ខេត្តព្រះសីហនុ ៖ ប្រជាពលរដ្ឋរស់នៅក្រុងព្រះសីហនុ បានឲ្យដឹងថា រាល់ថ្ងៃនេះ ជាពិសេសនៅពេលយប់ គឺសកម្មភាពចោរលួចកាច់កម៉ូតូ បានកើតមានជាច្រើនករណី ហើយសមត្ថកិច្ចស្ថាប័នពាក់ព័ន្ធ ជួយអន្តរាគមន៍មិនបានទេ។
ផ្តើមពីបញ្ហានេះ ប្រជាពលរដ្ឋ ដែលត្រូវចោរលួចម៉ូតូ នៅក្រុងព្រះសីហនុ បានរំលឹកដល់ប្រជាពលរដ្ឋ ជាអ្នកប្រើប្រាស់ម៉ូតូ ឲ្យប្រយ័ត្នក្នុងការថែរក្សាម៉ូតូ របស់ខ្លួន ឲ្យបានត្រឹមត្រូវ ព្រោះសកម្មភាពចោរលួចកាច់កម៉ូតូ បានកើតមាន ស្ទើរជារៀងរាល់យប់ថ្ងៃ ក្នុងក្រុងព្រះសីហនុ។
ប្រជាពលរដ្ឋម្នាក់ ដែលបាត់ម៉ូតូ ឲ្យដឹងថា កាលពីថ្ងៃទី៦ ខែតុលា ឆ្នាំ២០១៩ រូបគាង់បានបាត់ម៉ូតូមួយគ្រឿង ម៉ាកឌ្រីមសង់ ផលិតឆ្នាំ២០១៨ ពណ៌ក្រហម ស្លាកលេខ1HB-7648 នៅម្តុំរង្វង់មូលតោពីរ ក្រុងព្រះសីហនុ។
រហូតមកដល់ថ្ងៃទី៩ ខែតុលា ឆ្នាំ២០១៩នេះ បៅមុនទាន់រកឃើញនៅឡើយទេ។
ចំណែក ប្រជាពលរដ្ឋម្នាក់ផ្សេងទៀត បានផ្តល់ព័ត៌មានមកថា កាលពីព្រលប់ថ្ងៃចន្ទ ទី៧ ខែតុលា ឆ្នាំ២០១៩ មានករណីចោរលួចកាច់កម៉ូតូ១គ្រឿង យកបាត់ដោយសុវត្ថិភាព ចេញពីយាន្តដ្ឋាន ហេងវណ្ណា មានទីតាំងទល់មុខភោជនីយ៍ដ្ឋានសាម៉ូរ៉ៃ តាមបណ្តោយវិថី៧មករា ក្រុងព្រះសីហនុ។
ជនរងគ្រោះបានឲ្យដឹងថា ម៉ូតូ ដែលចោរកាច់កយកទៅបាត់នោះ ម៉ាកឌ្រីមសង់ពណ៌ខ្មៅ សេរីឆ្នាំ២០១៩ ពាក់ស្លាលលេខ ព្រះសីហនុ 1I-1361 ដោយលួចចេញពីបរិវេណយានដ្ឋាន ហេងវណ្ណា មានទីតាំងទល់មុខ ភោជនីយដ្ឋានសាមូរ៉ៃ ជិតយានដ្ឋានអរុណរះ។
ជនរងគ្រោះសំណូមពរថា ព័ត៌មានខាងលើនេះ ជាការផ្តល់ដំណឹងដល់កម្លាំងសមត្ថកិច្ចនគរបាល និងកងរាជអាវុធហត្ថខេត្តព្រះសីហនុ ឲ្យជួយអន្តរាគន៍ដល់រូបគាត់ដោយអនុគ្រោះផង៕ ដោយ៖ ដែន សីមា
