មការបង្រ្កាបធនធានធម្មជាតិខេត្ត បានប្រាប់ផងដែរថា ការឃាត់ខ្លួនជនសង្ស័យរូបនេះ ក្រោយកម្លាំងជំនាញស្រាវជ្រាវរកឃើញបុគ្គលនេះ មានការស្តុកទុកឈើគ្រប់ប្រភេទជាច្រើនម៉ែត្រគូប។
លោក ស្វាយ សំអ៊ាង អភិបាលខេត្តមណ្ឌលគិរី បានថ្លែងថា ករណីនេះទុកឲ្យខាងមន្រ្តីអនុវត្តច្បាប់ ចាត់ការឲ្យបានតឹងរ៉ឹងបំផុតរាល់បទល្មើស ឬបុគ្គលណាដែលបានប្រព្រឹត្តផ្ទុយនិងច្បាប់មិនថា អ្នកក្រ ឬអ្នកមានលុយនោះទេ អ្នកប្រព្រឹត្តខុសត្រូវទទួលទោស មិនមែនអ្នកមានប្រាក់ ឬអាងនេះ អាងនោះនោះ រួចខ្លួននោះទេ ដើម្បីស្របទៅតាមប្រទេសមានច្បាប់គ្រួសារមានវិន័យ៕ដោយ៖បញ្ញាស័ក្តិ