កំពង់ធំ៖ រថយន្តក្រុងដឹកអ្នកដំណើរពេលយប់ ទំនងជាតៃកុងឡានងងុយដេកបើកជ្រុលមកបុកជាមួយនឹងរថយន្តដឹកទំនិញប្រភេទយីឌុប បណ្ដាលឲ្យស្លាប់តៃកុងឡានក្នុងកាប៊ីនរថយន្ត នៅម៉ោង៤ទៀបភ្លឺ ថ្ងៃអាទិត្យ ទី៧ ខែមករា ឆ្នាំ២០១៨ នៅផ្លូវជាតិលេខ៦ ភូមិទួលដំណាក់ ឃុំចុងដូង ស្រុកបារាយណ៍ ខេត្តកំពង់ធំ។
សមត្ថកិច្ចមូលដ្ឋានបានឲ្យដឹងថា គ្រោះថ្នាក់ចរាចរណ៍នេះ បង្កឡើងដោយរថយន្តក្រុងដឹកអ្នកដំណើរម៉ាក ហ៊ីយ៉ាន់ដាយ ពណ៌សលាយខៀវ ពាក់ស្លាកលេខ ភ្នំពេញ 3B-9753 ។ រថយន្តក្រុងបានបើកទៅបុករថយន្តដឹកទំនិញ ម៉ាកហ៊ីយ៉ាន់ដាយ ពណ៌ស គ្មានស្លាកលេខ បណ្ដាលឲ្យរថយន្តខូចខ្ទេចរថយន្តទាំងពីរផ្នែកខាងមុខ ហើយអ្នកបើកបរថយន្តក្រុង បានស្លាប់នៅលើរថយន្ត។
អ្នកបើកបររថយន្តក្រុង ដែលស្លាប់ឈ្មោះ ផល យ៉ាត រស់នៅភូមិត្រពាំងចំបក់ ឃុំស្វាយចេក ស្រុករំដួល ខេត្តស្វាយរៀង។ ចំណែកអ្នករថយន្តដឹកទំនិញឈ្មោះ ហុក ជីវ៉ា រស់នៅភូមិត្រពាំងត្នាត ឃុំស្រម៉ ស្រុកជើងព្រៃ ខេត្តកំពង់ចាម ក្រោយកើតហេតុ បានរត់គេចខ្លួនបាត់៕ ដោយ៖បញ្ញាស័ក្តិ
