រដ្ឋាភិបាលជប៉ុនមានគម្រោងផ្តល់ការលើកលែងទោស ទៅដល់អ្នកទោសតូចតាច ប្រហែល ៦០០.០០០នាក់ ដើម្បីអបអរដល់ពិធីឡើងសោយរាជ្យ របស់ព្រះចៅអធិរាជ្យ Naruhito ដែលនឹងប្រព្រឹត្តឡើងនៅថ្ងៃទី ២២ ខែតុលាខាងមុខ។ នេះបើតាមការចុះផ្សាយរបស់កាសែត Mainichi Shimbun។
ជនទាំងឡាយដែលនឹងទទួលបានការលើកលែងទោស នឹងមិនទាន់ទទួលបានសិទ្ធិពេញលេញនៅឡើយទេ។ នៅក្នុងប្រទេសជប៉ុន ជនដែលត្រូវគេកាត់ទោស និងរងការផាកពិន័យ ត្រូវបានរដ្ឋហាមប្រាមមិនឲ្យធ្វើជាពេទ្យ គិលានុបដ្ឋាយិកា និងទទួលបានអាជ្ញាប័ណ្ណដទៃទៀត។
នៅពេលសាកសួរពីគម្រោងលើកលែងទោស លោក Yoshihide Suga លេខាធិការគណៈរដ្ឋមន្រ្តីជប៉ុន បានថ្លែងប្រាប់អ្នកសារព័ត៌មានដូច្នេះថា “បច្ចុប្បន្ន ពួកយើងកំពុងតែពិចារណាលើបញ្ហានោះ យ៉ាងយកចិត្តទុកដាក់។ ខ្ញុំសូមបដិសេធមិនធ្វើអត្ថាធិប្បាយលម្អិតទេ”។
សូមរំលឹកថា នៅពេលពិធីឡើងសោយរាជ្យធ្វើឡើងកាលពីឆ្នាំ ១៩៩០ សម្រាប់អតីតព្រះចៅអធិរាជ្យ Akihito ទណ្ឌិតចំនួន ២,៥លាននាក់ បានទទួលការលើកលែងទោស៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia
