ស្រ្តីដែលទើបតែនឹងរៀបការហើយថ្មីៗម្នាក់ ព្រមទាំងសមាជិកគ្រួសារចំនួន ៣នាក់បានលង់ទឹកស្លាប់នៅអាងស្តុកទឹកដ៏ធំមួយ ក្រោយពេលពួកគេព្យាយាមថតរូប Selfie។ នេះបើតាមការបញ្ជាក់របស់ប៉ូលីសឥណ្ឌានៅក្នុងរដ្ឋ Tamil Nadu។
ជនរងគ្រោះស្លាប់ គឺស្ថិតក្នុងចំណោមមនុស្ស ៦នាក់ដែលតោងដៃគ្នា និងបានព្យាយាមឈរក្នុងទឹកត្រឹមចង្កេះនៅក្បែរទំបន់ទឹក Pambar ហើយមនុស្សម្នាក់បានរអិល និងបានទាញអ្នកផ្សេងៗទៅជាមួយ។
មនុស្សស្រីម្នាក់ត្រូវបានទាញជាប់ដោយបងប្រុសរបស់នាង ខណៈពេលដែល ៤នាក់ទៀត បានបាត់ខ្លួននៅក្រោមទឹក។ ប៉ូលីសបញ្ជាក់ថា សាកសពជនរងគ្រោះត្រូវបានរកឃើញនៅពេលបន្ទាប់។
សូមបញ្ជាក់ថា ឥណ្ឌាមានអត្រាអ្នកស្លាប់ដោយសារការចង់ថត Selfie ខ្ពស់បំផុតក្នុងពិភពលោក។
ចន្លោះឆ្នាំ ២០១១ ដល់ ២០១៧ មានមនុស្សចំនួន ២៥៩នាក់បានស្លាប់ដោយសារតែការថតរូបខ្លួនឯង ហើយក្នុងចំណោមជនរងគ្រោះទាំងអស់ មានពាក់កណ្តាលជាឥណ្ឌា។ នេះបើតាមការសិក្សាស្រាវជ្រាវ របស់បណ្ណាល័យវេជ្ជសាស្រ្តជាតិអាមេរិច។ ប្រទេសមានអត្រាអ្នកស្លាប់ខ្ពស់បន្ទាប់ មានរុស្សី អាមេរិច និងប៉ាគីស្ថាន៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC
