កងកម្លាំងអាមេរិចបានធ្វើការវាយប្រហារតាមដែនអាកាស ទៅលើមន្ទីរពិសោធន៍ថ្នាំញៀន របស់ក្រុមតាលីបង់ នៅភាគខាងលិចប្រទេសអាហ្គានីស្ថាន បណ្តាលឲ្យជនស៊ីវិលចំនួនយ៉ាងតិច ៣០នាក់បានស្លាប់ រួមមានកុមារជាច្រើននាក់ផងដែរ។ នេះបើតាមអង្គការសហប្រជាជាតិ។
អង្គការសហប្រជាជាតិបាននិយាយថា ខ្លួនមានរបាយការណ៍ដែលជឿទុកចិត្តបាន នៃការស្លាប់មនុស្ស ៣០នាក់នៅក្នុងការវាយប្រហារ កាលពីខែឧសភា។
សហរដ្ឋអាមេរិចបានបញ្ជាក់ថា ខ្លួនមានគោលដៅវាយប្រហារទៅលើមន្ទីរពិសោធន៍ថ្នាំញៀន មេតំហ្វេតាម៊ីន ដែលជាប្រភពជួយរកថវិកា ឲ្យក្រុមសកម្មប្រយុទ្ធនៅក្នុងប្រទេសអាហ្គានីស្ថាន។
កងកម្លាំងអាមេរិចបានវាយប្រហារ ទៅលើកន្លែងផលិតគ្រឿងញៀនចំនួន ៦០ នៅក្នុងខេត្ត Farah និងខេត្តជិតគ្នាឈ្មោះ Nimroz កាលពីថ្ងៃទី ៥ ខែឧសភា។
គណៈប្រតិភូរបស់អង្គការសហប្រជាជាតិ ដែលបានធ្វើដំណើរទៅកាន់កន្លែង រងការវាយប្រហារ និងបានធ្វើការសម្ភាសន៍ផ្ទាល់ ជាមួយនឹងប្រជាជនរស់នៅទីនោះ បានធ្វើការសន្និដ្ឋានថា មានមនុស្សស្លាប់ចំនួន ៣៩នាក់ រួមមានកុមារ ១៤នាក់។
អង្គការសហប្រជាជាតិបញ្ជាក់ទៀតថា ខ្លួនក៏បានរកឃើញភស្ថុតាងផ្សេងទៀត ពីការស្លាប់មនុស្ស ៣០នាក់បន្ថែម ដែលភាគច្រើនជាស្រ្តី និងកុមារ។
បើតាមរបាយការណ៍ កន្លែងដែលអាមេរិចវាយប្រហារនោះ មិនត្រឹមតែជាតំបន់គ្រប់គ្រងផ្តាច់មុខ ដោយក្រុមតាលីបង់នោះទេ ប៉ុន្តែជាកន្លែងដែលគ្រប់គ្រងដោយក្រុមបណ្តាញឧក្រិដ្ឋជនផងដែរ ទើបធ្វើឲ្យមានការវាយប្រហារយោធារបស់អាមេរិច។
អ្នកនាំពាក្យរបស់កងកម្លាំងអាមេរិច ក្នុងប្រទេសអាហ្គានីស្ថាន បានធ្វើការបដិសេធថា ការវាយប្រហារតាមដែនអាកាសរបស់ខ្លួន បណ្តាលឲ្យស្លាប់ជនស៊ីវិលជាច្រើននាក់ និងបានអះអាងថា អាមេរិចបានធ្វើការវាយប្រហារ ដ៏ច្បាស់លាស់ ពីអ្វីដែលខ្លួនដឹងថា ជាកន្លែងពិសោធន៍គ្រឿងញៀន របស់ក្រុមតាលីបង់។
សូមបញ្ជាក់ថា សហរដ្ឋអាមេរិច បានចំណាយយ៉ាងច្រើន ទៅលើសង្រ្គាម ក្នុងគោលបំណង បំផ្លាញការជួញដូរអាភៀន នៅក្នុងប្រទេសអាហ្គានីស្ថាន ដោយចំណាយប្រាក់អស់ ១,៥លានដុល្លារក្នុងមួយថ្ងៃ ចន្លោះឆ្នាំ ២០០១ និង ២០១៨ ដោយមានគោលដៅទៅលើចំការអាភៀន និងកន្លែងផលិត៕
អត្ថបទប្រែសម្រួលដោយ៖ សុភ័ក្រ
