បាត់ដំបង ៖ ស្នងការដ្ឋាននគរបាលខេត្តបាត់ដំបង កាលពីថ្ងៃទី២២ខែកញ្ញា បានឲ្យដឹងថា នគរបាលស្រុកមោងឫស្សីស្រាវជ្រាវឃាត់ខ្លួនជនសង្ស័យម្នាក់ លួចទ្រព្យសម្បត្តិប្រជាពលរដ្ឋ និងដកហូតបានទ្រព្យសម្បត្តិ យកមកប្រគល់ជូនម្ចាស់វិញ។
សូមបញ្ជាក់ថា កាលពីថ្ងៃ សៅរ៍ ទី ២១ ខែ កញ្ញា ឆ្នាំ២០១៩ ក្នុងចន្លោះពីម៉ោង ០៨ព្រឹកទៅដល់ម៉ោង ១១ថ្ងៃត្រង់មានករណីលួចទ្រព្យសម្បត្តិមួយបានកើតឡើង ក្នុងលំនៅដ្ឋានរបស់ជនរងគ្រោះឈ្មោះ ឆន ខ្លឹង ភេទ ស្រី អាយុ ៣១ឆ្នាំ រស់នៅក្រុមទី ០១ ភូមិអង្គ្រង ឃុំជ្រៃស្រុកមោងឫស្សី ខេត្តបាត់ដំបង ក្នុងពេលដែលជនរងគ្រោះឈ្មោះ ឆន ខ្លឹង មិននៅផ្ទះក៏ត្រូវបានជនសង្ស័យមិនស្គាល់អត្តសញ្ញាណ លួចយកទ្រព្យសម្បត្តិ ពីក្នុងលំនៅដ្ឋានដែលក្នុងនោះមាន៖ ១-ខ្សែកមាសមួយខ្សែទម្ងន់ ០២ដំឡឹង ០៧ជី ២- ខ្សែដៃមួយខ្សែទម្ងន់០១ដំឡឹង និង៣-ប្រាក់រៀលចំនួន ១៣.០០០.០០០រៀល។
រហូតដល់ថ្ងៃទី ២២ ខែ កញ្ញា ឆ្នាំ ២០១៩ ទើបជនរងគ្រោះដាក់ពាក្យបណ្តឹង មកសមត្ថកិច្ចប៉ុស្តិ៍នគរបាលរដ្ឋបាល ឃុំជ្រៃ ស្រុកមោងឫស្សី ខេត្តបាត់ដំបង អំពីករណីចោរចូលលួចយកទ្រព្យសម្បត្តិនេះ ។ ក្រោយទទួលបានបណ្តឹងពីជនរងគ្រោះភ្លាម និងដោយអនុវត្តន៍តាមមតិណែនាំរបស់លោកឧត្តមសេនីយ៍ទោ អ៊ុច សុខុន ស្នងការនៃស្នងការដ្ឋាននគរបាលខេត្តបាត់ដំបង ក៏ដូចមតិដឹកនាំរបស់លោកឧត្តមសេនីយ៍ត្រី ជេត វណ្ណនី ស្នងការរងផែនការងារព្រហ្មទណ្ឌ លោកវរសេនីយ៍ត្រី ស គឹមឡុង អធិការនគរបាលស្រុកមោងឫស្សី បានដឹកនាំធ្វើការស្រាវជ្រាវជាបន្ទាន់ និងដោយបានការសម្របសម្រួល លើនីតិវិធីពីលោក នួន សាន ព្រះរាជអាជ្ញាអមសាលាដំបូងខេត្តបាត់ដំបងផងនោះ នៅថ្ងៃទី ២២ ខែ កញ្ញា ឆ្នាំ ២០១៩ ដដែលនេះ សមត្ថកិច្ចនគរបាលបានធ្វើការស្រាវជ្រាវ រហូតឈានទៅដល់ ការឃាត់ខ្លួនមុខសញ្ញាជាជនសង្ស័យចំនួន០១នាក់ឈ្មោះ ឈ្មោះ ទិត តយ ភេទប្រុស អាយុ ៣០ ឆ្នាំរស់នៅកន្លែងកើតហេតុខាងលើ ដើម្បីធ្វើការស្រាវជ្រាវ ។ ឆ្លងតាមរយៈនៃការស្រាវជ្រាវ ជនសង្ស័យបានឆ្លើយសារភាពថា ខ្លួនពិតជាបានលួចយកទ្រព្យសម្បត្តិរបស់ជនរងគ្រោះខាងលើពិតប្រាដកមែន ។
លោកវរសេនីយ៍ត្រី ស គឹមឡុង អធិការនគរបាលស្រុកមោងឫស្សី បានបញ្ជាក់ថា នៅថ្ងៃកើតហេតុ ជនរងគ្រោះ មិននៅផ្ទះទេ មានតែឳពុក ម្តាយចាស់ៗនៅទីនោះ ដោយសារខ្លួនទៅធ្វើស្រែបាត់ ។ ដោយឃើញស្ថានភាពអំណោយផល ជនសង្ស័យខាងលើ បានចូលទៅលួចយកទ្រព្យសម្បត្តិ ដែលម្ចាស់ទុកនៅក្នុងទូយកទៅបាត់ លុះម្ចាស់វិលត្រឡប់មកវិញ ទើបដឹងថា ទ្រព្យសម្បត្តិដែលទុកនៅក្នុងទូ ត្រូវជនសង្ស័យលួចយកទៅបាត់ ប៉ុន្តែជនរងគ្រោះមិនបានរាយការណ៍ ឬប្តឹងសមត្ថកិច្ចនគរបាលភ្លាមៗទេ រហូតដល់ថ្ងៃទី ២២ ខែ កញ្ញា ឆ្នាំ ២០១៩ ទើបសម្រេចចិត្តប្តឹងទៅនគរបាលមូលដ្ឋាន និងបានធ្វើការ ស្រាជ្រាវភ្លាមៗ រហូតសម្រេចឃាត់ខ្លួនជនសង្ស័យខាងលើ ព្រមទាំងដកហូតបានសម្ភារៈភស្តុតាងរួមមាន ៖ ១-ខ្សែកមាសមួយខ្សែទម្ងន់ ០២ដំឡឹង ០៧ជី។ ២-ខ្សែដៃមួយខ្សែទម្ងន់០១ដំឡឹង ។ ៣-ប្រាក់រៀលចំនួននៅសល់តែ៨.០០០.០០០ រៀលទេ ព្រោះជនសង្ស័យយកទៅចាយវាយ និងសងថ្លៃជំពាក់គេអស់មួយចំនួនហើយ ។
ជនសង្ស័យរូបនេះ នឹងរៀបចំសំណុំរឿង បញ្ជូនមកការិយាល័យជំនាញ ដើម្បីចាត់ការបន្តទៅកាន់ តុលាការខេត្តបាត់ដំ បងចាត់ការតាមផ្លូវច្បាប់៕ ដោយ ៖ កូឡាប
